البطاقه الائتمانيه‎

اليوم بتكلم عن البطاقه اللي تاكل راتبك ومبلغها تافه وقسطها عالي <= وخسيسه وقليله ادب
بطاقه ائتمان أو كريدت كارد او فيزا او ماستر كارد او اميركان اكسبريس .. كللها اسماء لنفس البطاقه
























هذا الايميل موجه لكل شخص يفكر ياخذ هالبطاقه أو عنده هالبطاقه
بحكم عملي السابق في احدى هذه الشركات ... فأنا ابغى ابري ذمتي وابين لكل شخص وش هي هالبطاقه اللي يتعامل معاه
وكل شخص يصل له هالايميل بيكون عرف اش هو يتعامل معاه وهو وذمته!!

اولا : طريقه عمل البطاقه :-

يعطيك البنك بطاقه يكون فيها مبلغ من البنك .. مثلا 10 الف او اكثر ... ويسمح لك تستخدمه براحتك وتشتري فيه
اخر الشهر البنك يرسل لك الفاتوره او الكشف .. فيه كل المبالغ اللي انت استخدمتها.. ويطلب منك تسدد 5% بس!!
طيب وش مستفيد البنك ؟ يسلفك علشان سواد عيوونك ؟؟
لا يقول لك بياخذ عليك فوائد 2 – 2.5 % على المبلغ اللي انت استهلكته
طبعا علشان تكون في الصوره الفوائد ربا صريح !! والكل يعرف حكم آكل الرب

ثانيا :ضرر البطاقه:-

البطاقه ما احد يختلف عن حكمها دينيا !! علشان كذا ببين اضراارها الماديه
انت لما تدفع .2.5% بالشهر .. معناته انك تدفع30% سنويا !!
طبعا بالفوائد المركبه تكون تدفع اكثر لأنهم يسمحون لك تستخدم اللي انت سددته
طيب متى بخلص مسددهم وانتهي ؟؟
الجواب ما راح تخلص.. لأنك تسدد 5% وياخذون منها2.5% فوائد لهم !!
انت تسدد 500وهم ياخذون 250 فوائد لهم !!
وال250 اللي سددتها تستخدمها مره ثانيه
يعني اخر السنه تكون دفعت 3 الاف هديه لهم علشان يسلفونك 10الاف
وتكون ايضا اتخلصت من قسط شهري يشاركك براتبك
طبعا ضربت المثال على مبلغ بسيط 10 الاف ... مع ان فيه بطاقات كثير تتعدى هالمبلغ
على فكره ترا في رسوم ثانيه ما تكلمت عنها اللي هي اذا اتعديت الحد او اذا ما سددت شهر او اذا سحبت منها كاش

ثالثا : انت متوهق بالبطاقه الحين.. كيف تتخلص منها :-

اول خطوه تجيب مقص !! وتقطع البطاقه!!لأنك كذا تكون وقفت الاستهلاك
ثانيا تجمع كل الكاش اللي حولك وتقتر على نفسك هذا الشهر ولو تقدر اتسلف من اقاربك وسدد اكبر مبلغ تقدر عليه
هذا تصرف تسويه هالاسبوع .. قبل تنزل عليك فوائد
يعني لو عليها
10 الاف وقدرت تجمع 5 او 6الاف ... راح تكون قدرت تتخلص من جزء كبير من المشكله
واول ما ينزل راتبك الشهر اللي بعده .. تحاول تدفع كل اللي ما تحتاجه ضرووري فيها ...
ولو قدرت تسدد كل المبلغ الباقي يكون بركه ..او تسدد 2500 هالشهر ...
وتكمل 2500 مع الفوائد الشهر اللي بعده
التزم بالخطه وتكون تخلصت منها في 3 شهور !!
وبكذا تكون تخلصت من البطاقه نهائي
طيب لو بطاقتك عليها 20 او 30 الف ؟؟ ولا تقدر تدفعها كللها ؟
الحل انك تاخذ قرض عادي من البنك مدته سنتين بس ..ولو عندك قرض من اول حاول تجدده وتسدد البطاقه
مع اني ما انصح بتجديد القروض .. بس البطاقه ضررها اكبر بكثيييير
على فكره
القرض على سنتين فوائده 4% سنويا تقريبا مقارنه بالبطاقه اللي تاخذ 30% سنوي
وطبعا اذا خلصت البطاقه روح البنك والغيها وخذ ورقه مخالصه

وبكذا تكون ريحت بالك ووفرت فلوسك ..ال3 الاف اللي تدفعها فوائد روح مشي بها عيالك ..
وديهم للطايف خللهم ياكلون برشومي ويرجعون
ولا اشتري فيها شي لنفسك .. اتدلع ب3 الاف سنوي
اشتر هديه لأم العيال

رابعا : البطاقه ما استغني عنها.. تفك لي زنقات اخر الشهر :-

طيب يالغالي .. انت لما تخلص البطاقه وترتب امورك .. حط لك 5 الاف في حساب منفصل
سميه "توهيقه اخر الشهر”
واذا مررررره انزنقت اخر الشهر لو اسحب منه شوي ..واذا نزل الراتب علطول روح سدده كأنه بطاقه ورجعه 5الاف
او سدد 5% منه عالاقل
طبعا الاقساط بتكون اقل لأنك اذا سددت 5%راح تحسب لك كللها دفعه ما راح ياخذوا منها 2.5%

ختاما: اذ انت تحتاج البطاقه للسفر او للشراء من الانترنت :-

طلع لك بطاقه فيزا وخلي حدها مثلا 3الاف
واذا بغيت تسافر سدد فيها قبل السفر المبلغ اللي تبي تصرفه
وروح هناك واستخدم على كيفك
وكل هذا بدووون فوائد ولا هلله
ولو استخدمت شي من فلوسهم سددها اول ما تصدر الفاتوره او الكشف.. ولا ياخذون عليك فوائد ولا هلله !!

في الختام
ارجوا منكم صادق الدعاء
واتمنى منكم التفكير بالموضوع بمنتهى الجديه
من وصلت له هالرساله فقد وصله البلاغ
اللهم هل بلغت
اللهم فاشهد
جزا الله خيرا من نشره

من بريدي وياليت تعطوناوجهة نظركم خصوصاً اللي جربوها اوالعاملين بالبنوك

محبكم ابوالريم

مشكووووور اخوي على الموضوع

انا ماخذتها اجربها واكشخ بها اثرها حقت دييون

ان شاء ابقصصها ,, كل ماسحبت منها سحبوا على كل عمليه 14 ريال

الله يجزاك خيير ..

حياكم الله والاهم الابتعاد عن هذه البطاقات والذي يجبر هناك بطاقة الراجحي

تعطيك وتخصم من راتبك فلايتراكم المبلغ عليك

الله يغنينا بحلاله عن حرامه وبه عمن سواه

طيب بطاقه الراجحي الائتمانيه‎ نفسها ؟؟

بطاقتي الراجحي لااقصصها واقعد بها فاهمه غلط

ثم اروح اطلعلي وحده وادفع فيها

بالنسبة لي استعمل بطاقة ماستر كارد حقت بنك الاهلي طريقتها:
تدفع رسوم وقدرها 100ريال سعودي يعطونك البطاقة ما فيها اي ريال عاد اذا بغيت تستعملها اشحنها.

مشكورين يا غاليين على مروركم و يارب ما انحرم من تواجدكم ...

باقة ورد احمر لكل منكم ...

السلام عليكم

إقتباس بطاقه ائتمان أو كريدت كارد او فيزا او ماستر كارد او اميركان اكسبريس .. كللها اسماء لنفس البطاقه

هذا يذكرني باللي يسمي البيبسي ، كوكا كولا

فيزا - ماستر كارد
شركات لنفس النشاط

المهم

البطاقة الائتمانيه ، صعب التعامل معها للناس اللي شغلهم مش حالك !
تحتاج لشخص دقيق ومرتب ومنظم

اما عن بطاقة الراجحي ،، فالبنوك كلها عندها نفس المنتج

بمعنى

ان فيه بطاقات اسلاميه ممكن تعطيك يوصل لما يعادل راتب واحد ويكون العقد ان السداد يكون كامل المبلغ المستخدم وبكذا مايكون فيها اي شئ من الناحية الشرعيه ، لان مافيها فايده مركبه او غير مركبه

بالنسبه للفيزا العاديه

فيه ثلاث طرق يخيرك البنك للسداد من خلالها

الاولى

كامل المبلغ

الثانيه

الحد الادنى للسداد ( نسبة معينه من حد البطاقه )

الثالثه

مبلغ معين لا يقل عن الحد الادنى

ويعطي البنك ثلاث تواريخ اختياريه لصدور الكشف والسداد بما يتناسب مع وضع العميل ( راتب هجري او ميلادي )

بحكم عملي في بنك

انصح ان البطاقة لا تستخدم الا في السفر فقط للفنادق وبعض المطاعم
والسداد يكون فوراً بعد الوصول بالسلامه

بالنسبه للرسوم

فيه رسوم السحب النقدي ، سواء من اجهزة صراف نفس البنك او اي صراف ثاني
وتختلف من بنك لبنك ، ولكن في الغالب لا تتجاوز 45 ريال للعملية الوحده ، سواء سحبت 100 ريال او 5000 ريال

،،،،،

احد اسرار النبوك :)

البنك يطاردك عشان تاخذ البطاقه ، حتى لو ماستخدمتها لان عنده ( تارقت ) او هدف معين بعدد البطاقات اللي لازم يبيعها عشان يحقق هدفه : )

وسلامة قلوبكم

لايفتى وفي المدينة مالك!

مهنا الغيهب حضرحضور الكبار