بسم الله اللي كوّن الكون تكوين=بأمره تكون كل شي ٍ بحينه
خلق مخاليقه بسبع الأراضين=وطوى سماواته بقبضة يمينه
وخلق نجوم ٍ راجمه للشياطين=وايضا جعلها للسماوات زينه
أول بدا بآدم وسوّاه من طين=وذريته جت من مياه ٍ مهينه
ربي خلقنا من عدم بالملايين=لاجل نعبده ما نخالف لدينه
وارسل رسول ٍ خاتم للنبيين=رسولنا اللي مسجده فالمدينه
وانزل كتاب ٍ بيّن الحق تبيين=دستورنا و علاجنا ما نهينه
احكم حكيم حاكم ٍ بالموازين=بالعدل حكمه والحكم مرتضينه
فرض صلاته واجرها بأجر خمسين=نمشي لها مشية وقار وسكينه
امكبرين امهللين ومنيبين=امسبحين ٍ للولي مرتجينه
سبحانه اللي كلنا له مطيعين=والكل يسجد له خضوع ابجبينه
يدري وش اللي بالضماير مكانين=يعلم خفا الأسرار من دون بينه
الحمد له يوم ان حنّا مْسلمين=ابسرنا وجهارنا عابدينه
من بعد ذا ردوا معي قولو : آمين=ابطلب الرحمن منجي السفينه
الله يجمعكم على العز والدين=على المعزه بيتكم ناصبينه
والله يجمعكم على العسر واللين=جمع ٍ على النوماس يا كاسبينه
هاذي شعيرة خير والفخر ذلحين=وعندي نصيحه والنصايح ثمينه
ودي أوضح وافهموا يافطينين=رجل ٍ تمنى الخير والله يعينه
لا يفرق الأقراب هوش الوراعين=ياكم وكم يا اهل العقول الرزينه
ولا يفرق الأقراب كذب الحقودين=أهل النمايم والحكي مفترينه
اللي مقاصدهم فراق الشريفين=ناس ٍ تكلم فالظهور ولعينه
تبغا عيال العم دوم امتجافين=تبي تبث الحقد بين الضعينه
هم شرذمة شر وتراهم قليلين=الله يزيل اهل الفعول العفينه
الرجل يعرف يالنشاما بثنتين=لا جا خوي والى عرفنا قرينه
وحكي النهار ابينمحي عقب ليلين=والهرج ما هز الجبال المتينه
ويش استفاد اللي قطع فالعمامين=غير الذنوب ولا جمع له حسينه
صفحه جديده وافتحوها على زين=تنفح بريح المسك و الياسمينه
واللي سمع ما كنْه يسمع بالاذنين=وحده بها طينه و الاخرى عجينه
صفو القلوب السمر ما هوب بعدين=كل ٍ يشيل اللي خفا من غبينه
خلوا النوايا طيبه و متصافين=و الشر يقلع من عروق ٍ دفينه
و البر والتقوى عليها عوينين=ياطيبكم و الطيب متقاسمينه
واللي غلط ردوا له الصاع صاعين=حتاه يستسلم و يرفع يدينه
الجمع عز ٍ يالزحول السلاطين=دام التفرق و الجفا مبعدينه
انا اشهد ان في شوفكم تسعد العين=للي يبي ربعه وشوفة عوينه
عز الله انكم يا بني زيد غالين=يا اهل النقا وهل البيوت الحصينه
يا اهل الحميه يا صعوط المجانين=يا اهل الشجاعه و السلال السنينه
سلالة السرحان نعم السراحين=لطامة العايل و هيف السمينه
درعي بني عمي كعام المعادين=زبن الدخيل اللي ظروفه تدينه
يبقا طليق ٍ دامكم له موالين=عايش بخير و مهتني في سنينه
و النعم فيكم جيدين و فزوعين=رجالكم يارد على الموت عينه
ربعي لكم هيبه وللسيف حدين=خصيمكم لا جا الوغا متعبينه
أفعالكم عند الملاقا براهين=وقت ٍ مضى والليث يحمي عرينه
فالمعترك راسين مثل الضلاعين=يوم ان " قليب " اللاش مثل المكينه
عدوكم يا ملحقين المخلين=من فعلكم يسمع بكاه وونينه
و عاداتكم و سلومكم ورث جدين=و كلن يجيه الطيب من والدينه
قد قيل ثوب العز فوق العزيزين=وانتم على ثوب الوفا مكتسينه
عز وفخر واصل وفصل يالعريبين=تاريخكم فوق الصخر ناحتينه
لو اقعد أكتب ما تكفي دواوين=و اللي تمثلته ذهب من خزينه
وان كان فالأبيات نقص ٍوتخمين=فالعذر من روس الرجال الذهينه
و ختامها واعداد غرس البساتين=صلوا على اللي كلنا تابعينه