قصتي مع أم الأبناء السبعه في الحديقه .. بقلمي .. [ مشاركة مميزة ] a

آخر المشاركات المطروحة في منتديات قبيلة بني زيد

  وسّع لصدرك مدامك حي = العمر ياصاحبي مره ( آخر مشاركة : مطول الغيبات    |    مجانا اشترك لتصلك المشاريع الخيرية الرسمية الى جوالك يومياً (صورة) ( آخر مشاركة : ساكتون    |    اكفل يتيم مدى الحياة (صورة) ( آخر مشاركة : جبرين بن سعد الجبرين    |    بعض الطرق بالمذاكرة ( آخر مشاركة : نجم الصحراء    |    إجعل لك سبع سنابل ولوالديك ولكل من يعز عليك (صورة) ( آخر مشاركة : ساكتون    |    أسهل وأرخص طريقة ليكون لك صدقة كل يوم في مكة داخل حدود الحرم وانت مرتاح مكانك (صورة) ( آخر مشاركة : ساكتون    |    ب 50 ريال فقط سيكون لك أجر مليون شخص فرصة نادرة لاتعوض (صورة) ( آخر مشاركة : ساكتون    |    هل تريد أن يكون لك سقيا صدقة جارية كل يوم حتى وأنت نائم أجرك مستمر لايتوقف (صورة) ( آخر مشاركة : ساكتون    |    هل تريد أجر القائم المصلي لايفتر وأجر الصائم الذي لايفطر بإذن الله ( صورة) ( آخر مشاركة : ساكتون    |    المولودة ماجدة تنظم لأخواتها ليكونن تسعاً ( آخر مشاركة : طالب علم    |   


العودة   منتديات قبيلة بني زيد > الأقسام الشرعية والأقسام العامة > الـقـسم الـعـام
التّسجيل   جعل جميع المنتديات مقروءة

قصتي مع أم الأبناء السبعه في الحديقه .. بقلمي .. [ مشاركة مميزة ]

المشاركة في الموضوع
 
خيارات الموضوع طريقة العرض
  #1  
قديم 20-05-2009, 10:57 PM
الصورة الرمزية لـ ذكريات الطفوله
ذكريات الطفوله ذكريات الطفوله is offline
 





ذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of light
 
Talking قصتي مع أم الأبناء السبعه في الحديقه .. بقلمي .. [ مشاركة مميزة ]

 



السلام عليكم احبتي

بما اني في القسم العام واخواننا قواهم الله شددوا علينا شوي كل ما نزلت موضوع

استلموه ما شاء الله عليهم ما يعدي عليهم شئ

منها اللي يغلق ومنها اللي يحذف والا يقولون مكرر او يكون من اخبار الصحف

صراحة احترت وش المواضيع اللي تصلح لذا القسم وخاصةإنه من اعز الاقسام

عندي .

واليوم زي ما تعرفون يوم إربعاء كل العالم طالعه بس اخيتكم ما حصلت لها الطلعه

قلت يابنت مالك إلا بني زيد قضيي الوقت واستفيدي وفيدي

وجاء في بالي انزل موضوع في القسم العام ّ

بس المشكله وش احط

سيف شامان الله يقويه بالمرصاد ويبي مواضيع من

كتابة العضو نفسه ويقول تجبر الواحد إنه يقراها

بس والله لا ني اديبه ولا شئ

واحس إسلوبي ما هنا زود

وقعدت افكر وش انزل عشان يرضون عنا مشرفين القسم

تذكرت موقف صارلي في ذا الاسبوع في احدى الحدائق العامه

قلت يابنت اكتبيه واللي يصير يصير


القصه الله يسلمكم ( بس لا تضحكون على إسلوبي )

طرت علي ذاك اليوم امشي على بالي رياضيه ومحافظه على صحتي المهم بديت في

المشي على الطريق المرصف اللي يدور على نفس الحديقه وفجأه سمعت صوت

يناديني يا اخت ياخت !!

التفت والاهي حرمه معها اولادها جالسه

قالت : بتمشين ؟ قلت : ايه

قالت : ما عليه تمشي بنتي معك ؟

قلت : الله يحيها يالله تعالي ( كانت مستحيه تمشي بلحالها)

المهم قامت البنت معي ومشينا كم دوره على الحديقه ولا انكر اعجبتني بحياءها

وحشمتها وكنت اسولف انا واياها كإني اعرفها من زمان ّ

يعني دخلت قلبي وكانت في الثانوي .

بعد فتره تعبت وقلت لها : تراي ابجلس لاني تعبت شوي .

قالت البنت : خلاص تعالي إجلسي معنا شوي وتعرفي على أمي .

قلت : طيب

اقبلنا انا والبنت على مكان اهلها

قالت الام : خلصتوا ما امداكم !

قلت ضاحكه معها على الاقل مشينا شوي مو مثلك جالسه وبس .

قالت الام وهي تضحك : وش اسوي بزوجي موسوس يقول تمشون قدام الرجال !!

المهم سلمت عليها وشكرتني واصرت إني اجلس معهم الين يجي ابوهم

جلست .

قالت الام : تجون لذا الحديقه كثير ؟

قلت يعني !

قالت : هاذي اول مره نجي ابونا حطنا وراح يجيب ولدي اللي في البيت عمره سنه

وبنيته ضعيفه وقال ابروح اجيبه ما دام فيه شمس .

ناظرتها وانا مستغربه !

قلت لها عمره سنه ؟

قالت : ايه بس جسمه ضعيف شوي

قلت : طيب ذا اللي على رجولك كم عمره ؟

قالت : سنه وتصف

استغربت كثير وش لون تصير ذي!

قالت : ايه هاذا عبدالسلام ولدي وما هو ولدي

قلت : وش لون !

قالت : وهي حاضنه الطفل وممسكه برضاعته هاذا عبدالسلام يتيم وانا متكفله فيه

والله انه ولدي يا حبي له ( بلهجه قصيميه )

قلت يعني انتي مربيته ؟

قالت :ايه

اخذته من دار اليتام وعمره شهرين ورضعته مع ولدي وصار اخو لاولادي وبناتي

قلت وانا مندهشه وش موقف زوجك ما رفض ؟

قالت : بالاول رفض ولكني اقنعته .

وقالت بلهجتها القصيميه اللي احبها


أنتي ما تدرين وش اجر كافل اليتيم

قال الرسول صلى الله عليه وسلم بمعنى الحديث من كفل ثلاثة ايتام كالقائم الذي لا

ينام وكالصائم


الذي لا يفطر وكالمجاهد اللي ما يحط سيفه .

يقول صلى الله عليه وسلم: ((الساعي على الأرملةِ والمسكين كالمجاهدِ في سَبيلِ الله:

كالقائم لا يَفتُر وكالصائم لا يُفطِر))
أخرجه البخاري في الأدب في باب الساعي على

المِسكين و باب الساعي على الأرملة من حديث أبي هريرةَ.




انا ابغى مجاراة النبي صلى الله عليه وسلم ّ

فيه احد يسمع بذا الاجور ويتقاعس !


قلت في نفسي الله يخلف علينا ناس تدور الاجر وين ما يكون وناس تعصي الله ليل

ونهار وناس تكفل لها يتيم وتربيه كانه واحد من عيالها وناس ما تطلع الصدقه منهم

الا بالحسره

المهم قلت : لها صراحه ما شاء الله عليك والله غرت منك .

قالت : وانا اختك خذي لك واحد وتوكلي على الله والله بتشوفين الفرق في حياتك !

بعد لحظه جاء واحد من اولادها يبي يشرب

لاحظت فيه سمار في بشرته يختلف عن باقي اولادها السبعه !

وقبل ما اتكلم قالت : هاذا عبدالملك سلم على خالتك يا عبدالملك


فكانت المفاجأه الثانيهّ !!


قالت وهذا بعد مربيته وما خذته من الملجا من يوم عمره شهرين والحين عمره اربع

سنوات رضعته مع بنتي واشارت لبنتهاالصغيره اللي تلعب في المراجيح

ما اخفيكم كنت في ذهول .

يتيم اخر !

هل فيه ناس بهالطيبه في هالزمن ؟

تشوفهم تقول عيالها وهم ينادونها يمه !

وبناتها الكبار اللي تقول امهم عنهم : كل وحده خذت لها واحد واهتمت فيه تنومه

وتوكله وتلبسه .



(وين بناتنا اللي الوحده يالله تغسل لاخوهااواختها هاذا إذا تفضلت على امها الله

المستعان وهم كل وحده في الموضه والتلفزيون ومتاع الدنيا الفاني )

والله شوفي بعيوني وشلون يلعبونهم في الالعاب وكانهم اخوانهم واكثر !

لدرجة إنس سالت البنات عن موقفهم من الموضوع ؟

كل وحده حضنت واحد وقالت اصلا هذا ولدي !

والله ما اخبي عليكم خنقتني العبره ما ادري شفقه على الاطفال ؟ ولا فرحه

بوجود ناس بهالقلوب الرحيمه ؟ ولا حسره على نفسي المتقاعسه ؟ وقمت اهلل


عليهم واشكرهم من قلب .

واستحلفت الام عن احساسها تجاههم ؟

قالت : هاذولي عيالي والله مثل عيالي .

وقالت : كنت اتمنى ان احدهم بنت ولكن ما لقيت .

وواجهت بعض الصعوبات الين خلصت اوراقههم والحمد لله من يوم خذتهم وانا

اموري متسمحه وحياتي متغيره ودعائي مستجاب يالله وانا اختك عزمي واكفلي طفل

وجيبيه عندكم في البيت لانهم بحاجه لحنان الام ومحبة الاخوان ولا تخلين الشيطان


يكبر المسأله ويصعبها ولو كل اسره تبنت لها طفل كان ما تلاقين دورا يتام والله الامر

سهل بس الشيطان يصعبه على الناس ( هذا كلام الام )


المهم شكرتها وقلت لها إني سعيده بالجلسه معكم بس ابقوم لا يجي ابوكم .

قالت الام إن شاء الله نشوفك مره ثانيه في الحديقه لاننا نبي نجي عشان عبدالملك
شوفيه مبسوط مع أخوانه والله ما جينا إلا عشانه .

قمت من عندها وانا والله اغبطها ام لسبعة ابناء اكبرهم بنت في الثانوي وموظفه

وتعاني من الم في الاقدام ومع رفض زوجها الا انها اصرت واراد الله لها الخير لما

شاف منها صدق النيه .

وصار على ذا القصه اسبوع وانا كل من شفت قصيتها عليه.

قلت يابنت ما باقي إلا منتدى بني زيد الغالي اكتبيها لعل يكون فيها الخير المرجو منها

والتشجيع لنفسي اولا ولغيري بفعل الخير والحث على الرحمه بالأيتام والفقراء

والمساكين .



وفي الختام العذر والسموحه على كثر البربره وشين الاسلوب



وادعوا معي إن الله يوفق ذا الحرمه ويجزاها خير ويكثر من أمثالها ويعطينا إللي

عطاها قولوا امين


وبس كتبتها بإلاسلوب العامي لتكون اقرب لنفوسكم .

وعسى مشرفين القسم يرضون بس

وما يقولون لا عاد تعيدين لها

احبكم في الله


لمن اراد المساهمة في كفالة يتيم

 

الرد مع إقتباس
  #2  
قديم 20-05-2009, 11:35 PM
الصورة الرمزية لـ سيف شامان
سيف شامان سيف شامان is offline
 






سيف شامان is a jewel in the roughسيف شامان is a jewel in the roughسيف شامان is a jewel in the rough
 

 

السلام عليكم



والله يا وخيتي أني أتشاور أنا وأبو الريم في الموضوع أكثر من مره وش نسوي به

العضو من مرتادي القسم الدائمين والموضوع يكون أحياناً دون المطلوب ( وهنا نقع في حرج ) وأحيانا يكون يغرد خارج السرب يعني نسخ ولصق بالإخطاء الإملائية ولا مصدر وأحيانا يكون الموضوع تحذير من شيء وعند البحث عنه نجده في الأنترنت من عام 2003 !!! وكثيراً ما يكون الغرض زيادة عدد المواضيع ..

وهذا سبب إختفاء الردود في المواضيع !!

وما إجتهادنا في الحرص على محتوى الموضوع إلا حرصاً على أن يكون محتوى القسم في مستوى تطلع القارئ .. وحتى يتسنى له الرد على المواضيع ومناقشتها .. تدفق المواضيع بغزارة في القسم ليس من صالحه ..

ولك ِ وللجميع / المنتدى منتداكم فلا تضعونا في الموقف المحرج معكم ..

عموماً موضوع مميز جداً .. وتاج رأسه أنه لم يذيّل بكلمة منقول ..

إسعي في نشره .. لعلك ِ تنالين منه الأجر ..

وإن كُتب لنا عمر .. سنجده بعده مده في هذا القسم تحت كلمة منقول ..


سلمت يداك ِ ولعل هذا الموضوع يوقض في الضمائر شيئاً من طرق البحث عن الأجر ..

وفقك الله ..

 


::: التوقيع :::

أنت الزائر رقم


لمواضيعي ومشاركاتي ..


 
الرد مع إقتباس
  #3  
قديم 21-05-2009, 12:06 AM
الصورة الرمزية لـ عبدالعزيز عبدالله الجبرين
عبدالعزيز عبدالله الجبرين عبدالعزيز عبدالله الجبرين is offline
مشرف القسم العام
 






عبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of light
 

 

بارك فيك يااوخيتي على الموضوع الاكثر من رائع

والاسلوب الذي خرج من القلب ودخل الى قلوب وافئدتنا مباشرة

وتسلمين على على القصة اللي ان

شاءالله تنالين عليها الاجر فكلما تبنى احد ممن اطلع عليها اوذكرت له ستحصلين على

الاجر ان شاء الله

وبالنسبة لانتقاداتك للوضع في القسم فهي محل دراسة ونتقبلهابصدر رحب والله

يعينا على ارضاء الجميع وعمل مايسرهم

 


::: التوقيع :::

اللهم أسالك ان ترحم والدتي وشيخنا ابن جبرين و تغفر لهما ولجميع المسلمين انك سميع مجيب



 
الرد مع إقتباس
  #4  
قديم 21-05-2009, 12:07 AM
الصورة الرمزية لـ شوووق الاحباب
شوووق الاحباب شوووق الاحباب is offline
عضو مثالي
 





شوووق الاحباب is on a distinguished road
 

 


وفي الختام العذر والسموحه على كثر البربره وشين الاسلوب
بالعكس اختي والله وش زينه اسلوبك
ومشكوووووووووووره على القصه الممتعه والمؤثره والله يجزاك الخير

 

الرد مع إقتباس
  #5  
قديم 21-05-2009, 05:15 AM
الصورة الرمزية لـ الـــنمر
الـــنمر الـــنمر is offline
محاور متميز
 





الـــنمر is on a distinguished road
 

 

ماشاء الله بارك الله فيها وفيك


اسلوب ممتاز وقصه ممتازه


اذا فيه قصص غيرها هاتيها

 


::: التوقيع :::

انا من داورد يكفيني هواها ------ ويبري لوعتي شربي لماها


 
الرد مع إقتباس
  #6  
قديم 21-05-2009, 05:39 AM
الصورة الرمزية لـ شَهرزاد بَنيّ زيد
شَهرزاد بَنيّ زيد شَهرزاد بَنيّ زيد is offline
يَمامة
 





شَهرزاد بَنيّ زيد is a jewel in the roughشَهرزاد بَنيّ زيد is a jewel in the roughشَهرزاد بَنيّ زيد is a jewel in the rough
 

 

تسلمين / ذِكريات


خطوة رائدة ..للقسم العَام حجب المنقول حتى أجل مُسمى !

؛
أنَا أتساءَل : هل تواجد اليتيم في كنف العَائلة إلى حدّ مُعين أم انه يستمر
مع العَائلة الكافلة ..الى أنّ يشاء الله ؟

 


::: التوقيع :::

مَا أسهل الكَلام .. !


 
الرد مع إقتباس
  #7  
قديم 21-05-2009, 05:46 AM
الصورة الرمزية لـ برق الحياء
برق الحياء برق الحياء is offline
مزيون بيرق
 





برق الحياء is on a distinguished road
 

 

يعطيك العافيه على الموضوع وجعله من موازين حسناتك

والله يكثر من امثال ذا الحرمه الطيبه

 

الرد مع إقتباس
  #8  
قديم 21-05-2009, 07:18 AM
الصورة الرمزية لـ الأترجّة
الأترجّة الأترجّة is offline
عضو متميز
 





الأترجّة is on a distinguished road
 

 

عادة ما احب أقرأ المواضيع الطويلة

لكن موضوعك شدني وبدون ما أحس قريت الموضوع كله وكنت أتمنى له بقية !

الله يكثر من أمثال هالحرمة ويوفقها للخير !

والله يوفقك ويزيدك من فضله ويسعدك يالغالية

 

الرد مع إقتباس
  #9  
قديم 21-05-2009, 07:23 AM
الصورة الرمزية لـ الأترجّة
الأترجّة الأترجّة is offline
عضو متميز
 





الأترجّة is on a distinguished road
 

 

إقتباس
المشاركة الأصلية بواسطة شهرزاد


؛
أنَا أتساءَل : هل تواجد اليتيم في كنف العَائلة إلى حدّ مُعين أم انه يستمر
مع العَائلة الكافلة ..الى أنّ يشاء الله ؟

تفضلي شهرزاد هذي قصة وحدة من الجماعة وجدت يتيم عند باب منزلها ( فيها الكثير من العضة والعبرة !)
(قصة) ماذاستفعل/ين لو كنت/ـتِ مكان أم عبدالله !؟أرجو من المشرفين عدم حذف الصور!

 

الرد مع إقتباس
  #10  
قديم 21-05-2009, 11:14 PM
الصورة الرمزية لـ ذكريات الطفوله
ذكريات الطفوله ذكريات الطفوله is offline
 





ذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of light
 

 

إقتباس
المشاركة الأصلية بواسطة سيف شامان
السلام عليكم



والله يا وخيتي أني أتشاور أنا وأبو الريم في الموضوع أكثر من مره وش نسوي به

العضو من مرتادي القسم الدائمين والموضوع يكون أحياناً دون المطلوب ( وهنا نقع في حرج ) وأحيانا يكون يغرد خارج السرب يعني نسخ ولصق بالإخطاء الإملائية ولا مصدر وأحيانا يكون الموضوع تحذير من شيء وعند البحث عنه نجده في الأنترنت من عام 2003 !!! وكثيراً ما يكون الغرض زيادة عدد المواضيع ..

وهذا سبب إختفاء الردود في المواضيع !!

وما إجتهادنا في الحرص على محتوى الموضوع إلا حرصاً على أن يكون محتوى القسم في مستوى تطلع القارئ .. وحتى يتسنى له الرد على المواضيع ومناقشتها .. تدفق المواضيع بغزارة في القسم ليس من صالحه ..

ولك ِ وللجميع / المنتدى منتداكم فلا تضعونا في الموقف المحرج معكم ..

عموماً موضوع مميز جداً .. وتاج رأسه أنه لم يذيّل بكلمة منقول ..

إسعي في نشره .. لعلك ِ تنالين منه الأجر ..

وإن كُتب لنا عمر .. سنجده بعده مده في هذا القسم تحت كلمة منقول ..


سلمت يداك ِ ولعل هذا الموضوع يوقض في الضمائر شيئاً من طرق البحث عن الأجر ..

وفقك الله ..


اشكرك اخ سيف جزيل الشكر على تشجيعك وحرصك للمشاركات الغير منقوله

والحرص على اثراء القسم بما هو جديد

والله يعينك وباقي المشرفين ويقويكم

جزاك الله خير اخوي

 

الرد مع إقتباس
  #11  
قديم 21-05-2009, 11:21 PM
الصورة الرمزية لـ ذكريات الطفوله
ذكريات الطفوله ذكريات الطفوله is offline
 





ذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of light
 

 

إقتباس
المشاركة الأصلية بواسطة عبدالعزيز عبدالله الجبرين
بارك فيك يااوخيتي على الموضوع الاكثر من رائع

والاسلوب الذي خرج من القلب ودخل الى قلوب وافئدتنا مباشرة

وتسلمين على على القصة اللي ان

شاءالله تنالين عليها الاجر فكلما تبنى احد ممن اطلع عليها اوذكرت له ستحصلين على

الاجر ان شاء الله

وبالنسبة لانتقاداتك للوضع في القسم فهي محل دراسة ونتقبلهابصدر رحب والله

يعينا على ارضاء الجميع وعمل مايسرهم


مشكور ابو الريم ولا شك إنك تتاثر بمثل ذا القصص لاننا نحسبك والله حسيبك ولا نزكي على الله احد من اصحاب تلك القلوب الرحيمه إن شاء الله


ولكن ابيك تعرف أني ما كنت منتقده ابدا بل بالعكس يسرني حرصكم على إثراء القسم وتطويره وشاكره لكم طول بالكم وسعة صدوركم

جزاك الله خير

 

الرد مع إقتباس
  #12  
قديم 21-05-2009, 11:24 PM
الصورة الرمزية لـ ذكريات الطفوله
ذكريات الطفوله ذكريات الطفوله is offline
 





ذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of lightذكريات الطفوله is a glorious beacon of light
 

 

إقتباس
المشاركة الأصلية بواسطة شوووق الاحباب

وفي الختام العذر والسموحه على كثر البربره وشين الاسلوب
بالعكس اختي والله وش زينه اسلوبك
ومشكوووووووووووره على القصه الممتعه والمؤثره والله يجزاك الخير


هلا بشوق الاحباب

واشكرك على المجامله

مشكوره

 

الرد مع إقتباس
  #13  
قديم 21-05-2009, 11:41 PM
الصورة الرمزية لـ إكليل الورد
إكليل الورد إكليل الورد is offline
مشرفة قسم اسـرتي وصـحتـي
 





إكليل الورد is a jewel in the roughإكليل الورد is a jewel in the roughإكليل الورد is a jewel in the rough
 

 

إقتباس
(وين بناتنا اللي الوحده يالله تغسل لاخوهااواختها هاذا إذا تفضلت على امها الله

المستعان وهم كل وحده في الموضه والتلفزيون ومتاع الدنيا الفاني )


يعطيك العافيه خيتو ذكريات الطفوله . . .

على هالقصه والله أسأل أن يقذف في قلوبنا الرحمه . . .

 


::: التوقيع :::

ما لنا غيرك يا الله !


 
الرد مع إقتباس
  #14  
قديم 21-05-2009, 11:47 PM
الصورة الرمزية لـ صفاء
صفاء صفاء is offline
عضو v.i.p
 





صفاء is on a distinguished road
 

 

تسلمين ياذكريات على القصه المؤثره 00ماشاء الله عليها يابختها بالأجر 00

 


::: التوقيع :::

استغفر الله العظيم من كل ذنب واتوب اليه


 
الرد مع إقتباس
  #15  
قديم 22-05-2009, 04:21 AM
الصورة الرمزية لـ عز بني زيد
عز بني زيد عز بني زيد is offline
محاور متميز
 






عز بني زيد will become famous soon enough
 

 

مشكوره على سرد هذا الموقف

والله لقد ربحت هالقصيمية

ومن يعمل عملها فنيته صافية ويطلب رضا الرحمن

( والراحمون يرحمهم الرحمن )

قصة عجيبة ويندر وجود أبطالها

أقرأ حرص القصيمية على كفالة اليتيم وأتعبر وتدمع عيناي يبدو أننا لا نرغب بالأجر ومجاراة الرسول صلى الله عليه وسلم بالجنة

عيالي ما أتحملهم فكيف أكفل يتيم واحد

ياليت الواحد منا لو يكفل يتيم واحد بالمال والهدية والزيارة والتعرف عليه والسؤال عنه والعيدية

طوبا للقصيمية وزوجها وأبنائها

ذكريات الطفولة تفضلت علينا بنزف قلمك

الا على فكرة لازم تسألين عن حال هالعائلة المادي هل هم محتاجين وعلى قد حالهم
على شان تقدم لهم المساعدة من خلال هذا المنتدى وبمعرفتك
وهذا باب أجر لا تحرمينا وياك منه

جزاك الله خير وكثر الله من أمثالك

 


::: التوقيع :::


:: أبو عبدالعزيز ::


 
الرد مع إقتباس
المشاركة في الموضوع


خيارات الموضوع
طريقة العرض

قوانين المشاركة
لا بإمكانك إضافة موضوع جديد
لا بإمكانك إضافة مشاركات جديدة
لا بإمكانك إضافة مرفقات
لا بإمكانك تعديل مشاركاتك

كود [IMG] متاح
كود HTML غير متاح
Trackbacks are غير متاح
Pingbacks are غير متاح
Refbacks are غير متاح

 
جميع الأوقات بتوقيت السعودية. الساعة الآن » [ 08:23 AM ] .


Powered by vBulletin Version 3.6.4
Copyright ©2000 - 2019, Jelsoft Enterprises Ltd.
SEO by vBSEO 3.1.0 ©2007, Crawlability, Inc.
حقوق كل مايعرض في هذا المنتدى محفوظة لمنتدى بني زيد
www