يوم كنت صغير (قصص طريفة) (2)

رابط القصة الأولى :
يوم كنت صغير (مواقف مضحكة) شاركنا وأمتعنا ..

القصة الثانية

في أحد أيام زمان ..

مسكت مع أخواني يبون يلعبون كورة في الشارع مع عيال الحارة ..

أوكلو لي مهمة تجهيز أبواب الفريقين (وهي عبارة عن حصاتين توضع باب لكل فريق)جهّزت باب الفريق الأول ..

واتجهت لتجهيز باب الفريق الثاني

كنت شايل حصاة كبيرة بيدي الاثنتين ..

شفت قدامي سيارة مقبلة ..

جاني ابليس وقال : وش رايك ترجم هالحصاة على السيارة اللي بتجي !!!!

أنا بصراحة استحسنت الفكرة واستوت في راسي ..

اقبلت السيارة ..

وسميت بالله طخخخخخخخخخخخخخ

على باب البنزين (أول نسميه بنزيم)

ثم تفاجأت أن البنزين سال على الأرض !!

والله إلى الآن ما أدري وشلون سال !!!

أنا انحشت ودخلت البيت ودخلت في أحد الغرف وصكيتها ودخلت في أحد الدواليب وصكيت الدالوب عليّّ !!!

كل هذي الإجراءات خوفا من ابوي الله يحفظه ..

وجلست أنتظر .. وتمنيت ان الأرض تبلعني .. وقلت لنفسي ياملقوووووووووووف وش خلاك ترجم الحصاة ؟؟؟

تمنيت وقتها أني أموت ولا اشوف ولا أعيش هالموقف الصعب ..

فجأة .. سمعت صوت ابوي يناديني ..

أنا بصراحة تورطت ..

وقلت ما ينقذني من الموقف إلا أني أسوي نفسي ميّت يمكن يرحمني ويخليني !!!!!

(تلعب على مين يالحبيب)

كنت أراقب دخول أبوي من فتحة الدولاب ..

دخل أبوي الغرفة .. وهو يناديني ..

فتح ابوي الدالوب ..

أنا بدوري بدأت بالخطة وسويت نفسي ميّت !!!!!

جا أبوي وشقلني (يعني حملني على كتوفه) وكنت مستمر في التمثيل .. ولا قلت ولا كلمة .. ومطيح يديني يعني إني ميت ..

أبوي عارف استهبالاتي وثقالة دمي ..

وقال لي : خل هبالك ينفعك إذا وديناك للشرطة وسجنوك ..

أنا بأسلمك للرجال وهو بيوديك للشرطة ويسجنونك ويجلدونك !!!

أنا بصراحة دب في قلبي الرعب ..

قلت ياولد الدعوة جد بلا تمثيل بلا خرابيط ...

وأصرخ ذيك الصرخة (لااااااااااااااااااا) .. تكفي يابوي .. تكفى خلاااااااااااااااااااص..

وهو متجه بي للشارع وهو يردد ياويلك ويلاااااااااااه ..

طلع بي في الشارع ولقيت الرجال ينتظر .. والبنزين يصبصب ..

قال ابوي هذا الولد خذه معك للشرطة ولا عاد تجيبه لنا !!! ..

أنا تحطمْت وتحطمَت آمالي (الله أكبر يالآمال)

وقعدت أصيح بأقوى ماعندي ..

الرجال رحمني الله يرحمه..

وقال خلاص أنا بأسامحك بس لا عاد تعوّدها ..

قلت والله العظيييييييييم واقققققققققققققققسم بالله ماعااااااااااااااد أتعودددددددددددها ..

طبعا أقسّم وأحلّف وأنا أصيح

فتركني أبوي ودخلت البيت وأنا أشاهق من الصياح ..

وكان موقف حكيم من والدي حفظه الله

بعدها تأدبت صح ...

وترقبوا الحلقة الثالثة ( يوم شلت الدب الباكستاني)

وفي أمان الله

:( :( :(
ذكريات جميلة
ما تلعب ياناصح
ننتظر الموقف الثالث الله يستر
وش يصير بعد
لا يكون ( شنقلت ) بالباكستاني

ابن العم / هوتميل

الشدة له أثرها الإيجابي وشي لمسناه ..

وخل عنك كلام علم الطفس ..

شكرا لمرورك أخيي

بنت العم / جمانة العالم

أشكر لك حرصك ومتابعتك وانتظري قصتي مع البزر الباكستاني

هههههههههههههههههههههههههههههههههههههههههههههههههه


اتحرى الحلقه الثالثه بلهفه

يا ولد عمي

ما تلاحظ ان عندك مشكله مع الحصا ؟؟

يعني انه يسبب لك مشاكل

الله يعينك على طفولتك

الســـــــــلام عليــــــــــكم

جا أبوي وشقلني (يعني حملني على كتوفه) وكنت مستمر في التمثيل .. ولا قلت ولا كلمة .. ومطيح يديني يعني إني ميت ..

والله ابوك حبيب الا ماتوطاء في حوض بطنك :( :(

وكان موقف حكيم من والدي حفظه الله بعدها تأدبت صح

تأدبت ومشالله القصه الثالثه جايه لا والله الي تدبت:( :(

اقول صح انك اقشر شوي وانت صغير لكن محاكيك عنده ماواقف الله لا يوريك نسج من الخيال ومن افلام الاكشن والكوميديا عدد خواني يالله من فضلك 11 ما شاء الله شكلي من كثرهم بوزعهم 4 4 2 خطه :( :(

يعطيك الف عافيه اخوي ناصح ذكرتني بيام الطفوله والحقيقه كتابه وقصص رائعه

ننتظر الجزء الثالث والله يستر لا يكون فيه حصا :( :(

تحيــــــــــاتــــــــــــي لك ...

ابن العم / منسدح باللفة (انتبه لا أحد ياطاك )

أشكرك على الضحك وشكرا لمرورك وانتظر الثالثة

ابن العم / برق الشوق ..

وافقت سبحان الله .. بس القصة الجاية ما فيها حصى فيها شي أعظم من الحصى ..

شكرا أخيي على المررور

ابن العم / محب المرحوم ..

عندنا وعندك خير .. وتكفى إن كان عندك قصص قلها خلنا نوسع صدورنا ..

ما ودي أدندر لحالي ..

هههههههه والله أيام الطفولة حلوة بالمرة وتحليها أحيانا الشقاوة بس مو لها الدرجة فك الله راس الرجال ولا جته الحصاة ولا صب دمه وجزاه الله خير اللي سامحك
ننتظر المزيد من ابداعاتك بفارغ الصبر

بنت لعم / لؤلؤة نجد ..

ياحليلك محسنة الظن ..

فضخت راس الرجال بالحصاة اللي بيدي وصب دمه ..

وفضحت راس أخوي مرتين وصب دمه ..

هههههههههههههههه

:( :(

إقتباس واما كتب علم النفس الي تقول ...لا تعلمه بأخطائه عشان ما يتحطم وترسخ المسألة في باله خرطي

بنت العم / شجرة طيبة ..

هو صادز

ما يستنتج من القصة الاولى والثانيه

ان البطل يعشق شي اسمه حصا ...

وش قصتك مع الحصا ؟؟؟؟؟


اما وانت مسوي نفسك ميت احس انك مطلع لسانك مثل الخروف المذبوح

بنت العم / نس نس ..

تعرفين بزارين أول يرقد ومعه حصاة

أشكر لك مرورك بنت عمي

بارك الله فيك على ها المواقف الحلوة ..