قصائد قِيلت في بني زيد

من لا تعزوى ما جلا الوقت له همْ=ومن صد عن ربعه تعشّـاه همّـه
عدو عينك عل ما لـه بنـي عـمْ=اليا غدره الوقت مـا سيـق دمّـه
يا زيـد ياللـي كلنـا فيـك نلتـمْ=يا شايب ٍ للطيـب يطـوي معمّـه
فيك الثلاث حروف معنـى ومغنـمْ=للي لهم بالطيـب هقـوه وهمّـه
( الزاي ) زينات المراجل على تـمْ=في كـل نومـاس ٍ بديتـه تتمّـه
( والياء ) يمين الطيب تمدح بلا ذمْ=رجل ٍ يحوش الطيب محـد ٍ يذمّـه
( والدال ) دل معرب الساس والدّمْ=طيبه ينومس راس جـدِّه وعمّـه
وحنا ولو صرنا تفاريـق واقْسَـمْ=نرجع على مبـداك حولـه ويمّـه
في ترثتك يا زيد منصـى ومحـزمْ=ربع ٍ زمو للطيـب نايـف وقمّـه
كل ٍ على الجزلات شـاش وتولـمْ=مايلحق النضَّـاح منضـوح جمّـه
أصغر صغيِّر مـن عمامـه تعلّـمْ=يبرك على النومـاس والاَّ يخمّـه
ذولا بني زيـد الرجـال المحشّـمْ=هم للعدو عوقـه وسوقـه وسمّـه
ربعـي وابمـدح لابتـي واتكلـمْ=وقافي ليا من قلـت محـد ٍ يكمّـه

هَذي حدود السـمـا ! والغيم .. فَـ القِمّة=أداعبه واسرجه .. واشرِف على ارجـومه
وهذا المسا غير ! لونه .. طعمه .. وشمّه=مدري رقيته .. أو ادلَـتْ يـمّـي انجومه
أشوفـها كلّها ! بـ العين .. مِـلـتَـمّـه=واحِسّـها كلّها ! فِـ القلبْ ... مَلـمـومه
هنا (الجدي) مرتكز ... يا مضيّع اليـمّـه=وهنا (سهيل اليمن) .. والبِشرْ بـ قـدومه
وهنـاك ضـوح (الثـريّـا) ! يجلي الغمّه=واللي ورى الضوح ! جوريّة .. ويشمومه
هِنـا اجتمعنا .. ولد عـمّ ! وولد عـمِّـه=هِنـا جمعنا الوفـا ! واليـوم .. هو يومه
من ساس (زيد القضاعي) ... عالي الهِمّه=الشايب اللي ... خذا في علمه ! احلـومه
أنا اشهد انّه ! يطول .. ويـارد الجَـمّـه=وانا اشهد انّه ! يـبـلّ الكبد .. بـ علومه
ورّث قروم(ن) .. تـِفـلّ الراي وتلـِمـّه=من ورثهم ! فِعل (زيد الجد) .. وسلـومه
الله جمعهم .. على طِـيـبـه ! ومن دمّه=نوادر(ن) لـ احتمت ! ما صكّت الحـومة
وان ثار عـجّ الدخن .. والهـيّـه امطمّه=مافيهم اللي ... يحسب حساب لـ خصومه
ماهي حـمـيّـا .. وغير (العود) ما اذمّه=المـرجـلـة ! بين كل الناس .. مقسومة
يا لابتي ! يـ القـنـا ! في ذمتي .. ذمّه=إنّي بِكم صِرت ! فوق المِـزن وخشـومه
هذا المسا غيـر ! لونه .. طعمه .. وشمّه=وانا رقيته ! وكـفّـي ... صـافح انجومه

بديت والمبدا تحيات واشواق=من شاعر ٍ مبدا كلامه سلامه
سلام ٍ احلا من هماليل دفَّاق=مدت كريم ٍ مزجي ٍ به غمامه
على وجيه ٍ بالنقا تشرق اشراق=اشراق نور الصبح عقب الجهامه
واكز بوحي من على بيض الاوراق=لأهل الوفا والمرجلة والشهامه
بوح ٍ تنامى في شرايين مشتاق=وعانق صليف الشوق حتى عظامه
لا يا بني عمِّي ترا الوجد حرَّاق=وأنا عليكم وجد قلبي سقامه
من قصر جدِّي يا نقيين الاعماق=أرفع يميني فوق راس العدامه
وأثني على جمع ٍ على الطيب سبَّاق=جمع ٍ رقى للطيب ذروة سنامه
توارثو ورث ٍ على الطيب منساق=توارثو من زيد راس الكرامه
آلاد زيد مطوّعة كل بوَّاق=لا ثار في وقت الملاقا عسامه
أهل الحميَّا لا اعتزى كل تفَّاق=آلاد زيد إن سهَّل الله كعامه
إليا التوى بالحرب ساق ٍ على ساق=فيهم على نطح المعادي قرامه
وفي نجد ما عنهم وسيع الفضا ضاق=شيخة قرايا نجد فيهم علامه
من بير شقراء بلِّلت كل الارياق=ومنها صليب الراي جوَّد حزامه
الشايب اللي بالمواقيف فهَّاق=يفهق خصيمه عن مضارب خيامه
للعرض روَّح من على الدرب ما عاق=وروَّح سويِّد للعويصي وهامه
وارسل على ثهلان حر ِ بمسباق=واضفى على راس الشريفا حرامه
وتناوحت لا لآد زيد ٍ بالافاق=ذيك الديار اللي بكتهم ندامه
يقوله اللي من على نايف ٍ واق=يوم اعتزى في زيد صاحو عمامه
صيحة ظفر منها العدو ذاق ما ذاق=وعوَّد كسير ٍ خايبات ٍ حلامه
تمت وصلو عد ما لاح برَّاق=على النبي اللي بطيبه مقامه

أرسلت فكري .. طامعـاً بابتعاثـه=يجيب لي من " شرد " الافكار الاثـرا
واسـوق قـاف ٍ ينتشـي بالحثاثـه=وتوافـد الافكـار للـراس تـتـرا
الشعـر مجـد ٍ نفتخـر فـي تراثـه=الشعر مثل " الليل " لا قيـل مسـرا
ويامن طلب شعر ٍ " قديم بحداثـه "=هذا قصيدي وافهمه يـوم " تقـرا "
فتش أساس " البيت " واترك أثاثـه=واعرف وش اللي يجعل البيت قصـرا
وشعري " لربعي " ما كتبتـه عباثـه=" لعيونهم " آمر على القـاف أمـرا
فيهم يجي جزل ٍ ولابـه " رثاثـه "=جبته على المطلوب محكـور حكـرا
قسّمت نفسـي بيـن ربعـي ثلاثـه=" العاليه والعرض هم واهل شقـرا "
" آلاد زيد " أهل الشيـم والدماثـه=بحر الكـرم والطيـب والنـاس أدرا
" بالدين " شاموا عن علوم الخباثـه=تاريخهم مذكور فـي كـل عصـرا
"والعلـم " فيهـم زايـد ٍ انبعاثـه=أعلامهم باقيـن مرجـع وذكـرى
" وبالمال " غاثوا من يريـد الاغاثـه=فاقو على طنخات " قيصر وكسرى "
كما البحر لا هاج صعـب اجتياثـه=بحر ٍ طغى خيره ولـو كـان جمـرا
والطيب حارث في " خفاهم " حراثه=ماهم رجال ٍ تشري الطيـب مشـرا
الطيـب فيهـم وارثينـه وراثــه=حطوا ينابيـع ٍ مـن الطيـب بحـرا
اذياب تفرق عـن ذيـاب الغلاثـه=ما للذي يجهل " بني زيـد " عـذرا
كما " الجبل " راسي وصعب اجتثاثه=وكما " الشجر " بالخير يعطي ويذرا
واليا ذكرت المجد ما انسى " اناثـه "=هن الشرف هن الفخر يـوم يطـرا
يالله جنبـهـن دروب الـدعـاثـه=وعن كل درب ٍ في مواريـه غـدرا
متعمـد ٍ اكتـب قصيـدي غثاثـه=مع الغثاثـه شامـخ بكـل فخـرا
ما فيه شـي ٍ عاقنـي غيـر عاثـه=يدمر كيـان مـدور الشـر دمـرا
شاعر ولا اعطى للقصيد " اكتراثه "=لكن وجوده يغمـر القـاف غمـرا

يـا مرحبـا باللـي لفونـا و كلنـا=صـارت ليالينـا سعـد و افــراح
جيتـوا و شرفتـوا لقانـا بحفلنـا=و الهم عن بيـض القلـوب انـزاح
و الشكر موصول(ن) لمن لم شملنـا=من غـرب مكـه لديـرة الصبـاح
و من حايل بلاد الكـرم هـل وبلنـا=ليـن اليمـن، جـا دربنـا سمـاح
هـلا بكـم عـداد مـا ثـار رملنـا=و عداد مـا جـال الحمـام و نـاح
يوم اجتمعنا، شيخنا جـا و شبلنـا=و الطيـب الازرق فـي لقانـا فـاح
الى جاد طيب العود من طيب أصلنـا=اللـي معـه دبـج الميـاه قــراح
رجح في قناطير أطيب خصال رطلنا=بفعـل(ن) ينومـس وقفـة المـدَّاح
الى حل في الأرض الجرز بعض نزلنا=تحولـت خضـرا و ماهـا ســاح
ماهـي غريبـه كـل هـذا بفعلنـا=و لا هـي غريبـه طيبنـا نضـاح
الـى تواصلنـا وصلنـا بوصلـنـا=أرحامـنـا، وافراحـنـا تـنــداح
ما احد(ن)تجمّع مع عوانيـه قبلنـا=بالكـم هـذا و جــودة الأربــاح
و حنا مثل "ثهلان" في كسـر ظلنـا=ظل(ن) ظليل(ن) من كسـاه ارتـاح
وما دام جا ذكر الجبل رمـز بذلنـا=و رمز الصمـود بوقتنـا اللـي راح
ترى بنيخيكم هـل الضلـع و اهلنـا=يهـدوا سـلام احلـى مـن التفـاح
ويشاطروكم كـل الافـراح و ازلنـا=الطيـب، و انتـم رمـزه الـفـوّاح
يا لاد زيد ان ما ارتكى الحمل جزلنا=ترى ضعيف(ن) ما يهش مـا شـاح
الله الله، و العـنـايـة بطفـلـنـا=خلّـوه يبـدا رحلـتـه مـسـراح
ترى اطفالنا يالربع هم صلب دخلنـا=و ان ما حرصنـا كثـرت الاتـراح
الدِّين هـو مصـدر ثقتنـا بغزلنـا=و نسيجـنـا قـوتـه بـالاصـلاح
نبني رجال الغد مـن طيـب نسلنـا=والإنتمـاء و الدِّيـن خيـر سـلاح
و اليوم قايدنا علـى الـدرب مثلنـا=علـى جـواد التنمـيـة ســوّاح
همه كبيـر و فعلـه اكبـر لأجلنـا=ما قـال اقصـر خطوتـي و ارتـاح
خلى قضايا العُرْب من صلب شغلنـا=يسعـى وكــنّ بـيـدِّه المفـتـاح
توسموا خيـر(ن) بميـزان عدلنـا=و بجهود ابو متعب تغيـب اشبـاح
والمعذرة إن كان مـا جـاد زجلنـا=و لا ارتقـي لا ذواقكـم، صــدّاح
أنا من هواة الشِّعْر و الشِّعْر حبلنـا=و ان كان قصَّـرْ، نرجـوا السمـاح
ثلاثين بيت(ن) و السواكف من اثلنا=و لا خبر سقف أثل "الشريفا" طـاح
وصلاة ربي عـد مـا قـام رجلنـا=للحرب، في وقت الفتوح، و صـاح
على نبـي(ن) نـوّرْ هْـداه سبلنـا=و صرنا بهديه فـي مسـار بـراح

يا عين حرٍ مرقـب العـز مرقـاه=متعلي ٍ راسه بـروس الطوالـي
للطيب وسـم ٍ بيـنٍ فـي محيـاه=له حومة ٍ تذكر ورا كـل عالـي
ذكَرتني مـع كـل رجـم ٍ تعـلاَه=وكسب النواميس اول ٍ ثـم تالـي
بافعال ربعي هم هل الصيت والجاه=حازو على العليا كـرام السبالـي
آلاد زيـد اللـي نهـار الملاقـاه=يزبن ذراهم مـن يصيبـه جفالـي
قوم ٍ لهم باوسـاط نجـد المسمـاه=أركـان عـز ٍ باقـي لا يزالـي
كبيرهـم تعطـي يمينـه ويسـراه=وقت الفقر ولا الرخا مـا يبالـي
غيث ٍ من المولـى وكـل ٍ تمنـاه=نمشي وراه اليا صفق جال جالـي
وصغار في كسب المراجل مضراه=منهج سلف ترثة عمـام وخوالـي
قرم ٍ عريب الجد يا طيب مجنـاه=معروف ساسه لامن الساس مالـي
عرق الندى يندى لو الري ماجـاه=وعرق الردى يابس ولو في ظلالي
من راد من ماض الفعايل عطينـاه=ونـذكَـره بأيامـنـا والليـالـي
كم عين بـواق ٍ هجدنـا واسرنـاه=وكم من عوج جيناه واصبح عدالي
هذا بعض من كل لا مـا ذكرنـاه=أفعال ما قال الجبـان إنهـا لـي
تقصر يمينه ما كسب مـا كسبنـاه=موقن بطول الفرق جعلـه فدالـي
قلته وانا عـارف بعلمـه ومعنـاه=منطوق حق ٍ ما يشوبـه جدالـي
خير الفعال مراقب العبـد مـولاه=مكسب رضا الواحد عظيم الجلالي