من روائع قصائد مبيلش الصبي رحمه الله a

آخر المشاركات المطروحة في منتديات قبيلة بني زيد

  ب 50 ريال فقط سيكون لك أجر مليون شخص فرصة نادرة لاتعوض (صورة) ( آخر مشاركة : ساكتون    |    هل تريد أن يكون لك سقيا صدقة جارية كل يوم حتى وأنت نائم أجرك مستمر لايتوقف (صورة) ( آخر مشاركة : ساكتون    |    هل تريد أجر القائم المصلي لايفتر وأجر الصائم الذي لايفطر بإذن الله ( صورة) ( آخر مشاركة : ساكتون    |    المولودة ماجدة تنظم لأخواتها ليكونن تسعاً ( آخر مشاركة : طالب علم    |    هل تريد أجر تلاوة القرآن آناء الليل والنهار وأنت مرتاح في مكانك (صورة) ( آخر مشاركة : ساكتون    |    أدخل في 12 مشروع من مشاريع السقيا بأسهل وأسرع طريقة (صورة) ( آخر مشاركة : الجنرال    |    أسهل طريقة لكي لاتفوتك صدقة عشر ذي الحجة خير أيام الدنيا (صورة) ( آخر مشاركة : ساكتون    |    أوقف برادة عنك أو عن والديك أو عن متوفى أنقطع عمله لتكون له صدقة جارية لاتنقطع (صورة) ( آخر مشاركة : ساكتون    |    وقف رسمي بمكة المكرمة داخل حدود الحرم حيث الحسنة بمائة ألف حسنة (صور ( آخر مشاركة : ساكتون    |    أرخص كفالة حجاج في السعودية لعام 1440هـ (صورة) ( آخر مشاركة : ساكتون    |   


العودة   منتديات قبيلة بني زيد > قسم قبيلة بني زيد > تـاريـخ وأنسـاب الـقـبيلة
التّسجيل   جعل جميع المنتديات مقروءة

من روائع قصائد مبيلش الصبي رحمه الله

المشاركة في الموضوع
 
خيارات الموضوع طريقة العرض
  #1  
قديم 17-03-2008, 11:25 PM
محمد بن سعد المهنا محمد بن سعد المهنا is offline
عضو مثالي
 





محمد بن سعد المهنا is on a distinguished road
 
من روائع قصائد الشاعر عبدالله الصبي ,, رحمه الله (( مبيّلش))

 

الشاعر / عبدالله الصبي ( مبيلش )
علم على رأسه نار في الشعر
كنت أجول في النت فعثرت على شيء من قصائده في أحد المنتديات
وفرحت بها وعرفت كاتبها ,, انه صديقي وأخي عبدالعزيز اليحيان (أبو عمر)
وحادثته منذ قليل ممسجراً له بعد المهاتفة فأرسل لي ما كتب عن الشاعر المميز
وأنتم اولى من أنثر في ربوعهم هذه النوادر .
يقول الشاعر عبد الله بن محمد بن عبد الله الصبي آل غيهب بني زيد والذي يعرف بـ (مبيلش) والمولود في شقراء عام 1301هـ والمتوفى عام 1371هـ


1- عن موقعة السبلة صباح يوم السبت 21شوال عام 1347هـ

نحمد اللي عز دينه وصدّق بالوعد=والبس التوحيد ثوب من البيضا جديد
وادرج القاله على راس خوان العهد=ربنا بالمخاليق يفعل مايريد
ولّ عود ماتميز محمد عن حمد=تدعي بالدين والدين عن مثلك بعيد
ياضعيف الجد والجند وضعيف الجهد=يامقلب مذهبه يا العنيد بن العنيد
غادي قلبك بعمياه توّه مابعد=والف الدين الحنيفي ولاديّن وكيد
شيخنا اللي درسك في حديث المعتقد=وانت قبله ماتعرف الحديث من النشيد
يوم اراد الله عليك المضره والنكد=وهقك ...في لجة الحرب الشديد
إنشد...عن حالهم ياابو فهد=جعلها حال عليهم إذا عادو تعيد
كنهم بين العثامير والحزم الجلد=في مداس الخيل يوم ادبروا حب الحصيد
في نهار ذاهل والد عما ولد=تشتعل نيرانها من حديد في حديد
يابيوت السرق ماعاد يبنى لك عمد=هودي عن دورة الحكم ياسودا لبيد
لاتغرك شاشة ...لو كثر العدد=مثل بردان التهامي تليّم لين صيد


2- عن الحرب مع يحيى حميد الدين في اليمن عام 1351هـ
أتغيشم وانا لي ملحظ ثاني=واذخر القيل عندي لين جا حله
وان مشى الجمع دورني وتلقاني=في ذرا بيرق ريمات يبرن له
ذيب يا اللي بخشم طويق جيعان=دوك الارزاق وجرك للعوا خله
جر صوتك الذيب اكباد وهدان=والوعد مركز البيرق ليا فله
مرذي الجوف ابو تركي ذرى العاني=مورد السيف لا رقاب العدا سله
شيخ كل الجزيره طير حوران=لو تقولون يحيى قلت : لا با لله
دوك يحيى عقب ذاك القسا لان=وانسحب كن ما صنعا بملك له
يا سحاب ثقيل نو غضبان=فوق صنعا تعرض والغضب هله
ساقه الله على عباد الاوثان=واحرق الزلم واستقفى على الحله
كن نطل الجنايز في ضحى ثاني=في مهاويه ضين ضاربه عله
بالمشوك نعدل كل فسقان=لين يركب على التوحيد والمله
جعل ربعي لهم عز بالاكوان=من تعدى الشريعه شينوا دله


3- عن موقعة تربه بين الاخوان وعبدالله بن الحسين الشريف
نجد مطلبها على غير ابو تركي صعيب=يا محاول حلها دونها قطع الرقاب
دونها خزام خشم الصعب سقم الحريب=درقة التوحيد والدار عن هضم الجناب
شيخنا في ذروة المجد له بيت عريب=في الثرى ساسه وراسه يخطم للسحاب
يالله انك لا تردي لا بو تركي نصيب=يا رفيع الشان عزه عساها تستجاب
جعل من هو كاره عز ابو تركي يخيب=خيبة ياقف مداها على غضر الشباب
جمعنا له في ضحى الكون مضراب عطيب=بالسيوف البيض ومشوك ضربه صواب
نيتم العيل ونفرق حبيب من حبيب=نرد حوض الموت ورد الضوامي للشراب
إنشد الحاضر يعلمك كانك مستريب=لين تقضب راس علمي وصدقي في الجواب
يوم غزو البيه في حد حزم من شعيب=ساقه الله ثم سقناه باصواط العذاب
كن صفق سيوفنا والنمش صفق الرطيب=في غوارب عسكر ساقه الله للذهاب
يا غريس طويق شرع ترى المربع خصيب=تو ما هب الهوى لك وطاب الك الشراب


4- عرضه
نصرة التوحيد منا وحنا له درق=من زمان ادهام وانا حماه أو في ذراه
ننصره لا ضيم وانجدده لامن عتق=من غدا منا يوصي عليه اللي وراه
والحريب انعرّضه وان زمى خشم التفق=لين يمشي في هوى الله ويرجع عن هواه
ما لنا اصدق من احدود الرهايف والفشق=والرفاقه لا وصل كل علم منتهاه
واعرف ان اللي لضده على بده وثق=مثل قاضب غارب الداب يحسبها عصاه
شطر الخاين وقرب مقام اللي صدق=واسبر الثالث ابعقلك تبيّن ما وراه
ون قدح زند الحوادث فبالك والرهق=لذ على اكوار العزايم وما اجرى الله قضاه
إحفظ الطاعه تراها مفاتيح الغلق=لا ترجي منه يرفع مقامك واتعصاه
وان عدانا الفود بالجود ما سر الملق=والمخاير نزهم الله على قلعة مداه


5- ويقول:
البارحه ما احسب ورا صبحها صبح=وانا احسب الدنيا غدت كلها ليل
كل الليالي الماضيه جابها ربح=والبارحه راحت ابكل المحاصيل
واثر الهوى له رغبة شبحها شبح=عسر املاطم موجها يفتر الحيل
فيها فتر حيلي وانا جيد السبح=من همها دونك اعظامي نواحيل
كني عضيض الغلث خطر على النبح=ينبح ليا ما شاف ضوح المخاليل
يالله من مركوز الانهاد لا تبح=حسبي على منسوع شقر المجاديل
يحدني حد الجلايب على الذبح=كما يحدون الكسايب هل الخيل
بدّل نباه الزين لي بالنبا القبح=عزم على حربي ابليا دواليل


6- يقول في محمد الخاطر البوعينين في الجبيل:
دن القلم ياديب قم حط مثلوم=راس القلم في الحبر خله يمضه
مض على ماترغب النفس بكظوم=واليا امتلى راسه من الحبر حضه
أعنيك في مدحك محمد عن اللوم=ماله عن الجودا عزوم تكظه
شيد لخاطر مفخر العز مزموم=في بيت عز لاقضى الله بقضه
يوم الهجوم ومشعل الحرب مضروم=يوم الحسا وجيوشه المستلظه
صفق بجنحان السعد وادرج الحوم=واهوى على الجمع الموالي وقضه


7- إجتمع الشعراء في سيف الكويت فلما وصل قال:
سمعت الرد في الصيهد وجيت اعدي لكم وانقز=كما الكتفان وقت الصيف تعجبني نقاقيزه

ثم قال:

سلام ياروس زمت من فوق روس=والروس الأوخر بينت في سدها
الليله المرزم على الجوزاء عروس=منه الثريا مستضيح خدها
وادخل على الله من خبيثين النفوس=اللابه اللي عضها في بدها


8- ويقول عن معركة كنزان:
ياهل الدين دين حل مفهوقه=تو مابان يالشبان طاريها
راعي العوق الاول رد في عوقه=من تعود علوم مايخليها
ماتهود عجم كسرى عن البوقه=لين خضر النمش تبرى علابيها


9- ويقول هاجيا:
كن قمة ...خمرة في وجير=أوطريثيث صيف نابت في زباره
كن راسه تحت صمط العقيل صرير=مايجي طول شبر ...عن زراره
فيه نصف ثوير وفيه نصف حمير=جيت اشده ولاقدت عليه الوثاره
إفتلوا له من اذناب الحصاني ثفير=خابره في اصغريه جيد في النكاره
لارحم من يقول ان في ...خير=وين هم يابو عبد الله ووين الخياره


10-ويقول :
ياراكب اللي كنهن الشواذي=يعطن راكبهن على البال مالذ
يالايمي يرمى برمي التواذ=يعبا له البارود والملح وفلذ


11-كان هناك خادم للخاطر آل بوعينين في الجبيل وقد اشترى من مبيلش (مشلح)أعطاه نصف قيمته وماطل في النصف الآخر وقال له متحديا :يقولون انك شاعر ولاتهمني فقال مبيلش:
يوم شفت النظا في الحزم زلاف=قلت :حي الركاب ومن تجيني به
هاضني واحد في كور موجاف=بين جيش الجماعه كنها الذيبه
قلت:من ذا لعله رجل وسنافي=قالوا:إنه...قلت :والخيبه
كيف اباالجول يركب شهب الاكتاف=جيش الاجواد ماهي من مراكيبه
باشق الصرصره منتوف الاطراف=لو يزوم العلا عيت عذاريبه
يامصقر طوير المركز الهافي=خل بومان في برجه تلالي به
لاتغرك ردون اشلاحه الوافي=والمعلم اونقش الزري في جيبه
والمعلم وشال فيه سنجاف=طالع الحال لاتعجبك اساليبه
للمسير بداره بندر دافي=من تردى نصيبه راح يمسي به
حسو الادناس مدهل كل حواف=طافحات كلابه في مغاريبه
عل من يارده لرهيف الأسياف=فوق جاله تلسب به عراقيبه
ياهل الميز عدوا قول الانصاف=كيف عند العرب مايدنسه عيبه
والله اني لعيب العبد كشاف=يامشاهيب نار العار شبي به


12-قال وهو في البحرين:
رماني ردي حظي على شرقي الاسياف=على ساحل البحرين نوخ مراحيله
على ديرة البرغوث في مقعد ينعاف=عدوك من الناس البعيدين تاوي له
إذا جاك في تال زمانك سموم جاف=ونجد بتالي الوقت قلت محاصيله
ترحلت من دار لدار بها ميلاف=ولاكل من ساقه زمانه بيافي له
ادور بركب الغوص رزق من الاصداف=ابقاع البحر والقرش دايم يباري له
سرى البرق صيفي مشافه قطن نداف=تتابع تواليه الاوايل وترفي له
لاكن الطهى به يوم عرض علي ارداف=دبش حاكم هج الضحى من مقاييله
اخيله وانا عقب العشا بارق كشاف=على بر فارس يشتعل في مخاييله
أخيله وأنا دمعي على وجنتي ذراف=كما وبل هملول جرى في مساييله
أراعي نجوم الليل والغيب ماينشاف=وادير الفكر في غاية العز والحيله

 

الرد مع إقتباس
  #2  
قديم 17-03-2008, 11:29 PM
محمد بن سعد المهنا محمد بن سعد المهنا is offline
عضو مثالي
 





محمد بن سعد المهنا is on a distinguished road
 

 

سأل ابن عمه علي بن زيد لماذا لاتتزوج فقال: أنا شرهة عيني بزين المنظريه فقال مبيلش:

يانديبي فوق عشرين حراير=من حرار هتيم مافيهن ونيه
نسع الازوار دمثات الحصاير=كلهنه من رباع ليا ثنيه
فوقهن اعيال واكوار ونجاير=وامهات اخشاب واشغال قويه
ياهل العيرات لي فيكم دباير=ماعليكم يالنشامى مكنويه
لي ولد عم تحير به الفكاير=شرهة عينه بزين المنظريه
لايجي فيكم عن اللازم مخاير=حاجة الاصحاب لازمة عليه
فرقوا عيرات الانضا للجزاير=كل بقع ينحره راعي مطيه
دوروا له مثل عفري الزباير=جادل عجاب وهروجه طريه
كثرو سوق البلايس والبشاير=لين تلقون الهنوف العسوجيه
لو يسوقون اربعين من العشاير=واربعين من بنات المعنقيه
إنبزوها فوق زينات الوساير=والهمام الله يسمح كل نيه
كود عينه تستريح من العباير=يرجهن بشوف مجلي الثنيه


14- ويقول:

ياسلام الله عليكم عدد ماقيل عز=والي البرق الحقوق ان تعرض بارتكاز
حينما رابت مقادم مزونه واقلحز=وارتكم نشو الطهى في مقاده والعياز
إنطلق من همّله مثل منثور الخرز=كن وداجه على سطحة البيدا البياز
البعير اللي ورا بابكم يوم انحجز=ماصخفتوا للجمل يوم لاحاه الحجاز
ياهل الدين المرجى بوعد مانجز=فرق مابين المطل والتعلل والنجاز



15- ويقول:

لاوالله اللي علينا كبرت القاله=والعين هلت من الفرقا عبايرها
والقلب زاره عناه وزادت اثقاله=وهو من اول دروب القيل ناسيها
قم شب نار الوجار وطيب اشغاله=واصفق ثناويه واجمع زل صافيها
واعرض بريقه على مركاه ودلاله=ثم اكبر النار واحمس فوق صاليها
بن يطير عماس الراس فنجاله=ويداوي الكبد عن جرح لجا فيها
كنه اذا فاح عود الطيب يبرى له=عنبر سويقه إذا شالوا مغاطيها
وان شح صالح على ربعه بفنجاله=ماشح راعي دلال له مراكيها



16- قال سعد بن عبد العزيز البواردي :

الا ياربوعي ساعدوني على الونه=ونين الضحى اشلى من ونين العشا التالي

فقال مبيلش:

ترى ياسعد طرد الهوى بالهوى سنه=أقوله وانا المفتون في بعض الازوال
أنا من هو الثنتين جريت لي ونه=تسمع لها باقصى الضماير تزلزال
عفيفات طاروق الهوى مايعرفنه=ياكود العجب والضحك وازبن اعمالي



17-قال في قعود له أثناء طلاءه :

ياقعودي لودريت بمقصد لي=كان ماترغي وتجزع من طلايه
ودنا تبرا نزور ديار خلي=بس انا وياك توصلني هوايه




18-ويقول:

واهج بالضماير حرق الجاش حره=أتهضم ويقدح بالنواظر شراره
بين عوج المحاني والسواعد مقره=في مضيق الحشا له زمة وانحداره
اشرب الما وعيا بارد الما يسره=كل مازاد شربي زاد قلبي حراره
والعدو البطيني طالني منه شره=صر اذانه ورز كريعه للنكاره
كيف غريتني عن لازمي يالمغره=خاب ظني وصارت فرحتي بك خساره




19-ويقول:

ياهل العيرات ودوني مليحه=وأجدعوني في المكان اللي تروده
ضامر السرجاف مايبرا طريحه = كنها بيض القميريه نهوده
واهني اهل القلوب المستريحه=ماددروا بالحب وش هونه وكوده


20- ويقول:

يالله يالله ياللي تعطي الناس=يامعطي الناس تعطي خالي الكيس
يوم ان كل نعس ماني بنعاس=لين اول الليل زل وجت غطاليس
ابونهيد يشادي البيض غطاس=لاج عن البرد بالشقر الدبابيس
وابو عيون تشادي عين قرناس=ضاف هدبهن على مثل القراطيس



21- وقال عندما هدبيته وبناه واستنفد ماعنده:

الفقر فوق جدار داري بنا دار=مستانس ماجاه مني مناكير
دار أولين كلها عش وغبار=كن السحا فيها محامل عصافير
وانا عميل شريم وشريم عيار=ياخذ قريشاتي حياله وتقمير
يبني بها بيت على جال مهيار=دار على القرشا خشبها جذامير




22-وقال في داره عندما هدها ليعيد بناءها :

ياحيسفا يادار ياللي غدت قوع=تلاوحوها بالعتل والفواريع
أطول خشبها قايسه مايجي بوع=واقصارها كنه عظام الكراسيع
دار أولين كنها جحر جربوع=نصف مديخيل ونصف مطيليع
مانيب عن تصريف داري بممنوع=احطها حيشان والا مرابيع
وابوخليل عويب الكف والكوع=إن قلت عجل قال لااسمع ولااطيع
والله لولا الحبل مثني ومربوع=على السواعد ليتين بتربيع
لاقول :يادلال بالسعي منفوع =لي منك مجهودك ولك مني البيع




23-وقال في ناقة ابراهيم الشريهي (قليس) :

هجت قليسه وهج الجيش قادمها=لاكنها يوم هجت هدهد ماشي
كنه ليا اقفى مع الخبه يدرهمها=نيص مع الصبح يم الجحر منحاش
تخرقت عقب ها الطرشه مناسمها=كن الحفا وصطهن خروق وشاش

فقال الشريهي:

هذي سحيبه ردي العقل ظالمها=انا احسب انه رزين وصار خرفاشي
إن كان سلمت وفك الله سوالمها=تسبق هل الجيش فاطرها مع الحاشي




24- قال عن معركة السبله صباح السبت 21شوال 1347هـ:

ياإمام الدين والتوحيد=ذبح قطاع الطريق جهاد
...الخاين النمريد=واطي عرض السريح عماد
زادت النعمه على الصنديد =وانحرف عن دينه المعتاد
يوم اراد الله له التلديد=وهقه بعلومه ابن ...
يحسب ان الموت عنه ابعيد=مادرى انه حوله الجلاد
كن جمعه في عريض البيد=شرقي الزلفي جنوب الواد
مع طلوع الشمس جافل صيد=حده الحايز على الصياد
ياسباع طويق هذا العيد=عيدي يوم إن عيدك عاد




25- وقال:

ياعين ياللي بكت والناس هجاع=هذا لها هجرة عمال بزياده
أدعي واصوت وهي ماتسمع الداعي=واقول يالعين مالك في البكا راده
ياهيل ياهيل لونك خمسة انواع=ياغالي المشترى يابخت من فاده
قلبي ليا اوحيت طارى الهيل ينصاع=صوعة فطا عن غدير جاه صياده



25-جلس هو ومحمد بن عبد الله بن الأمير (الفراشه) فقالك

يغيظ ويمتلي صدري من العبره واخاف اني=إذا كنيتها يحرق فؤادي حر صاليها
وانا ياما قرعت من الندم ظفري على سني=والاريا اذناب عوس مايشاف الا مقافيها
ابا أصبر لليالي لين تاخذ حقها مني=أشوف أمري غريب وعلتي ما احد يداويها

ثم قال عطنا بيتك يابو عبد الله فقال:

ملاويف الزمان اللي توطنك توطني=وانا مثلك بتالى الوقت حسّتني مكاويها

وعندها رمى مبيلش شماغه وقال :كفو بيتك أحسن من بيوتي فرد محمد قائلا:

ليس أحسن مني ولكنك أردت تشجيعي.





26-عرضه بعد استرداد أغنام شقراء من أيدي بعض اللصوص

لابتي سلة بني زيد والطيب ظهر=لاجت الضيقات مايظهر الا المستحين
لا احتزمنا والتوينا على مثل الزهر=نقطع العشّيق من شوف موضية الجبين
ضربنا بالراس والا على حد الظهر=في عدو الدار تلقا مضاربنا تبين
ياعمار بالمواسم نعرضها الخطر=والمنايا والمقادير تكتب بالجبين
ياهنوف العين لباسة الثوب الحمر=لاتبين اللي ضحى الكون فعله مايبين
ترّك اللي عند هيشان ربعه ماظهر=يوم تكسير العزاوي وضرب المارتين


27- يقول في الملك عبد العزيز:

الله البادي ولاخيب الله من دعاه=رافع الرايه الفعّال في الناس الجميل
معطي الخلق المحاويج يوم الله عطاه=من جزيلات الوهايب إذا شح البخيل
أتمنى والتمني من العاقل سفاه=لو يطيع الموت ياخذ عن الطيب بديل
ويش يبغى بالردي لو تمادى في الحياه=ما ورا عمره ولو طال في الدنيا حصيل
قبل ابوتركي وحنا مع الدرب المتاه=في سواريت الجفا بين ماسور وقتيل
شيخنا لازال يرفع لنا طيب نباه=حطه الباري على نجد واطرافه وكيل
ماتبين له على الدين من فتق رفاه=كنه المهدي وياقرب سعد من دليل
رايه الميمون في كل ماجوب نواه=كم تحمل عن رعاياه من حمل ثقيل
إن عطى قلنا عطاياه مفتاح الغناه=وإن سطا عينت مضراب هداته جليل
عاش من يضفي على الدين والدنيا ذراه=سايس الثنتين عدّال منهن مايميل
ساسها بالعدل واختاره الله في سماه =دعوة من صالحين السلف رفعت بليل
إنشد المنصف عن البيت يوم انه ولاه=والمدينه من عمرها بتمهيد السبيل
يركب الحجاج من هجر وسلاحه عصاه=ماعليه من المواذي كثير ولاقليل
أمن الخايف وضاعف على الحايف جزاه=واستراح من السهر في المراح وفي المقيل
لو صلاح الناس في غارب الجوزا بداه=مايذل من المخاوف ومن ربه ذليل
عزه الله من خليفه ومن خلّف وراه=يالله اني لك عن الحط من قدره دخيل


28-ويقول:

فتني في البحر دانه=اقماشه راس غلطانه
الا ياعود غرياف=تروّى فوق الاسياف
رماني والله الكافي=بعين منه فتانه
الايانور بنّوره=عديم الجنس والجوره
عفر داورد بخضوره=خلقه من ارتفع شانه
غرامي به بلاني به=وراعي الحب تدري به
كما عود نبانيبه=من الاوراق عريانه
اتورى لي حكياته=وشرب من شفياته
إذا جا وقت جياته=رمع قلبي على شانه
غريب الوصف فاتني=وهجر منه ماحني
بغيت اموت لولاني=جنيت الورد باغصانه


29-ويقول:

صغير بالهوى ناشي=وهو ماهوب يناشي
على ماقال ابوناشي=كفاني منه ميسوره
إذا كبرت أبا اصلي=خطر في هاجسي خلي
لعلي منه في حلي=أضيع تالي السوره
اخذ روحي وراح بها=على ماراد يدبها
لعله مايعذبها=عذاب الروح غربالي
يشيل الورد في شيشه=حرمني لذة العيشه
على خده نقاريشه=ثلاث رقوم وهلالي
إذا هميت ابا اضمه=رفع صوته ينادي أمه
مزوح من كبر طمه=يصيب القلب ولوال


:: المصدر ::
كتاب صبا نجد (عبدالرحمن بن عبد الله آل عبد الكريم )
المعروف بأبو عبدالمجيد

 

الرد مع إقتباس
  #3  
قديم 18-03-2008, 12:20 AM
ابو الفوارس ابو الفوارس is offline
عضو مثالي
 





ابو الفوارس is an unknown quantity at this point
 

 

الله يغفر ويرحم لشاعرنا الفارس وبيض الله وجهك يابو سعد

 


::: التوقيع :::

url=http://bnyzid.com/][/url]


 

آخر تعديل بواسطة ابو الفوارس ، 18-03-2008 الساعة 12:28 AM.
الرد مع إقتباس
  #4  
قديم 18-03-2008, 01:38 AM
الصورة الرمزية لـ سعد الحامد
سعد الحامد سعد الحامد is offline
ابو عبدالرحمن
 






سعد الحامد is a jewel in the roughسعد الحامد is a jewel in the roughسعد الحامد is a jewel in the rough
 

 

ماشاء الله تبارك الله

شاعر يشار له بالبنان

اتحفتنا يامحمد بهذه الدرر وربي

الله يعطيك الف الف عافيه

تقبل مروري وينقل الموضوع للمفضلة

تحيتي لك

 

الرد مع إقتباس
  #5  
قديم 18-03-2008, 02:12 AM
الصورة الرمزية لـ عبدالعزيز عبدالله الجبرين
عبدالعزيز عبدالله الجبرين عبدالعزيز عبدالله الجبرين is offline
مشرف القسم العام
 






عبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of lightعبدالعزيز عبدالله الجبرين is a glorious beacon of light
 

 

الله يرحم شاعرنا والذي اُخفي من قصائده اكثر من المنشور..

حدثني احد اهالي شقراء ان قريب له من الملازمين لشاعرنا كثيراً قد قام بإحراق الكثير من القصائد له بعد

وفاته !!

 


::: التوقيع :::

اللهم أسالك ان ترحم والدتي وشيخنا ابن جبرين و تغفر لهما ولجميع المسلمين انك سميع مجيب



 
الرد مع إقتباس
  #6  
قديم 18-03-2008, 08:02 AM
الصورة الرمزية لـ سعود الصبي
سعود الصبي سعود الصبي is offline
:: نائب المشرف العام ::
 






سعود الصبي is just really niceسعود الصبي is just really niceسعود الصبي is just really niceسعود الصبي is just really nice
 

 

الله يرحمه ويغفر له

شاعر كبير (( شاعر الموقف ))
الكثير من قصائده أصبحت تُنسب لشعّار آخرين

الأخ العزيز
محمد بن سعد المهنا

سلسلة إبداعك تستمر

عافاك الله

 


::: التوقيع :::

أحياناً يكون أبلغ رد هو عدم الرد


 
الرد مع إقتباس
  #7  
قديم 18-03-2008, 11:14 AM
الصورة الرمزية لـ فهد العيسى
فهد العيسى فهد العيسى is offline
عضو v.i.p
 





فهد العيسى is on a distinguished road
 

 

الله يرحمه ويغفر له

والله يعطيك العافيه

وبيض الله وجهك

 

الرد مع إقتباس
  #8  
قديم 18-03-2008, 11:51 AM
sultan sultan is offline
عضو v.i.p
 





sultan is an unknown quantity at this point
 

 

الله يرحمه ويغفر له

والله يعطيك العافيه

وبيض الله وجهك

 

الرد مع إقتباس
  #9  
قديم 18-03-2008, 12:41 PM
الصورة الرمزية لـ saleh alrajhi
saleh alrajhi saleh alrajhi is offline
عضو نشيط
 





saleh alrajhi is an unknown quantity at this point
 

 

يعطيك العـــــــــــــــــــــــافيه ....................يا اخوووووووووووووووووووي ...على هالدرر.............

 


::: التوقيع :::

على كـف القــدر نمشــي ولا ندري عن المكتوب.........
كنـــــــــــايــــة كنت أرددها صـدق من قال معناها..........


 
الرد مع إقتباس
  #10  
قديم 18-03-2008, 03:09 PM
ابو ريما ابو ريما is offline
كاتب متميز
 





ابو ريما is on a distinguished roadابو ريما is on a distinguished road
 

 

رحم الله الشاعر واسكنه فسيح جناته..وجزاك الله خيرا على هذه القصائد يابو سعد..وقد كنت ابحث عن بعضها..
ابو ريما...الدوادمي

 

الرد مع إقتباس
  #11  
قديم 18-03-2008, 10:04 PM
الصورة الرمزية لـ زكي بن سعد أبومعطي
زكي بن سعد أبومعطي زكي بن سعد أبومعطي is offline
فتى بني زيد
:: الإدارة ::
 






زكي بن سعد أبومعطي has a spectacular aura aboutزكي بن سعد أبومعطي has a spectacular aura about
 

 

موضوع قمة في الروعة

ودرر كما تعودنا منك يابن العم الغالي

رحم الله مبيلش وغفر له ، شاعر متميز

ومن عرف شعره شهد له بذلك

 


::: التوقيع :::

منقــطع مــؤقــــتاً عــن الدخــول للمنتـــدى


 
الرد مع إقتباس
  #12  
قديم 18-03-2008, 10:08 PM
الصورة الرمزية لـ زكي بن سعد أبومعطي
زكي بن سعد أبومعطي زكي بن سعد أبومعطي is offline
فتى بني زيد
:: الإدارة ::
 






زكي بن سعد أبومعطي has a spectacular aura aboutزكي بن سعد أبومعطي has a spectacular aura about
 

 

العجيب يا أخوان أنني لم أكن أتوقع أن الشاعر يهتم بنسخ الكتب والأوراق مثل كتب السلف وغير ذلك ، وقد وجدت رسالة اسمها ( موعظة ) وهي لابن قدامة المقدسي على آخرها اسم الشاعر لأنه نسخها ، وهي في مخطوطات شقراء الموجودة الآن في مكتبة الملك فهد الوطنية بالرياض ، ولا يوجد تاريخ للنسخ لكنها من ضمن مجموع نسخ أغلبه ما بين عامي 1317 - 1346هـ وهي نفس فترة الشاعر

 


::: التوقيع :::

منقــطع مــؤقــــتاً عــن الدخــول للمنتـــدى


 
الرد مع إقتباس
  #13  
قديم 19-03-2008, 10:11 AM
محمد بن سعد المهنا محمد بن سعد المهنا is offline
عضو مثالي
 





محمد بن سعد المهنا is on a distinguished road
 

 

جزى الله خيراً كل من علق وشكر ...ولأبي سعدٍ زكي شكر خاص على هذه المعلومة

 

الرد مع إقتباس
  #14  
قديم 19-03-2008, 12:24 PM
الصورة الرمزية لـ فراشة ابوها
فراشة ابوها فراشة ابوها is offline
عضو مبدع
 





فراشة ابوها will become famous soon enough
 

 

جزاك الله خير اخوي
يعطيك العافيه على القصائد الرائعه
دمت متالق

 

الرد مع إقتباس
  #15  
قديم 09-04-2008, 06:10 PM
دايم دايم is offline
عضو مشارك
 





دايم is an unknown quantity at this point
 

 

شاعرية مبيلش لم تنل نصيبها العادل من الاهتمام والجمع والتوثيق والدراسة
شاعرية مبيلش ظلمت كثيرا
هناك ابيات كثيرة استوقفتني منها على سبيل المثال لا الحصر


ذيب يا اللي بخشم طويـق جيعـان=====دوك الارزاق وجـرك للعـوا خلـه

يـا سحـاب ثقيـل نـو غضبـان=====فوق صنعا تعرض والغضـب هلـه



يا غريس طويق شرع ترى المربع خصيب==تو ما هب الهوى لك وطاب الك الشـراب


لابتي سلة بني زيـد والطيـب ظهـر====لاجت الضيقات مايظهر الا المستحيـن
ضربنا بالراس والا على حـد الظهـر====في عدو الدار تلقـا مضاربنـا تبيـن
ياعمار بالمواسـم نعرضهـا الخطـر=====والمنايـا والمقاديـر تكتـب بالجبيـن


رماني ردي حظي على شرقي الاسياف====على ساحل البحرين نـوخ مراحيلـه
على ديرة البرغوث في مقعد ينعـاف=====عدوك من الناس البعيدين تـاوي لـه
إذا جاك في تال زمانك سمـوم جـاف=====ونجد بتالي الوقـت قلـت محاصيلـه
ترحلت مـن دار لـدار بهـا ميـلاف======ولاكل من ساقـه زمانـه بيافـي لـه
ادور بركب الغوص رزق من الاصداف======ابقاع البحر والقرش دايم يبـاري لـه
سرى البرق صيفي مشافه قطن نداف=======تتابـع تواليـه الاوايـل وترفـي لـه
أخيله وأنا دمعي علـى وجنتـي ذراف======كما وبل هملول جـرى فـي مساييلـه
أراعي نجوم الليل والغيـب ماينشـاف======وادير الفكر في غاية العـز والحيلـه


رحم الله عبد الله بن محمد بن عبد الله الصبي واحسن اليك وجعل الجنة له بيتا

الله يعطيك العافية على هذا النقل الرائع يامحمد
والشكر موصول لابو عبد المجيد










قبل ابوتركي وحنـا مـع الـدرب المتـاه=====في سواريت الجفا بيـن ماسـور وقتيـل

 

الرد مع إقتباس
المشاركة في الموضوع


خيارات الموضوع
طريقة العرض

قوانين المشاركة
لا بإمكانك إضافة موضوع جديد
لا بإمكانك إضافة مشاركات جديدة
لا بإمكانك إضافة مرفقات
لا بإمكانك تعديل مشاركاتك

كود [IMG] متاح
كود HTML غير متاح
Trackbacks are غير متاح
Pingbacks are غير متاح
Refbacks are غير متاح

 
جميع الأوقات بتوقيت السعودية. الساعة الآن » [ 05:39 PM ] .


Powered by vBulletin Version 3.6.4
Copyright ©2000 - 2019, Jelsoft Enterprises Ltd.
SEO by vBSEO 3.1.0 ©2007, Crawlability, Inc.
حقوق كل مايعرض في هذا المنتدى محفوظة لمنتدى بني زيد
www