ديوان الشاعر بندر بن سرور ،،، a

آخر المشاركات المطروحة في منتديات قبيلة بني زيد

  ب 50 ريال فقط سيكون لك أجر مليون شخص فرصة نادرة لاتعوض (صورة) ( آخر مشاركة : ساكتون    |    هل تريد أن يكون لك سقيا صدقة جارية كل يوم حتى وأنت نائم أجرك مستمر لايتوقف (صورة) ( آخر مشاركة : ساكتون    |    هل تريد أجر القائم المصلي لايفتر وأجر الصائم الذي لايفطر بإذن الله ( صورة) ( آخر مشاركة : ساكتون    |    المولودة ماجدة تنظم لأخواتها ليكونن تسعاً ( آخر مشاركة : طالب علم    |    هل تريد أجر تلاوة القرآن آناء الليل والنهار وأنت مرتاح في مكانك (صورة) ( آخر مشاركة : ساكتون    |    أدخل في 12 مشروع من مشاريع السقيا بأسهل وأسرع طريقة (صورة) ( آخر مشاركة : الجنرال    |    أسهل طريقة لكي لاتفوتك صدقة عشر ذي الحجة خير أيام الدنيا (صورة) ( آخر مشاركة : ساكتون    |    أوقف برادة عنك أو عن والديك أو عن متوفى أنقطع عمله لتكون له صدقة جارية لاتنقطع (صورة) ( آخر مشاركة : ساكتون    |    وقف رسمي بمكة المكرمة داخل حدود الحرم حيث الحسنة بمائة ألف حسنة (صور ( آخر مشاركة : ساكتون    |    أرخص كفالة حجاج في السعودية لعام 1440هـ (صورة) ( آخر مشاركة : ساكتون    |   


العودة   منتديات قبيلة بني زيد > القسم الادبي > تراثيات وشعبيات وقصائد منقوله
التّسجيل   جعل جميع المنتديات مقروءة

ديوان الشاعر بندر بن سرور ،،،

المشاركة في الموضوع
 
خيارات الموضوع طريقة العرض
  #1  
قديم 27-04-2008, 06:12 PM
الصورة الرمزية لـ محمد بن عبدالله بن جثلان
محمد بن عبدالله بن جثلان محمد بن عبدالله بن جثلان is offline
رميزان
باحث في الأنساب
 





محمد بن عبدالله بن جثلان is on a distinguished road
 
ديوان الشاعر بندر بن سرور ،،،

 

بسم الله الرحمن الرحيم
السلام عليكم ورحمة الله وبركاته :
نعرض لكم ديوان يحتوي على اغلب قصائد
الشاعر المعروف بندر بن سرور ، رحمه الله

بندر بن سرور
الله من عين طرقها صواديف
عميت ويبسن بالعروق الصخافي
شفت ألوزا بالعين من عرض ماشيف
شفته وغيري من فطن له وشافي
وقت تغير فيه حتى العواصيف
جا في عواصيف الرياح اختلافي
شره قناطير وخيره مقاطيف
يفطن له اللي يرضع الديد غافي
كم واحد جاله زمانه على الكيف
واغترته نفسه يبا الجود وافي
يطلع مطاليع العلا بالسواليف
بين العذارى عد روحه سنافي
يفرح بهرج بالقفا يكره الضيف
قتات والقتات بالنار هافي
يعلق قصيرة علقة النار بالليف
عي ولد عي زنوده ضعافي
إن رخصت ألحذوه توفي عن الحيف
وان غليت الحذوه مشى اللاش حافي
يرقد ويلحق والدينه تخاليف
دايم ومرقد ميت النار دافي
هو مادرى إن الجود يبغى تكاليف
سهر الليالي مقبلات مقافي
يبغى يدين للعطايا مغاريف
ويبغى رجول ماتمل الوقافي
والصبر بنحور السنين الشواحيف
اللي قساها مثل حد الرهافي
مايقدرون الجود سود الأطاريف
مشاركة بيض النسا باللحافي
يقدر عليه اللي حكم نجد بالسيف
وأودع مباغيض القبايل ولأفي
عبد العزيز اللي يبث المصاريف
يجدع قناطير الذهب بالفيافي
يمشي على دربه جموع مراديف
نو تحدر ماه والجو صافي
يشدي لواقيط الزبيدي بعد ريف
ومما كسا البيدا تفيد الضعافي


(سر يقلم)
سر ياقلم مالي على الصبر طاقه
صبري تعدى الحد معاد ينطاق
أكتب لمثلي قصته واشتياقه
في خطك الواضح على بيض الأوراق
قصة حزين صافي الحر ذاقه
انا بذكره ماصله خاطري ضاق
باقو به الأصحاب والوقت باقه
وصار الضحية بين باير وبواق
يمشي وهو ماحس في كسر ساقه
أمسى على ساقين وأصبح على ساق
مهذي سواه الوقت شين اصطفا قه
الوقت لو يصفى لك أيام دراق
لاشك يامن معك عقل ولباقه
بنصحك كان انك للأمثال تشتاق
صادق رجال يعرفون الصداقه
يقفون صفك يوم يبسات الأرياق
ومن يرغب فراقك فعجل فراقه
جاز الذي يجزيك أفراق بفراق
يقوله اللي جاير الوقت عاقه
ولازال في غيبوبة الهم مافاق
حظه على اقشر شي للنفس ساقه
بقبور الإحياء ينتظر يوم الإطلاق
(المشاور غشاني)
من بلاد الشام جينا بالمكينة
فوق فرت ماتخثع بالطماني
يحتدي مثل الجمل تسمع رطينه
مع طمان القاع مثل الثعلباني
والشفير من المدارس مطلعينه
عيدهي يجدعه جدع الحصاني
قذلة الطربوش ناطلها يمينه
عن ظلام الليل شب الكهرباني
ماتجيه يسار رجله شوف عينه
غير يسر الطاركي باليماني
يوم قال له الخوي عاشت يمينه
شد رجله للكمك واحد وثاني
بالله انك تنصره من نصر دينه
ان عطى له مع غبا والا بياني
قلت يالمطنوخ انا عيني حزينه
عن شراب اللف ابيه وعنك كاني
قد رمى بالكيس قدمي قال وينه
دوك مابالجيب عن شي لهاني
يقصد الكبريت معي منه عينه
قد منا تلت غراميل متاني
قلت ثالث قال يالله لاتهينه
قلت خامس قال قير يطلب نقل ثاني
قالت واحد وألكمك ضام المكينة
قال لي من يرحم القاسي لياني
قلت والله يرحمونه صانعينه
قد زعلت من اللهيب اللي غشاني
قال ماتا ثق بذمه مقننينه
عن مشاور غير عرفي قد كفاني
قاطع عرقين مدري وين وينه
قد وصلت الأرض واسمع صوتا ثاني
يوم يرفع مواخره قو المكينة
يرتخي صدره وانا الشاور غشاني
قلت دوك اللف خابو شاربينه
غطني عن شوف شي قد غشاني
قال عن وقلت بأيا لحينه
قال قل ناسي خوي مانساني
قلت عاش الشيخ واللي ناجبينه
عادة الطيب اليا جا الجد عاني

(صدر وردوف)
يابنت ياللي عمرها صدر وردوف
بيض محاجرها وحلو نباها
ودي بشوفك مير يوم اقصر الشوف
عيني بعد هاك الرمد قل ماها
سويت لي يابنت بالعين معروف
بأسباب رجل بعدتها خطاها
والا ترى قلبي ليا اصطك بالجوف
اومى بحالي لين تابس عصاها

( لاتجربونه)
ياهل الونيت اللي يبي مشتل البيب
مادق صدره بالخطوط الغزيره
يوم يتخثع مع محير الأداعيب
يشدي تخثع جادل في حريره
لاتجربونه مايبي الفرت تجريب
قد جربه بالبيت الأبيض خبيره
عدوه لابن حزام سيد اللواعيب
لعاب زينات البيوت العسيره
ثم قل لقاعد مانبي منه تدريب
الوقت دربنا على كل سيره
لو كل من قاد السبب يعلم الغيب
ياما كرهت النفس من باب خيره
ان قفت الأيام ماها مغاريب
واليا اقبلت يازين صافي غديره
قل له رميت الكيس بين الشواريب
واليوم ادوج مالقيت اتعميره


(لاتسقط شرفها)
الله من شي بحالي نحفها
من مالجى بالقلب حالي نحيفه
من كثر ماتكتم تزايد تلفها
بين كداها بالعروق الصخافي
كم واحد له حاجة ماصرفها
يصد عن صرافها لايضيقه
يخاف لايقضب نديم طرفها
قلبه صدى واطراف جسمه نظيفه
والله خلق بيد الذلول وعسفها
للي يبي المنهاج مثل القطيفه
والفضل للي مدها ماقصفها
وانهج من الدار المحل للمريفه
وانصحك ياللي غرته ماعرفها
شيب تشيب مايحول رديفه
رديفها يركض ويركز هدفها
وقت يقص العظم من حد سيفه
وان جتبك الدنيا وجابك صدفها
لاتعتزي بأهل النفوس الضعيفه
وأنصحك نفسك لاتسقط شرفها
ترى بعض بيض المجالس مجيفه


خبيث التجاره)
لاوالله الا طولن بالوقوفي
عيا يحملهن خبيث التجاره
بفلوسنا ياعبيد ماش معروفي
متى نجي ياعبيد مع خشم صاره
ياركب من فوق صاف البلوفي
مقعد امبير الزيت نيم الحراره
فراق مابين القلوب الولوفي
فرت كما وبل السحايب غباره


(شيب الفلاحي)
بديت ذكر اللي بسط سبع بوتاد
واللي رفع سبع بليا عمدها
والكار للي صار غيث للأجواد
لاقبلها صارت ولا من بعدها
زايد على كل العرب بالوفاء زاد
ساق المراجل لين وقف عددها
حلحيل حلو مر زراع حصاد
كبد يداويها وكبد لهدها
ولي عجوز من ورى شط بغداد
سمت على شيب الفلاحي ولدها
تبغاه يطلع مثل زايد ولا فاد
ماكل من هاز الطويله صعدها
ياشيخ انا جيتك على غير ميعاد
من خوف روحي لايجيها وعدها


(صنايع يهود)
الا يانديبي فوق دوج عليه شراع
ماقال انفخ التشريق جاء في مواصيره
ليا هبت العليا وقام العجاج وراع
يهيظك مع السكه تزاوغ معاصيره
صنايع يهود لايبدل ولا ينباع
يقربك من دار ويبعدك عن ديره
بعد ماطلعوه مشيك مايبي المرجاع
سمع من وراه الفوج غنت مواطيره
ليا دق سلفه قام صوته يرج القاع
ماجاه المعاون يشتغل في مساميره
عطاه اثنين وداس بلأبنص وفاع
رزيمه رعد مزن تهلع دناقيره
خرط له بثالث عقب نشه بعزم وزاع
شتله برابع مايضيع تغاييره
ليا شال عزمه ريحه آمن مارتاع
مسك مع يمين الخط ويلد لأنبيره
نص جو سمنه مايبطنج مع الأرواع
منصيه شيخ ماتبطل جزازيره
على سلم جده مايشاور ضعيف الناع
يدلك بفعله كاثرات دواويره


(حج الجمل)
انا ليامني نويت افتل البيت
فتلت والشعار ما ينقضونه
بينت راسي للمغني وغنيت
وين انت ياللي مرمسات ديونه
حج الجمل ياهل المثايل وحجيت
والناس راس العبد مايقطعونه
دوك السويتش وشغل الفرت يابخيت
وارد حفيز وكاملات فنونه


(عجل على المسجد)
ياكثر يافيحان صبر صبرناه
امس الشهر عديت باقي اسبوعه
لاتغبط اللي صار زوده بدنياه
يتبع هوى نفسه وغير طبوعه
مخطي طريق الحق غاد بعمياه
يجمع وصخ مال زوال نفوعه
اغبط تقي صار زوده بتقواه
عبد لصوت العبد يرخي سموعه
يفرح بصوت منادي الحق ناداه
عجل على المسجد بطيْ ركوعه
والا ترى الدنيا حدود مسماه
لابد مايقفي وتقفي زروعه


(دوك الفرت)
يامنير دوك الفرت واخذ الفواتير
وافحص عليه ودخله بالقراجي
اللي يبي بنزين ركب مواصير
واللي تبيه النار ركب بواجي
واليا ستعد وصخر البعد تصخير
تصخير شيهان لفرخ الزراجي
حده على اللي مايعد المخاسير
ركاز عمدان الخشب للنعاجي
ثم قل لبو بندر ترى وقتنا غير
تبدلت سحب المطر بالعجاجي
قومه عتيبه شيوخهم مابهم خير
لايدعي بشيوخ شيوخ الخراجي
نبكي سيوف سمرت نجد تسمير
تسمير عود الساج في عود باجي
حدن محمد ابن هادي ورى النير
والفرم محسن عقبنه سواجي
ربع رسو بين الحفيفين يامنير
ماسلمو لمدور الباج باجي
رحنا ندوج ونتسمى مناصير
نمشي على البيدا بليا مزاجي
متى يجي في نجد بعض التغايير
حتى يجي للصابرين انفراجي

تم ادخال بيت ليس من القصيده وهو:
ياناس خلوني على الأرض لاطير
لين اضبط البراد وآكل علاجي
لكي يظهر بندر وهو ليس في حالته
الطبيعيه عندما قال هذه القصيده..



(رجتني الأيام)
ياسخيف الذرعان ماني بمرجوج
رجتني الدنيا بغدر وحيله
يابنت لولا اللي على تاسع الفوج
تركت نجد وعزوة بالقبيله
لاشك حاديني على نجد هيدوج
مسقي الفيافي لين يدرج مسيله
تركي ليامن الليالي غدن عوج
حمله عتيبه كلها ماتشيله
يرسي كما مينا البواخر على الموج
ومنين ماصك البحر يرتكيله
مادام تركي حي ماودي ادوج
وان غاب غبت من الرجوم الطويله



(انحاس بالي)
انحاس بالي يامحمد وصديت
من كثر الصدات قلت شطونه
ماني وانا بندر بهيت ولد هيت
هيت يجامل خمة يكرهونه
من كثر ماجربت واقبلت واقفيت
قولة هلا لمن لايودك مهونه
سلط على النصراني اللي لقا الزيت
لعل نبع الزيت يعمي عيونه
لاشك تحتاج المراجل شفاليت
تحتاج شي يقصر النذل دونه
عزم على الفرجه وقطع الخلا الميت
حتى عيال البوم مايقطعونه
ثلاث*من كل المعاني تنقيت
واللي بقى كل الملا يقدرونه
مابغى جزاهن غير من خالق البيت
عمالهن للناس ماينفعونه



(بالسلك يندار)
يامنير عمر لي من التتن معمار
يبري الغليل اللي على القلب كالي
ولا رفعت الصوت وابديت ماصار
من شان تدري ويش ولا بحالي
مكفاك مني سجتي بعض الأمرار
انهج جنوب وحاجتي بالشمالي
اركض مع الدنيا كما ركض دوار
ياما كسب زندي وياما غدى لي
الله على اللي عايروها بالامتار
طراز بنج شغلت بالعدالي
زادو هواها واطعموها من النار
حتى امبير المنجضع عد صالي
نشت سما ماجربوها مع القار
طارت مطير الطير ربع الكحالي
تلفي على اللي في طرف هجر سنجار
يشدي جبل سنجار بين الجبالي
باطراف بيته للمواجيب شنكار
معلاق كبش عند راعيه غالي
ثم قل لبو بندر ترى الوقت دوار
يفطن تراني منفعه لو شكا لي
ان زان وقته صار بالسلك يندار
وان شان قص مروبعات الحبالي
كم واحد بين العماهيج هذار
مغترته نفسه بكبر الضلالي
يبلس على ربعه ويدنع بالأسوار
ويعد نفسه من حساب الرجالي
كفه بخيل وقلبه انجس من الفار
اسود طرف وادغم من السرمدالي
هذاك بعده خير ماكنت بختار
اجزاه بالصدات وابعد مجالي
ابعد مجال الرجل عن كل هذار
واصبر على الصكات والعمر بالي
وليا وطني غبر الأيام بأزوار
غيري جماعه ماوطني لحالي
شفت الوزا واشتلت لي منه قنطار
وان جيت اعدله شرق للغرب مالي
عبر على الدنيا من العسر لايسار
ماظنتي فيها حرام وحلالي
حرام للفنجال سوقه ليا فار
الا على اللي يرخصون الريالي
وانا اللذي ماقول في نجد شعار
وان كان به شعار محد حكى لي


(ذباحة التيس)
ياعنك ماتغنيك ذباحة التيس
ربع السعد مادام حملك خفيفي
واخير من هاك الوجيه المفاليس
البعد عن معروفهم لو تضيقي
يلحقك منهم بعض الأيام تنجيس
تاطا النجس لو كان ثوبك نظيفي


(يامشتري حظ)
يامشتري حظ جزى منه راعيه
ياسايم حظي تراني سموحي
ارخص عليك البيع ماني بمغليه
واشرط عليك انه سدوح لدوحي


هذه قصيدة قالتها ام بندربن سروربعد وفاته
طويت حبل الياس يابدر دونه
وجاني عليه من الأذى ماكفاني
في الليل جسمي مقلقاته همومه
والعين تسهر ماتذوق المنامي
عليه روحي يابسات شنونه
وحره على الضلع القصير كواني
امشي وقلبي يابسات غصونه
ومني صناديق الضماير حطامي
بلا مرض حالي تقول مهيومه
والكبد صامت عن لذيذ الطعامي
اللي عليه القبر ركزت وسومه
ولاعاد يمحى وسم حزنه دوامي
يابدر متى الوسم تدخل حتونه
من نو مزن مانشا بالغمامي
ابيه يزي القبر ماء مزونه
يزيه ربان السحاب الهشامي


انتهى،،،،
امل ان ينال اعجاب كل متذوق للشعر 0
وفقكم الله ،،،
رميزان

 

الرد مع إقتباس
  #2  
قديم 27-04-2008, 10:36 PM
الصورة الرمزية لـ رادار
رادار رادار is offline
 





رادار has a spectacular aura aboutرادار has a spectacular aura about
 

 

تسلم على النقل يا أبو عبدالله ,,

 


::: التوقيع :::

سبحان الله وبحمدة ,, سـبحان الله العظيم
دعواتكم : (


 
الرد مع إقتباس
  #3  
قديم 28-04-2008, 11:05 AM
الصورة الرمزية لـ المسافر
المسافر المسافر is offline
أبـو كـادي
 





المسافر has a spectacular aura aboutالمسافر has a spectacular aura about
 

 

ابو عبدالله

الله يعطيك الف عافية

على جهودك

تقبل تحيااااااااااااااااااتي

 


::: التوقيع :::



 
الرد مع إقتباس
  #4  
قديم 28-04-2008, 11:32 AM
الصورة الرمزية لـ محمد بن عبدالله بن جثلان
محمد بن عبدالله بن جثلان محمد بن عبدالله بن جثلان is offline
رميزان
باحث في الأنساب
 





محمد بن عبدالله بن جثلان is on a distinguished road
 

 

حياك رادار دوم نسعد ونتشرف بمرورك العطر ،،، رميزان

 

الرد مع إقتباس
  #5  
قديم 28-04-2008, 11:32 AM
الصورة الرمزية لـ محمد بن عبدالله بن جثلان
محمد بن عبدالله بن جثلان محمد بن عبدالله بن جثلان is offline
رميزان
باحث في الأنساب
 





محمد بن عبدالله بن جثلان is on a distinguished road
 

 

المسافر حياك ياهلا وغلا من طول الغيبات جاب الغنايم ،،، رميزان

 

الرد مع إقتباس
  #6  
قديم 28-04-2008, 12:33 PM
الصورة الرمزية لـ مشاري الهويمل
مشاري الهويمل مشاري الهويمل is offline
pRiCeLeSs
 





مشاري الهويمل will become famous soon enoughمشاري الهويمل will become famous soon enough
 

 

ابنالعم / رميزان


بيض الله وجهك

انتقاء رائع لشاعر رائع


لا هنت يبن العم


تقبل تحياتي

 


::: التوقيع :::



 
الرد مع إقتباس
  #7  
قديم 04-05-2008, 04:40 AM
الصورة الرمزية لـ موج الغلا
موج الغلا موج الغلا is offline
عضو مجلس الإدارة
 






موج الغلا is a glorious beacon of lightموج الغلا is a glorious beacon of lightموج الغلا is a glorious beacon of lightموج الغلا is a glorious beacon of lightموج الغلا is a glorious beacon of light
 

 

الله يعطيك العافيه

الديوان

قصائد رائعه ونقل أروع

 


::: التوقيع :::

رحم الله جسداً تحت الثرى لم يفارقني الحنين اليه
الله يرحمك يا ( ابوي ) ويغفر لك ويسكنك فسيح جناتة


 
الرد مع إقتباس
المشاركة في الموضوع


خيارات الموضوع
طريقة العرض

قوانين المشاركة
لا بإمكانك إضافة موضوع جديد
لا بإمكانك إضافة مشاركات جديدة
لا بإمكانك إضافة مرفقات
لا بإمكانك تعديل مشاركاتك

كود [IMG] متاح
كود HTML غير متاح
Trackbacks are غير متاح
Pingbacks are غير متاح
Refbacks are غير متاح

 
جميع الأوقات بتوقيت السعودية. الساعة الآن » [ 07:54 PM ] .


Powered by vBulletin Version 3.6.4
Copyright ©2000 - 2019, Jelsoft Enterprises Ltd.
SEO by vBSEO 3.1.0 ©2007, Crawlability, Inc.
حقوق كل مايعرض في هذا المنتدى محفوظة لمنتدى بني زيد
www