غالي و أراعيك و أنهر كل من هانك=كنك غزالٍ بعينــي و أنتـــه شيينــي
أرجيك تكبر و أشوفك خيرة أقرانك=من كثر حرصي عليك مقابلٍ عيني
يا صبيّ لا تقهر الي تعب من شــانك=من صغرتك يا ضنايه وأنت بحضَيْني
تسعــة شهور جرى دمّي بشريـــانك=بين الحشــايا حفظتك داخل بطينـــي
خمســـة شهورٍ ترجـّفنــي بسيقــانك=والأوله بي نساةٍ و أمشــي هْويْنــــي
دافي حناني و صدري والحضن صانك=محدٍ فرق يوم جبتك بينك و بينــــي
أسهرتنـي تشتكي تطليعة أسنــانك=وفْرحت يومه بدا يظهر لك سنينـي
جافيت أبيّك بسبة طولــة لســـانك=عقبك غدا من صياحك وينه و ويني
بالليل ألوحق على رجليك غطيانك=و النـــوم حرمٍ عليّـــه قبل ثنتينـــي
أرهيت لك بالعطا وأكرمت صحبانك= مطلبك ما ردّ لو صار ألف أو ألفيني
أكرهت أبوك و شرى لك مثل رفقانك=موتر و لأجلك حديته يركبه دينــي
وأول عقوقك تواجهنـــي بحقرانك=لامن نصحتك جزايه ردّك الشينـــي
تعصي إلهك و تتبع شور شيطانك=وأنت متعلم تعرف الشين و الزيني
كودك تسنّع و تمشي مشية أخوانك=الكل قالوا رضا الله يوم ترضَيْنــي
أرجي صلاحك و ماشِ عيال عمّانك=والهـــادي الله و لا هيبـــه بالأيدينـــي
29-10-2007, 06:01 PM
النمط الشجري
