ثلث الهجوس اللـي مـن اول مفاهيـق=اليوم منها الكـون فـي ناظـري ضـاق
في حيّز افكـاري تناجـت مـن الضيـق=لجت اعواهـا ثـم جتنـي علـى سـاق
لـو ثلـث قاسمهـا إلـى الان ماسيـق=يقطب صلف يوم انتهت منْـه الاخـلاق
وحديّتهـا ليـن إنشـبـت بالمعالـيـق=وعقب اشرقتني..صحت..ياهجوسي سباق
روحن ومضمـار السبـق قِنّـة اطويـق=كلن علـى الله تكلتـه يـا اهـل الاذواق
ويـوم اعزمـن رددت مثنـى وتفريـق=لبااا هواجيـس ٍ علـى الشعـر تنسـاق
وعطيتهـا كامـل زهـاب الطـواريـق=من خـوف يلحقنـي مشاريـه واقـلاق
ورقيتهـا مـن خـوف قـلّ التوافـيـق=وأعذتها مـن شـر صـادوف الاغـلاق
وطقـت لهـا مـر ٍ علـى فكـة الريـق=لونه على دهـم الصفـا ضـوح بـراق
عن كبدهـا الضرمـه تقطـع بتحريـق=وردت نفسها عقب ما جـت بـه إلحـاق
ومن يـوم حقـت طلعهـا (والمسابيـق=معها) ..ونتـل السيـر ماعـاق ماعـاق
ذابـت سما..دجره..وهقوه..وتوثـيـق=واهووت علـي وكنهـا النجـم شعـاق
اغيـب منهـا (ثقـل) واشيل..وافـيـق=اغيب..واجهـد زود وتزيـن الاوفــاق
واجبر عزومي غصب لين انـي اويـق=مـع (نايفـات ٍ سدهـا)..كـل مــالاق
واشرف على فيضة عـذاب العشاشيـق=وشفّ الطريح اللي نقـل فـوق ماطـاق
اطـب واخـذ مـن شجرهـا زمالـيـق=نقوة (محكحك علـم) ماهـوب طربـاق
حتـى حصيلـي يلفـت انظـار ذويـق=وغيـره عسـاه فـداه ياعـلّ مــاذاق
والهيض وهبه عنـد بعـض المخاليـق=شيٍ يجـي الانسـان مـن عنـد خـلاق
وبيـن الصيـارف فرق..دقـه وتدقيـق=وش طيّر اسعار الذهب وسط الاسـواق؟
لـولاه طيـب.. ماحصـل فيـه تفريـق=(اصله كذا) يجذب علـى كـل الارنـاق
مثـل البشـر بالضبـط فيهـم مطاليـق=وفيهـم قليـل الفيـد عـالـه وبــواق
إنْ مـا فضـا راسـك بكثـر الخثاريـق=والا تفلّش فـي يـدك خمسـة اشنـاق
والصـدق مايحتـاج مشهـد وتصديـق=(مشكلته انه ينقـل احسـاس الاعمـاق)
وحنا بوقـت ٍ (هااات..)نسخه..وتلصيـق=رحنـا علـى ماقيـل تقسيمـة إعـراق
تخالـط العقـبـان هــي والغرانـيـق=والناتج الجبري:- ترى الربـع عشـاق.
وطبقـت كـل ابنـود مافـات تطبـيـق=ولا.. سالم ٍ. من نكبته غيـر الاشـواق
ويالله بوجهـك عـن سبيـل المطافيـق=وعن شذبة العرقوب من مـوس حـلاق
وعن مدرج احساب الفلك كـل تشريـق=حتـى تضاخـم قدرتـه عبـر الآفــاق
وصار يتخيـل صـورة الكـون بابريـق=تنجيـم لا يصـدق.. ولايقـطـع ارزاق
والتفرقـه علـه .. وتحتـاج تحقـيـق=تداركـوا قــدام (مـاعـاد تنـحـاق)
مـزق زناديـق البشـر شـر تمزيـق=ياربنـا ندعيـك ممـسـى ومـشـراق
ونشوة عروس الجان (خطـه وتطويـق)=وتجهيـز كامـل هيكلـة نظـم الانفـاق
وتنفيـذ رغبتهـا علـى شكـل تنسيـق=اسواق بيع النفـط فـي خطـة إغـراق
دفنتها فـي اعلـى الرجـوم الشواهيـق=كم واحد ٍ يحسـب هدفنـا علـى فـاااق؟
والشك يجلـب وزر.. والقصـد تعليـق=كـل ٍ يعـلـق ظــن بـالـه بمـعـلاق
ذالحيـن كـاش وراح وقـت المفاهيـق=الله يعيـن امعاقـب ٍ خـاطـره ضــاق

هلا ! بـنّ اشقـر(ن) رايب ! تمثنى .. دلّة الرّسلان=هلا ! وبهـارها عويدي ! هلا ... ومبهّره بـ الهيل
هلا فيكم .. قنـيـف(ن) مرتـدم ! في جوفه الودّان=هلا ! نشو الطـهـايف ! من بعد رذراذها بـ السيل
هلا ! والرّازم الرّاعد ! خلوج(ن) .. تبكي الحيـران=هلا ! نـوض البـروق اللي تراهش في عباة الليل
هلا ! وسمية(ن) هـلّـت .. هللها هـاتف(ن) هتّان=هلا ! شقر الثعول اللي ... تسوق من الشفق تفصيل
هلا ! غبّ المطر لا جت ! نسانيس(ن) .. تجرّ الحان=هلا ! ريح السمر فيكم .. سلام من الجدي لـ سهيل
هلا ! خضر الفيـاض اللي .. تسـاقى منها الغدران=هلا ! نوّار وخزامى ! هلا ... ورد(ن) بـ جال الغيل
هلا ! ترنيمة الورقا ! بـ صوت(ن) يجرح الأغصان=هلا ! عين اشقر الجنحـان ! لا خـذ عـنّه الحلحيل
هلا ! بنت الحصان اللي ... نسبها ياصل كحـيـلان=هلا ! وامرابع امهار(ن) ! هلا .. شوفة عتاق الخيل
هلا ! حـب الـريـاض اللي ! تعدّى عندي الأوطان=هلا ! شقـر الـجـبـال اللي ! مراقيها تهـدّ الحيل

هَذي حدود السـمـا ! والغيم .. فَـ القِمّة=أداعبه واسرجه .. واشرِف على ارجـومه
وهذا المسا غير ! لونه .. طعمه .. وشمّه=مدري رقيته .. أو ادلَـتْ يـمّـي انجومه
أشوفـها كلّها ! بـ العين .. مِـلـتَـمّـه=واحِسّـها كلّها ! فِـ القلبْ ... مَلـمـومه
هنا (الجدي) مرتكز ... يا مضيّع اليـمّـه=وهنا (سهيل اليمن) .. والبِشرْ بـ قـدومه
وهنـاك ضـوح (الثـريّـا) ! يجلي الغمّه=واللي ورى الضوح ! جوريّة .. ويشمومه
هِنـا اجتمعنا .. ولد عـمّ ! وولد عـمِّـه=هِنـا جمعنا الوفـا ! واليـوم .. هو يومه
من ساس (زيد القضاعي) ... عالي الهِمّه=الشايب اللي ... خذا في علمه ! احلـومه
أنا اشهد انّه ! يطول .. ويـارد الجَـمّـه=وانا اشهد انّه ! يـبـلّ الكبد .. بـ علومه
ورّث قروم(ن) .. تـِفـلّ الراي وتلـِمـّه=من ورثهم ! فِعل (زيد الجد) .. وسلـومه
الله جمعهم .. على طِـيـبـه ! ومن دمّه=نوادر(ن) لـ احتمت ! ما صكّت الحـومة
وان ثار عـجّ الدخن .. والهـيّـه امطمّه=مافيهم اللي ... يحسب حساب لـ خصومه
ماهي حـمـيّـا .. وغير (العود) ما اذمّه=المـرجـلـة ! بين كل الناس .. مقسومة
يا لابتي ! يـ القـنـا ! في ذمتي .. ذمّه=إنّي بِكم صِرت ! فوق المِـزن وخشـومه
هذا المسا غيـر ! لونه .. طعمه .. وشمّه=وانا رقيته ! وكـفّـي ... صـافح انجومه