كشتنا وجمدنا

ماجد المنيع · #1 24-12-2007, 03:09 AM

بسم الله الرحمن الرحيم

السلام عليكم ورحمة الله وبركاته ...

بعد عيد الاضحى قرر بعض الاصدقاء القيام بكشتة صغيرة

لتكون افتتاحية الكشتات لهذا الموسم

الموعد كان رابع العيد بعد الظهر الانطلاق

والصراحة ان المكان عادي جدا (( الثمامة ))

والسبب ان البعض قد بيت النية للرجوع تلك الليلة

وقرر البقاء 3 أشخاص للمبيت

الجو كان مقبول عكر صفوه الهواء البارد والذي لم نشعر به داخل الخيمة

لكن الغير متوقع هو البرد القااااااااااااارس جدا والذي طب علينا فجأة وبدون سابق انذار

بالنسبة لي كنت قد استعديت بفراش وثير وخيمة مبيت <----- فرحان توني شاريهن

ولانني من الفجر لم انم فلم تبلغ العاشرة الا وأنا " افخ " يعني مستغرق في النوم

قمت قبل الفجر شبعاااان نوم بس حسيت ان البرد مهوب خوينا حق أمس وكأنه زاد جدا

لولا أصوات الدبابات التي ظلت تطنطن فوق رؤسنا لكنت رجعت لنومي لو بالغصب

لكن الصوت كان مزعج جدا

انتظرت دخول وقت الفجر ثم خرجت من خيمتي وتفاجأت لما رأيت ..

الطعوس اللي مفروض تكون صفراء أو حمراء أصبحت بيضاء

ولن تحتاج لا اقول لك بحالة الجو

اخترت لكم من هالرحلة البسيطة جداً هذه الصور

-1-

هذا الموقع اللي حنا فيه

موقع ممتاز ونظيف وقريب جدا

بس عيبه الدبابات المزعجة

-2-

صراحة رحمت الموتر يوم شفته متجمد بغيت اشبله ضوية عشان يدفا <---- عشان يقب ويحترق بسم الله عليه

-3-

تخيل قايم انت ووجهك بتشب النار وتلقى الحطبة صايرة قالب ثلج

-4-

صورة متعوب عليها رقيت طعسين متجمدات الين وصلت لهالطعس المزيون

-5-

صورة ثانية للطعوس المتجمدة

:::::::::: يتبع :::::::::

ماجد المنيع · #2 24-12-2007, 03:10 AM

الجزء الثاني من الطلعة كان ممتع

فبعد طلوع الشمس دفينا شوي وبدينا بالفطور والسواليف والتسدح والتبطح

اليييييييييييين قربت الشمس تغيب فقررنا نسعى بالغداء

طباخنا كالعادة ابو فهد جعله يسلم

لكن ابوسليمان قرر المشاركة هالمرة وبصنف جديد على رحلاتنا البرية

وهو طبق من المطبخ الهندي

فصار عندنا هالمرة طباخين ...

أنا بما اني لا افقه في الطبخ الا تذوقه فقط

فقررت اني التزم بتقطيع الخضار المطلوبة واصير مساعد طباخ <--- مساعد طباخين بالاصح

-6-

هذي مقادير الطبخة الهندية

لان ابوفهد مسوي كبسة رز وكلكم تعرفونها

-7-

مطبخنا المتواضع

لا يغركم انه صغير بس يطلع منه طبخات انما ايه

-8-

هذي المقادير بعد وضعها في القدر
طبعا هنا بتلاحظ الدعوة كلها طمام والماء قليل جدا
حتى تكون المرقة ثخينه

-9-

ابوسليمان وابوفهد

كل واحد يشرف على طبخته
بس ابشر كم تراهم ما تهاوشوا ابد

-10-

ابوسليمان قرر يكمل طبخته على نار الحطب
لاضفاء نكهة السمر < --- أو منحاش من ابو فهد

-11-

هذي مالها دخل بالطبخ بس ابوريكم تقطيعي للسلطة

-12-

وأخيرا العشاء بنية الغداء

مكون من

كبسة من يدين ابوفهد
طبق هندي من يدين ايوسليمان
سلطة من يدين ماجد المنيع
بطاطا مشوية من يدين عبد الرحمن

وتعشينانا وانبسطنا
وظفينا عفشنا وجيناكم

عسى الموضوع يجوز لكم وتكشتون
وتلبسوا تراها برد

عبدالعزيز العماني · #3 24-12-2007, 03:18 AM

بسم الله الرحمن الرحيم

تقريرشتوي روعه بس أحسن شئ هالوقت الواحد يتفرج على التقرير بدون ما يعتب باب بيتهم لكن حمد لله على السلامه اخوي ماجد ولا تعبتولكن تقريرك رايق وكايف

بنت العيسى · #4 24-12-2007, 03:27 AM

والله صفقنا البرد بهالموضوع

ولكن اعجبتني عدستك في التقاط ذرات الثلج على الطعووس

تقرير جدا رائع ويجوع بهالبرد

*

جووووووري · #5 24-12-2007, 03:29 AM

ماشاء الله عليك تقرير

يااا صبركم ناايمين في خياام بذا البرد و احنا بالبيت

عسانا ندفى

يعطيك ألف عاافية صوور خطيرة و طبخ ريحته وااصلتني

هوتميل · #6 24-12-2007, 03:56 AM

تقرير رائع

واحلى صورتين الطعوس ...تصوير ولا اروع

مشكور اخي ماجد بارك الله فيك

جودي آبت · #7 24-12-2007, 04:12 AM

ياصبركم تقعدون بهالبرد لا ومعه ازعاج دبابات تكمل

عدستك رائعه اخوي ماجد ..

كويس اللي ماجمدتو هناك ..

الحماده · #8 24-12-2007, 05:45 AM

كذا ولا غبر كذا

الصاروخ · #9 24-12-2007, 07:29 AM

يازين الكشته في البر تمنيت اني معكم

ويازين الكبسه الي بين العغد والعشاء

بس عندي سوال محرج ليش الي في الصوره ياكل بيديه الثنتين
الا من اللحم ماستوى ولحد يمسك عليه

رحله موفقه وجميله

فراوله مع شكليت · #10 24-12-2007, 08:53 AM

حلو تصوير الطعوس..

أميره بكلمتي · #11 24-12-2007, 09:45 AM

عليكم بالعافيه

ماشاء الله تصوير رائع ...بس تبي الصراحه
اذا جاء الشتاء ياالله ياالله اصل المطبخ وشلون عاد طلعة البر

بنت آل غيهب · #12 24-12-2007, 09:06 PM

يازين طلعة البر وتصير ازين إذا صار برررد

^
^
قمــــه هالصوره

يعطيك العافيه .. وبإنتظار باقي الكشتات

snaipr · #13 24-12-2007, 09:13 PM

ماشالله تبارك الله

تقرير ممتاز ورحله ولا اروع

والتصوير خيال
والاكل ما يحتاج

اللحمدلله على سلامتكم
وتقبل مروري

نجمة سما · #14 24-12-2007, 09:54 PM

ماجد ،، طلعتكمـ خطييييييييييييييرة إيه هذي الطلعة اللي توسع الصدر
ومدام مامعكم بزرااااااااان ماعليكم خوف من البرد إن شاءالله

والتقاط الصورة احترافي ماشاءالله تباركـ الله
ممكن تعطينيا نبذه عن كاميرتكـ "نوعها لوسمحت "

sn3ah · #15 24-12-2007, 11:33 PM

وش ذا الزين ماشاء الله ..
داايم اقولها لك وابعيدها ,..
اني اكره الكشتات والبراان
بس مدري ليه اذا شفت كشتتااتكم وترتيبااتكم وصورك الزينه .. احس ودي ادق سلف واكشت<-- توقعي بس

اول 5 صور مع صورة السلطة والمرقوق اليماات وفنانات وبطلاات .

الله يعطيك العافيه ولا يحرمنا من هالموااضيع الزينه