"شاعر الحب والحرب .. عبدالرحمن البواردي" a

آخر المشاركات المطروحة في منتديات قبيلة بني زيد

  اكفل يتيم مدى الحياة (صورة) ( آخر مشاركة : جبرين بن سعد الجبرين    |    بعض الطرق بالمذاكرة ( آخر مشاركة : نجم الصحراء    |    إجعل لك سبع سنابل ولوالديك ولكل من يعز عليك (صورة) ( آخر مشاركة : ساكتون    |    أسهل وأرخص طريقة ليكون لك صدقة كل يوم في مكة داخل حدود الحرم وانت مرتاح مكانك (صورة) ( آخر مشاركة : ساكتون    |    ب 50 ريال فقط سيكون لك أجر مليون شخص فرصة نادرة لاتعوض (صورة) ( آخر مشاركة : ساكتون    |    هل تريد أن يكون لك سقيا صدقة جارية كل يوم حتى وأنت نائم أجرك مستمر لايتوقف (صورة) ( آخر مشاركة : ساكتون    |    هل تريد أجر القائم المصلي لايفتر وأجر الصائم الذي لايفطر بإذن الله ( صورة) ( آخر مشاركة : ساكتون    |    المولودة ماجدة تنظم لأخواتها ليكونن تسعاً ( آخر مشاركة : طالب علم    |    هل تريد أجر تلاوة القرآن آناء الليل والنهار وأنت مرتاح في مكانك (صورة) ( آخر مشاركة : ساكتون    |    أدخل في 12 مشروع من مشاريع السقيا بأسهل وأسرع طريقة (صورة) ( آخر مشاركة : الجنرال    |   


العودة   منتديات قبيلة بني زيد > القسم الادبي > الـشـعـر الـنـبـطـي
التّسجيل   جعل جميع المنتديات مقروءة

"شاعر الحب والحرب .. عبدالرحمن البواردي"

المشاركة في الموضوع
 
خيارات الموضوع طريقة العرض
  #1  
قديم 12-01-2009, 05:56 PM
الصورة الرمزية لـ محمّد المنيع
محمّد المنيع محمّد المنيع is offline
شاعر الحرف الجميل
 





محمّد المنيع is on a distinguished road
 
"شاعر الحب والحرب .. عبدالرحمن البواردي"

 



بسم الله الرحمن الرحيم


هو الشاعر الفارس الأمير /
عبدالرحمن بن محمد بن عبدالرحمن بن عبدالعزيز بن ابراهيم البواردي

ولد في شقراء عام (1291 هـ)
وتوفي ـ رحمه الله وموتى المسلمين ـ في الرياض في شهر رمضان من العام (1361 هـ)
وقد تقدم المصلين عليه الإمام المؤسس / عبدالعزيز بن عبدالرحمن آل سعود.

له من الأبناء ثلاثة :
محمد ـ الأول ـ (توفي وله بنت)
والدكتور / محمد ـ الثاني ـ (إستشاري أمراض باطنية)
والأديب / سعد (وهو غنيّ عن التعريف)

وله من البنات خمس :
نورة ، حصة ، لطيفة ، هيلة ، الجوهرة.

كان مندوب الملك عبدالعزيز إلى حاكم الكويت (ابن صباح) مبشّراً ايّاه بفتح الأحساء عام 1331 هـ

قد تولي إمارة شقراء زهاء (22) عاماً خلال الفترة مابين 1340 هـ إلى 1361 هـ.

كما كانت له إمارة جباية الزكاة من البادية ـ الروقة من عتيبة ـ مدة (25) عاماً.

جمع بين الإمارة والفروسية والشعر ، وجمع في الشعر أجمل أغراضه ..
إن أردت الغزل وجدته في طليعته
وإن أردت الحكمة فهو من روّداها
وإن أردت أهازيج الحماسة والحربيّات ! فـ له "بيرقها"
كما كان له صولات وجولات في كل أغراض الشعر وطروقه.


وفيما يلي أتشرف بتقديم مالديّ من قصائد لشاعرنا




بطين الخفس
يامزنة(ن) من بطين الخفس منشاها=غضب(ن) رعدها ومن برّاقها خيفة
كل(ن) يناظر بعينه وين منشاها=فان الله اللي يصرّفها بتصريفه
هلّت على عسكر السلطان من ماها=يوم انها جت مقادمها على السيفه
دار(ن) لنا يوم جيناها وليناها=راح الكمندار منها خارب(ن) كيفه
عمارنا يوم جينا الكوت بعناها=نمشي وكنّا منادين(ن) على ضِيفه
بالشرع والسيف حنّا اللي حميناها=من كل راعي نفاق(ن) بيّن(ن) حيفه


الفشق والمارتين
لابتي خزنتي ما اصخي بها=للعدو محتزينه كحل عين
كحلها الملح عطّر جيبها=وازرق الحدّ والسيف السنين
فـ الحرايب تبين طيبها=حزّة الضيق تلقى المستحين
نجد عذرا حضر خطيبها=والجهاز الفشق والمارتين
عافت الشمري من طيبها=ماتبي غير امام المسلمين


الوعد ياسعد
ياسعد يابعد حي(ن) قعد=كيف تسهر وحنّا نايمين
أبتهج بالفكك يا بوفهد=جاك لطّام روس العايلين
الوعد ياسعد حسّ الرعد=من خشوم الموارت له رطين


نجد عذرا
دارنا منّاب معطينها=لاتهقوى دارنا ياشريف
نجد عذرا كاحلة عينها=من خطبها راح منها معيف
نجد يوم انه زهى زينها=ماتبي غير ابوتركي وليف


ياهل الديرة
ياهل الديرة اللي طال مبناها=مابلاد(ن) حماها طول حاميها
المباني تهاوي كل من جاها=مايفكّ المباني كود اهاليها
ديرة(ن) صار داها اليوم برداها=ماتصحّ البلاد وعيبها فيها
كان ماتفزع اليسرى ليمناها=فاعرف ان ماوطى هذيك واطيها
راعي البوق بالنيّات يلقاها=من حفر حفرة(ن) لازم يقع فيها


دارنا
دارنا فيك ماخنّا=خان بك قاطع الساقة
خان فينا وهو مِنّا=شرّع السيف باشناقه
للحرايب تبيّنا=قاطع الراس خلاّقه
والمخايِر ذلف عنّا=وآنس النفس بفراقه


اولاد زيد
يالابتي يا اولاد زيد=للبيض ويش اعذارنا
مافكّ من ظلم الرشيد=الا احتمانا دارنا
بالصمع ورهاف الحديد=امقلّطين اخيارنا
لي ساقو الجميع العنيد=سقنا عليه اعمارنا
بالحزم والراي السديد=يصلى المعادي نارنا
والرب يفعل مايريد=علاّم غيب اسرارنا
والموت با ارقاب العبيد=لو مانجي له زارنا


حمام الراعبي
دخيلك ياحمام(ن) ناح بالأغصان عنك دخيل=دخيلك ياحمام الراعبي مختلف الآسامي
عسى ربي يجيبك ياحمامة في محير السيل=تجين بحال خير ولا علينا حِسبة ايامي
تطيرين وتروحين وتجين وتاقعين بليل=فـ الى جيتي رميتك ياحمامة والله الرامي
عسى من لامني في حبكم يرمى بدرب الخيل=ثمان ايام حي(ن) مايذوق الما وهو ضامي
وشلت من الهوى حمل(ن) ثقيل(ن) مايشيله فيل=فـ الى منه عثر بي قالوا الحساد لا قامي
خطاة الرجل ماتاثق بسدّه كنّه الغربيل=يعلّم به ولو مانشد وش جاك من الاعلامي


واشيب عيني
ألا واشيب عيني من شهر شوّال شيباه=يفارقني عشيري كل ماجت هالليالي
يلوم القلب من لافارق احبابه بدنياه=عسى من لامني مثلي يفارق كل غالي
يزلّ الليل كنّي نيم وعيوني مشقّاه=على مضنوني الغالي خليفة من غدالي
ألا واصرم قلبي من هوى الخلان صرماه=ألا ما ابختك ياللّي عن هوى الخلان سالي


ياعونة الله
سلام الله على اللي كنّ ريقه من حليب النوق=إلى منّي شربته عن جميع الزاد يهجاني
ألا واسعد عين اللي تهيّا له بذوقه ذوق=يجيه امناه في الدنيا وصيور العمر فاني
عسى ربي يفكّه من تواعيس البلا والعوق=واسال الله له بالعافية لو كان ما اوحاني
تكاشف نور خدّه مثل مايكشف لميع بروق=إلى منه كشف روض(ن) سناه بغرّ الامزاني
ينسّف قذلة(ن) من فوق عنق(ن) زاهي(ن) بالطوق=والى منّه بدا بالهرج ! زاد الويل واحزاني
ألا ياعونة الله كنّ خلّي ما مشى بالسوق=ولا كنّا تواجهنا وحييته وحيّاني
ألا ياونّتي ماونّها مثلي ولا مخلوق=عسى من لامني في ونّتي ! يجيه ماجاني
أنا حدّرت للديرة ! وخلي سنّدوا به فوق=تعدّتني شفاة الروح يوم انه تعدّاني


يا يوه
يا يوه جرّيني عن شمس الضحى للظلّ=الموت عن مقعد الحقران اشوى لي
كم ثور هور(ن) بخبّ(ن) حاش له عندل=وكم طارد(ن) للهوى مانال مانالي
حمّلتني يالغضي حملين من كندل=ان شلت واحد ! فلا الثاني بمنشالي
والله ! والله ! وبحقّ الذي نزّل=صحايف الكتب ! والفرقان للتالي
يالك بقلبي محل(ن) حلّ ما ينحلّ=لو حلّ في ديرته رجف(ن) وزلزالي
خضعت لك خضعتين(ن) ذل قلبي ذل=خضعة مليك(ن) خضع من عمه الوالي


حمام الورقْ
حمامة(ن) لاجزاك الله بالاحساني=منتيب منّي بنوّ الخير مذكورة
ذكّرتني ياحمام الورق خلاّني=واودعت لي دمعة(ن) بالخد منثورة
والله يمين القطع عهد(ن) بعد ثاني=ياسكّر الشام ! بين شفاك يا نورة
يوم ان ربّي على ماراد مشّاني=طاوعت شور اللعين وطفّ لي شوره
تشوف ظبي المها يلعب بميداني=ومفرّع ريّها ماشفت له جوره
باطراف وشم الخشوم افراد حمراني=وبمفرق الراس مثل النجم مزروره
واقفت تمايح ردوف(ن) تقل نقياني=والاّ طعوس(ن) بنتها الريح مامورة
ولباسهن البتت وثويب سبهاني=وثياب جزّ(ن) على الامتان منثورة
الله يلوم الغضي يومه تباطاني=ماوسّع الصدر يوم الرجل مجبورة
ياونّتي يوم هاجد بالخبر جاني=ونّة معيد(ن) على المنحاة مصخورة
صحت عن النوم تالي الليل قزّاني=صوت(ن) على الطار شاله كل غندورة
أحبه الصبح وآحبه مسياني=واحبه الين طقّ العود كافوره


من دون في دون
يا زين انا افطر والجماعه يصومون=افطر الي مريت واقفيت عنّي
افطر وكل الناس ماهم بيدرون=افطر وانا ما أكلت زادٍ بسنّي
والناس يامضنون عيني ينامون=وانا طوال الليل يازين اونّي
عليك ياللي عندك القلب مرهون=وعيوني الثنتين له يسهرنّي
والحال من فرقاك من دون في دون=ولا محنك بحالك اللي محنّي
وكانك تغليتَ فترى الرزق مضمون=تجيني ارزاقي بليا تمنّي
غلاك في قلبي عن الناس مصيون=واخفيه بلساني إلى قمت اغنّي
ان متّ منك وصرت في القبر مدفون=فالروح عندك لو تغيّبت عنّي
وان جتك روح الروح خذها على الهون=ولا تعذبها إلى جتك منّي


يـ العين هودي
حمام ياللّي با لبساتين=يلعب طرب والهم ما جاه
هو معجبك قرع الدمامين=أو معجبك علاّل حنّاه
أو معجبك حضر(ن) مقيمين=هل القصور اللي مبنّاه
أو معجبك بدو(ن) مقفّين=يرعون برّاق(ن) نثر ماه
ذبحتني يا بو عكاكين=يا خالط(ن) ورده بحنّاه
ذبحتني واهلي مقيمين=واهلك ضعنهم ما لحقناه
عساك يالروضة تسيلين=والسيل يملى لي ركاياه
حيثك مقر دويعج العين=محبوب انا ما شفت حلياه
يالعين هودي لا تلجّين=صيري صبوره يا المشقاه


ضحيّ العيد
جرى الدمع من عيني على الخد وإنتثر=وبيح بسدّي ياهلي دمعها الجاري
سقى الله محبوب(ن) سقاني من الثغر=قراطيع من ريقه ولا احد(ن) عنه داري
أبو غرة(ن) توضي وطوق(ن) على النحر=وفي نضمها اللولو على دار ما داري
نطحني ضحيّ العيد بمشجر حمر=يجر الردايف جرة الحصن للقاري
أبو لبة عفرا كما دارة القمر=إلى شعشعت يسري على نورها الساري
أحب الخضر من حيث لي صاحب خضر=وأباهي بزينه جملة البيض وآماري
أنا اكره إلى طبّوا هل الغوص من السفر=وانا افرح إلى دقّوا هل الغيّ خمّاري
محمل غرامي دش في غبة البحر=يقفي ويقبل بين الأمواج سماري


وسمعتها هكذا أيضاً ..
أحب الخضر من حيث لي صاحب خضر=واباهي بزينة جملة البيض واماري
نطحني ضحيّ العيد واحدث معي كدر=ومن شوفته ياحمود انا ضاعت ابصاري
نطحني ضحي العيد بشجر(ن) خضر=يتل الراديف تلّة الحصن للقاري
أبو لبّة عفرا كما دارة القمر=الى شعشعت يسري على نورها الساري
ابو غرة(ن) توضي وطوق(ن) على النحر=وفي نظمها اللولو على دار ما داري
سقى الله محبوب(ن) سقاني من الثغر=قراطيع من ريقه ولا احد(ن) بها داري
يمشي على الاقدام من زايد الدجر=ويفرح الى دقوا هل الفن سمّاري
ومحمل غرامي دش في لجة البحر=يقفي ويقبل بين الامواج محتاري
علامه الى من شافني مقبل(ن) نفر=الى قلت قول(ن) قال ما ابيع يا شاري
عليه المشجر زاهي(ن) كنّه الزهر=ويمشي على هونه ولا هوب في كاري
الا واشقى قلبي من الولف لا ذكر=عشير(ن) يروف بحالي اليوم ويداري
انا انلام لا طّريت ثوبي من القهر=و يا حسرتي مشيت بين العرب عاري
انا كيف ابانسى حبتي له مع النحر=وبالليل انا وايّاه بوزار نيباري
قلت المواصل قال مانيب بذا البحر=تبدّلت عن خبرك ولا احب ذا الطاري
انا افرح الى دشوا هل الغوص للسفر=وانا افرح الى شالوا هل الفن خمّاري


العود الخضر
ياحسايف على العود الخضر=أنهصر في يمين اللي حناه
أنهصر جعل من جاب الخبر=يقطع الله من الدنيا رجاه
صاحبي كنه الظبي العفر=وآعسى الله يرعى من رعاه
لا تبيّن بخدّه للقمر=غاب نور القمر واظلم سماه
وان تبيّن على الشمس وظهر=غابت الشمس غاطيها سناه


يادر وين الظبا
البارحه ساهر(ن) والعين مسهرها=زول(ن) مع السوق بالمفرق تعداني
من يمّه النفس فيما فات قاهرها=واليوم خطر(ن) عليّ فرقاه تقواني
ما الوم عيني ولو هلّت عبايرها=من حرّ فرقا وليف(ن) لي تناساني
كن الرمد لابلينا في محاجرها=ماطبّق الجفن مع هجعات الاعياني
على وليف(ن) نظيف من جواهرها=يا حيف عقب الطرب والولف ينساني
ان قلت ينظر بحالي ما يناظرها=وان قلت يرحم يزيد الهجر هجراني
هو مالك الحال كاسرها وجابرها=وشفاي بشفاه وان شافاه شافاني
له عين سبحان خالقها وساطرها=سوّاه ربي على ما راد فرداني
رعبوبة(ن) كن الاثمد في نواظرها=من غير كحل(ن) هدبهن اسود قاني
الريح روضة يزيد انواج زاهرها=يسجع بها الطير ويغرد بالالحاني
يا نور شقرا ويا شمعة جزايرها=يا نقوة البيض من حضر وبدواني
فيها من الزين شارات(ن) أناظرها=حمره وعفره وزين اشباه والواني
يا نور بنّورة(ن) ما نيب قادرها=يوضي سناها ودونه حال بنياني
شهب اللوايح عسى نجم يحدّرها=واما كفى واحد(ن) يا الله بالثاني
سقوى الى جيت والي العرش دامرها=تصير لي مطّرق درب(ن) وميداني
واقول هذي ديار(ن) كيف ابنكرها=منزل حبيبي وحيّانه وحيّاني
يا دار وين الظبا اللي فيك خابرها=إدم(ن) وريم(ن) وعفري(ن) وغزلاني
منهن هنوف(ن) الى من قمت اناظرها=غضّت بصرها وتسحرني بالاعياني
احير باوصافها لا جيت اناظرها=لا رنق مشخص ولا نيره وحمراني
كنه من الحور والي العرش حادرها=يا قبلة الله ويا سيدي وسلطاني
والراس مجدول بملاقى خواصرها=تنثر عليه الرشوش اشكال والواني
انا هليك(ن) دريك(ن) من سعايرها=وراك ياسيّدي بالنار تصلاني
عليّ حجة ! فورّدها وصدّرها=ياويش الاسباب تنكرني وتجفاني
خف سامك العرش في نفسي وجابرها=ثم امش لي بالعدل وارفق على شاني
ما نيب عات(ن) عن السنه ومنكرها=ولا نيب مستبدل لي مذهب ثاني
ولاناب لي ملّة(ن) اخرى مظّهرها=ولايهودي ولا شيعي ولا نصراني
فان كان لا ذي ولا هاذي نقررها=بالصبر نصبر وصيور العمر فاني
وصلاة ربي عدد ما طار طايرها=على نبي الهدى وامر بالاحساني


ورا خلّك خضر
مرحبا بالخضر سيد الحضر=بو جبين(ن) كما خطّ الهلالي
يوم قالوا ورا خلك خضر=يحسبون الخضر ماهوب غالي
لو يباهي بخده للقمر=غاب نور القمر يا همّلالي
ياهوى الروح بيّحت الصبر=يابعد حالي وغالي حلالي
ان مشى لابس الثوب الخضر=طاح ما في يدي واعزّتالي
يوم انا وانت من خامس شهر=ما جفيتك ولا بان الجفا لي


الغاويات
فز قلبي فـز قلبـي=يوم شاف الغاويـات
الثنايا نظـم لولـو=بالمبيسم شارعـات
صاح مصلوب الحنيّه=والعـذارى نايمـات
الغضي واحلو شيّـه=بالأمـور الهينـات
الخوي يذكر خويّـه=ساعة(ن) قبل الممـات
ياعلي ليتك تشوفـه=عنقها عنق المهات
طقت العذراء دفوفه=ولعت قلبـي ومـات




وهَذِهِ مَطَالِع لِمَجمُوعَة من قَصائد الشَاعِر / عبدالرحمن البواردي

أعِدُكُم بإذنِ الله أن تَرونَها قريباً في هذا المُتَصَفِّح




وضّاح الانيابي
ياملّ عين(ن) هواها كل مزيونة=مفتونة(ن) فيك ياوضّاح الانيابي


ارض الحقاقة
مزنة(ن) تطّحن بـ ارض الحقاقة=برقها يرهق ! وغضبن رعدها


حقوق المزن
يالله انا طالبك رايح=من حقوق المزن تنشي به


الطرف
حنّا نزلنا الطرف=فوقه بنينا الخيام
نرتاح عقب الصلف=ما احلى عليه المقام


غرسة الساقي
ألا حسبك الله ياحمام(ن) يجر غناه=على غرسة الساقي يغرّد بـ الالحاني





ملاحظة
مجموعة من القصائد السابقة أوردها بعض الرواة بـ اعتبارها تنتمي لشعراء آخرين
ولكن ..
كل القصائد ! إعتمدت في روايتي لها هنا على سند مُعتبر ! يبرر نسبتها للشاعر عبدالرحمن البواردي .. ولايعني قطعية ثبوتها له.





 


::: التوقيع :::

اللَّهُمَ اِجْعَلْ خَاَتِمَتِي كَخَاَتِمَة وَاَلِدِي .. وَاجْمَعنِي بِهِ فِي دَار رَحْمَتِكْ


 
الرد مع إقتباس
  #2  
قديم 12-01-2009, 10:26 PM
الصورة الرمزية لـ المسافر
المسافر المسافر is offline
أبـو كـادي
 





المسافر has a spectacular aura aboutالمسافر has a spectacular aura about
 

 

يعطيك العافية ابونجد

على هالموضوع الجميل

وشكرا لك على جهودك في اثراء المنتدى

تقبل تحياااااااااااااتي

 


::: التوقيع :::



 
الرد مع إقتباس
  #3  
قديم 12-01-2009, 11:32 PM
الصورة الرمزية لـ الشاعرة
الشاعرة الشاعرة is offline
عضو مستمر
 





الشاعرة is an unknown quantity at this point
 

 



كل الشكر لك أبو نجد على موضوعك المميز

أتحفتنا بمعلومات شيقة جداً

طابت يمينك ..؛

/
\
/


 

الرد مع إقتباس
  #4  
قديم 13-01-2009, 12:09 AM
الصورة الرمزية لـ محمد بن صقيران
محمد بن صقيران محمد بن صقيران is offline
شاعر بني زيد
 





محمد بن صقيران is on a distinguished road
 

 

هذا الفرق

قصيد يطير النوم من باغيه

اشهد بالله اني استمتعت بها المتصفح الدسم

روعة القصائد من روعة اسم القائل والناقل

متصفح ساعود اليه حتما ,, وحتما ساجد زاويا اخرى للمتعة

ابو نجد

لا شلت يمينك على اتحافنا بهذه الدرر التي اعادت نبض الشعر في وجداني

دمت هكذا ( محمد المنيع )

لك كل التحايا

شعيل

 


::: التوقيع :::

[img][/img]
قصر واسط


 
الرد مع إقتباس
  #5  
قديم 13-01-2009, 12:30 AM
الصورة الرمزية لـ دانية
دانية دانية is offline
تتوشحُ الصمتَ عطاءً
 





دانية will become famous soon enough
 

 

متصفح قيّم أستمتعت به


تحية تشبهك يا أبو نجد

 


::: التوقيع :::

اللهم إجمعنا في الجنة


 
الرد مع إقتباس
  #6  
قديم 13-01-2009, 12:34 AM
الصورة الرمزية لـ عبدالعزيز العماني
عبدالعزيز العماني عبدالعزيز العماني is offline
مدير النشاطات الخارجية
 






عبدالعزيز العماني has a spectacular aura aboutعبدالعزيز العماني has a spectacular aura about
 

 



بسم الله الرحمن الرحيم

شاعر وهامه رحمه الله .أبونجد طرح وافي وكافي لاعدمناك

 


::: التوقيع :::





 
الرد مع إقتباس
  #7  
قديم 13-01-2009, 07:57 AM
الصورة الرمزية لـ فهد العيسى
فهد العيسى فهد العيسى is offline
عضو v.i.p
 





فهد العيسى is on a distinguished road
 

 

رحمه الله شاعر الحب والحرب
فليس غريب على شاعر بقامة
عبدالرحمن البواردي رحمه الله وسكنة فسيح جناتة
والذي يعرفه الجميع هو شاعر الحماسة الحربية
بحق في تلك الظروف التي كانت تمر بها شقراء
على وجه الخصوص والجزيره عامة
ومن اشهر القصائد واقواها واجملها
والتي تغنت بها الجزيره

ياهل الديرة اللي طـال مبناهـامابلاد(ن) حماها طول حاميهـا
المباني تهاوي كل مـن جاهـامايفكّ المبانـي كـود اهاليهـا
ديرة(ن) صار داها اليوم برداهاماتصحّ البـلاد وعيبهـا فيهـا
كان ماتفزع اليسـرى ليمناهـافاعرف ان ماوطى هذيك واطيها
راعي البـوق بالنيّـات يلقاهـامن حفر حفرة(ن) لازم يقع فيها


وهي موضوعه في صدر مجلس الا مه الكويتي

اخوي أبو نجد الله يجزاك خير
على طرح سيره هذاالشاعر الكبير
ولا يستغرب من شاعر مثلك كل ما هو جزل ووافي
هذا وتقبل فائق الشكروالإمتنان مقرونا
بجزيل المحبة والإحترام

 

الرد مع إقتباس
  #8  
قديم 13-01-2009, 08:01 AM
الصورة الرمزية لـ سعد الحامد
سعد الحامد سعد الحامد is offline
ابو عبدالرحمن
 






سعد الحامد is a jewel in the roughسعد الحامد is a jewel in the roughسعد الحامد is a jewel in the rough
 

 

الله يابو نجد

رحم الله الفارس عبدالرحمن البواردي

الشاعر العذب والامير الكريم

كل الشكر لك اخي محمد

 

الرد مع إقتباس
  #9  
قديم 13-01-2009, 04:38 PM
الصورة الرمزية لـ طارق الحصان
طارق الحصان طارق الحصان is offline
:: أبو خيّال ::
 





طارق الحصان will become famous soon enough
 

 




هذا المتصفح ذهب إلى المُفضلة من قرائتي لـ اسم الناقل

لـ أنّه سيكون إحدى مدارسي الشعرية

سلمت يا رديف النقاء والابداع والانتقاء

 


::: التوقيع :::

جبت لـك ضيقتي دلّة ! وهـمّي قدوع \/\/\/ كيّفي مـن قراح الضيقة الصافية
واقدعي من هموم ٍ تضفي الجوع جوع \/\/\/ اقدعي يا هجوسي صحه وعافية


 
الرد مع إقتباس
  #10  
قديم 14-01-2009, 12:03 AM
الماصول الماصول is offline
شاعر
 





الماصول is on a distinguished road
 

 


جمع بين الإمارة والفروسية والشعر ، وجمع في الشعر أجمل أغراضه ..
إن أردت الغزل وجدته في طليعته
وإن أردت الحكمة فهو من روّداها
وإن أردت أهازيج الحماسة والحربيّات ! فـ له "بيرقها"
كما كان له صولات وجولات في كل أغراض الشعر وطروقه
.................................................. ....................
ياشاعر الحرف الجميل
لك الشكر الجزيل
وشاعرنا البواردى غنى عن التعربف
ولقد أحسنت اخراجا وتنسيقا
وشاعرنا يستحق هذا الاهتمام
وأنت أهل لهذا التنظيم والتنسيق
وغاية المتعة أن تقرأ هذه القصائد
التى تنم عن شاعرية فذة
ودهاء وحكمة ووطنية
واذا لم يقم مثلك بهذا فمن يقوم به
قريب منه (من البواريد)
من بلده شقراء
شاعر متميز وقادر على حسن الاختيار
أعانك الله

 

الرد مع إقتباس
  #11  
قديم 17-01-2009, 06:54 AM
الصييفي الصييفي is offline
:: شاعر متمكن ::
 





الصييفي will become famous soon enough
 

 

سلمت يا محمد على مجهودك

لقد جمعت هذه النوادر للأمير الشاعر

الغريب أن أكثر هذه القصائد نسمعها

و أحيانا نرددها دون معرفة قائلها.

فنشكرك على توريدها هنا و وضع الأمور في نصابها

بيض الله وجهك

لا هنت

 

الرد مع إقتباس
  #12  
قديم 08-01-2011, 08:03 PM
الصورة الرمزية لـ سيف شامان
سيف شامان سيف شامان is offline
 






سيف شامان is a jewel in the roughسيف شامان is a jewel in the roughسيف شامان is a jewel in the rough
 

 

لله درك يا شقران على هذه الروائع الأميريه

سلمت يمناك يا غالي

 


::: التوقيع :::

أنت الزائر رقم


لمواضيعي ومشاركاتي ..


 
الرد مع إقتباس
  #13  
قديم 09-01-2011, 01:46 AM
الصورة الرمزية لـ عبدالعزيز عبدالله الجبرين
عبدالعزيز عبدالله الجبرين عبدالعزيز عبدالله الجبرين is offline
مشرف القسم العام
 






عبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of light
 

 

وش خليت امير وفارس وشاعر الارحمة الله عليه وجمعنا به وبوالدينا في جنات النعيم

 


::: التوقيع :::

اللهم أسالك ان ترحم والدتي وشيخنا ابن جبرين و تغفر لهما ولجميع المسلمين انك سميع مجيب



 
الرد مع إقتباس
  #14  
قديم 11-01-2011, 12:58 AM
سعد صالح السيف سعد صالح السيف is offline
عضو v.i.p
 





سعد صالح السيف is on a distinguished road
 

 

يعطيك العافية

 

الرد مع إقتباس
  #15  
قديم 29-01-2011, 01:42 PM
طير النوايف طير النوايف is offline
عضو مشارك
 





طير النوايف is an unknown quantity at this point
 

 

امتعتنا
أمتعك الله بلباس الصحة والعافيه

ونتطلع لباقي القصائد وبالخص مزنتاً تطحن بأرضاً الحقاقه

 

الرد مع إقتباس
المشاركة في الموضوع


خيارات الموضوع
طريقة العرض

قوانين المشاركة
لا بإمكانك إضافة موضوع جديد
لا بإمكانك إضافة مشاركات جديدة
لا بإمكانك إضافة مرفقات
لا بإمكانك تعديل مشاركاتك

كود [IMG] متاح
كود HTML غير متاح
Trackbacks are غير متاح
Pingbacks are غير متاح
Refbacks are غير متاح

 
جميع الأوقات بتوقيت السعودية. الساعة الآن » [ 05:25 PM ] .


Powered by vBulletin Version 3.6.4
Copyright ©2000 - 2019, Jelsoft Enterprises Ltd.
SEO by vBSEO 3.1.0 ©2007, Crawlability, Inc.
حقوق كل مايعرض في هذا المنتدى محفوظة لمنتدى بني زيد
www