الأســـطورة ,

حلا بني زيد · #1 24-07-2008, 03:21 AM

وابتدت لحظة جفا وانتهت لحظه وصال
وانطفى نور السعاده و احسب أنه ضوا

ماتقبلت الفراق وما ليدي فيه حيله
آه لو ان الظروف المقبله تكشف قدرها

لو يعرف الشخص منّا وش مع الغيب ابيجي له
كان جنبنا المشاكل من قبل يوقع ضررها

ما هقيت الليله اللي جابت الفرقا طويله
لين صارت ليلة امس بعيني اطول من شهرها

والعذاب اللي يذوب بعين من يفقد خليله
عندي اكبر من عذاب العين لو تفقد نظرها

والحبيب اللي صدوده مثل مداته جزيله
صد عني واعرفه لو صد عن حاجه هجرها

كن روحي يوم حست في جفاه وصعب نيله
بشرتني بالضياع وشدة العزم لسفرها

ما رحمها من هلاك وما تقبّلها دخيله
تحتضر قدام عينه لين ماتت من قهرها

عاد ليت اللي ذبحها وارهب الموت بوسيله
ما دفن وجه الضحيه والسكاكين بنحرها

ليت قلبه يوم سوى فعلته كمّل جميله
لو غسلها من عروقه وبكفن صدره قبرها

من حفر بضلوع قلبه حفرةٍ تكفي قتيله
ليه ما يدفن قتيله بالضلوع اللي حفرها؟

اشتكيته للرفوف وللبراويز الهزيله
وانذعرت من النياح اللي سمعته في صورها

رحت اسولف للجبال الصم عن قصة رحيله
ما تركت متونها الا ينحت الدمع بصخرها

واحدٍ حقق جماله كذب اساطير الف ليله
يسكن السبع البحور ويحبس الحور بدررها

الدروب بكبرياها ترتجف تحته ذليله
والورود اللي تقبّل خطوته تنبت بأثرها

والغصون اليا بغاها تنثني له.تنثني له
والفياض ان حب ينثر عطرها يلمس زهرها

لو يصوّت للغدير المنجرف جفف سبيله
وان تبسّم للجبال الصامته نطّق حجرها

كل حاجه تستوي له. لي بغاها تستوي له
بالنظر واستغفر الله لو بقول : انه سحرها

ذاك لو بس يتمنا فاكهة شجرة ضليله
بس يفتح راحت ايده ويتساقط له ثمرها !

كن ربي سخر له المعجزات المستحيله
واصبح اسطوره وكل الالسنه تنقل خبرها

هان محجر دمع عيني لين جفّف سلسبيله
والتفت لأخير دمعه قبّلت يده ونثرها

دمعةٍ كن بشقاها يوم طاحت في شليله
جادلٍ جات بدويٍ تطلب الستر وسترها

له علي انه ليا من طاح من عيني تشيله
ولي عليه انه يرجّع لابتساماتي ثغرها

لو طعوني بالسكاكين بيده تشفي غليله
لاشتريها من عذابي وادفع بدمي مهرها

واطلبه ينهال فيني طعن لين يطيح حيله
بس لا يترك عيوني تنحرم نعمة بصرها

له بعيني مثل ما للطهر بالنفس الاصيله
تقطع يدين الردا لو مس شعره من شعرها

مابغيته غير دربٍ شتّت اقدام الدليله
مزنةٍ ما بللتني واستحيت اطلب مطرها

والعطايا من يدين الخلق للطالب قليله
والوهايب من يد الله للعباد اجل وأرها

وان نسيت اني زرعت العشق وحظوظي بخيله
ما نسيت ان العطايا تستحق اللي شكرها

صعب تلقى شخص وافي يجزي الطيب بمثيله
والعرب كد قالت ان : الناس ما تترك قشرها

لاحصل بالحب قسمه ولا جا لي مجال
غير أشوف معاند الجرح وعناد الدوا

حــــامد زيــد

سعد الحامد · #2 24-07-2008, 08:59 AM

إقتباس


	لو يعرف الشخص منّا وش مع الغيب ابيجي له كان جنبنا المشاكل من قبل يوقع ضررها

اي والله

صح لسان حامد زيد ولسانك حلا

نقل موفق جداً من اجمل ماقرأت لحامد زيد

تحيتي وتقديري

الصييفي · #3 24-07-2008, 11:06 AM

وان نسيت اني زرعت العشق وحظوظي بخيله
ما نسيت ان العطايا تستحق اللي شكرها

صح لسان الشاعر

و سلمتي على النقل

هذا الشاعر مبدع دائما

تحياتي

جووووووري · #4 27-07-2008, 01:23 AM

حامد زيد شاااعر مبدع

سلمت أناملك على النقل الرائع .

&حنايا الروح& · #5 27-07-2008, 07:30 AM

إقتباس


	ماتقبلت الفراق وما ليدي فيه حيله آه لو ان الظروف المقبله تكشف قدرها لو يعرف الشخص منّا وش مع الغيب ابيجي له كان جنبنا المشاكل من قبل يوقع ضررها

جابها والله !

رآئعه من روآئع حامد زيد !

حلا بن زيد ،،
سلِم بنانك ،،

احمد الجبرين · #6 31-07-2008, 03:04 AM

موضوع جميل

حلا بني زيد · #7 01-08-2008, 04:23 AM

راجية الجنان · #8 01-08-2008, 05:46 AM

تسلمين على هذا الاختيار

خيارات الموضوع
عرض نسخة للطّباعة ارسل هذه الصفحة لصديق
طريقة العرض
النمط الخطي التحويل إلى النمط الشجري التحويل إلى النمط المتطوّر