بسم الله الرحمن الرحيم ..


السلام عليكم ..


حياكم الله عدد ماهل وبل الغمام ..
بدخل بالموضوع دُغري ..

قبل كم يوم اخونا عارف ..بيض الله وجهه نزل موضوع يتكلم فيه عن ..سميراء ..او السمراء ..او كما كانت تسمى قديماً وعلمياً بمجم العيصان ..وكان هناك تفاعل عن الموضوع ..وكان اغلب الاعضاء يتمنون انه استشهد ببعض الصور كي تتسنى لهم ..رؤية ما سيق الموضوع لاجله ..
ومن بين هذه الردود ..كان رد الاخ الغالي دهران ..
وكان يستفزع بطارق الحصان ..ويقول وين اهل الدوادمي ..
عاد انا ملقوف تخبروني ..
وبما اني من اهل الدوادمي الصدززز ...قلت له ابشر ..وتزهلت له فيها ..
قالي كفو .<--تشققت من الوناسه وقتها ..

المهم عزمت اني اشد عزمي يوم الخميس بما انه يوم اجازة عندي ..واروح لسميراء ..

..عاد موقع سميراء ..حسب الطُرُقْ ..
فهي تقع بالجنوب من الدوادمي بحيث يكون اتجاهك مع طريق ماسل ..مايقارب 11كيلو ..وبعدها تنزل من الاسفلت بأتجاه الغرب اي جهة القبله بشطرة لشمال شوي ..بحيث ماتخلف وجهتك عن القبله ..
عاد هناك طريق ممهد الى حوالي 7كيلو ..وبعدها تبداء تتفرع الطرق المبتدعه من اهل الحلال والبدو هناكـ ..يعني بعدها عن الدوادمي ..مايتعدى 24 كيلو متر..

طبعاً يقالـ ان اهل المناجم هذي ..هم المجوس الذين قامو بحفرها ..وكان ذلك فالعصر العباسي ..اي قبل مايقارب 750سنه ..

والحين ببداء في بداية الرحله من طلعت من بيتنا الين ..ضفيت عزبتي ورجعت ..(طبعاً كنتـ ابيها خليويه ..يعني كنتـ بلحالي ..)


بعد ماجيت مصلي الفجر ..اخذت عزبة القهوة والشاهي ..وركبت موتري الي تحفظت ما اطلعه
لكم خوفاً من العين:((الا والله خوفاً من العزوبية )
المهم توكلت على الله ونزلت من الزفلت الين وصلت حول الفقور ..
وانا مغير اغني ..شين مكسر وشين يمشي حاله وشين فتحت الدريشه ونطلته ..

(دهران يالي سقت رجلي ع رضاك .. بالله رد العلم صووب الجفــاره ,,
مدهال طيبً حايد الضلع ملفاك .. بيوت طيبن على وضــح السفاره ,,)


المهم مالكم بالطويله ..

اقبلتـ على الفقور الين الوضع مهوب خبري ..الينهمـ صاكين الفقر الابو الكبير ..بالشبكـ ..
لكن ماردني ..
صورته من برا وبتجي صورته ..والله كان ودي اطمر لكن شبكهم مصيبه


هذي ,, الحين الصور ..من بداية جيتي لها ..
يعني من اول المعالم الي قابلتني ..



وهذي صوره للوحه الي قبل شوي من قريب ..ومكتوب فيها ..وزارة البترول والثروة المعدنية ..
ووكالة الوزارة للثروة المعدنية

بعدها اتجهت الفقر الكبير ..مع العلم انه بعد موسم كثر فيه الامطار ..خفست بعض جهاته ..والكلام هذا قريب ..

يوم اقبلت عليه الين الشبوك .. وحاطين لوحه بتشوفونها ان شاء الله ..والدنيا ..
فصورتها لكم ..

وهي كما هو اتي ..


وهذي صوره للفقر الكبير من ورى الشبك

وهذي صورته بعد ماركبت فوق السياره عشان مايحول دونه الشبك ..



بعدها ضاق صدري ..
وقعدت ادوج على ارجيلي ..واتجهت يم الفقور الصغار ..الي خابرهم ..فوق الحزم الي جنوب شرقي الفقر الكبير ..

وخذت لها كم صوره ..مع العلم قسم بالله ان واحد منها وانا اصوره ان جسمي كله جاه قشعريره ..وشعري وقف ..وفيه صوت بس مدري وينه جاي ..هالصوت ..

المهم هذي عاد صور الفقور
الارضيه ..الباقيه ..




هذا فقر لكن ماقدرت اصوره بوضوح الا بأتجاه الشمس ..ويمكن ماتجوز لكم الصوره .

وهذا عاد الغبي ابو ازعاج ..


وهذي الحين ..وانا راجع لسيارتي لقيتها ثلاث فقور متهالكة ..وفيها المدفون ..






عاد ركبت موتري ..
و قعدت ادوج الين وصلت منبث العروق على قولتهم ..
وهي عباره عن حُفر ممتده اشبه ماتكون مثل الخنادق بالارض ..وهي كي يتسنى لهم ..معرفة امتداد عروق الفضة ..بالارض.
وبعد ماسألت احد المختصين قالي ..
عروق الفضه بالارض ..او اماكن تواجد الفضه بالارض ..تكون على شكل سلسلة جبل تحت الارض ..
وايضاً افادني سبحان الله بقوله ان اماكن الذهب يكون فيها ضغف كميتها من الفضه اي ..ان كان هناك كيلو ذهب فسوف يكون هناك كيلوان من الفضه ..هذا على حد قوله ..وطبعا الكميه الوارده مجرد مثال ..

المهم هذي صور اثار التنقيب .. الي اقولكم على شكلـ ..خندق ..






هي صح الصور قليله ..وبما اني خفت انها ماترضيكم عيالـ العم ..
ادركت ان هناك شي اخر سوف يسعى لرضاكم ان شاء الله ولو بالشي القليل ..

في هناك حول ..الفقور بيوت قديمه لكن ما ادري قريبه ولا بعيد تاريخها وان شاء الله راح اسئللكم عنها ..واحد عنها شرق ..وواحد تقول انه شرق شاطر لشمال شوي ..

قلت مابدهاش مصور مصور ..ورب البيت كريم ..

رحت واخذت لها كم صوره ..
وطبعا ..ببداها ..من البيت القريب ..

وهي كالتالي ..:






وهينا ..الغرف الباقيه من البيت القريب عند الفقور ..والغرف الي اكل الزمان حقه منها ..






والغرفه ذي الله واكبر ماعاد باقي منها الا اقل من ربع الجدار ..كلها سبت المقاول حسبي الله عليه شكله
كان نصاب ..


وبعد مارجعت لسياره اتجهت الى البيوت الي بعيده شوي وهي تحت سناف ..ويتضح لكم ان السناف حافرينه ..ومذرين فيه للبيت ..ولكم الصور ..
مع العلم ان هناك بير في هالبيت لكن ..نسيت اصوره مدري وش الي اشغلني عنه ..المعذره ..



وهذي كل صور الرحله المتعلقه بالموضوع ..


وبعد ماصفى راسي ..من الدوجه والتمشي الي مامثله ..وزيادة على كيذا الجو الي كان من اروع مايكون مشمس لكن فيه براد ..يرد الروح ..

لقيت لي شعيبً كله شجر ..طلح ..كل شجره تقول الزود عندي ..
جلست تحت الشجره وبعد مانزلت اغراضي واللتفت وراي الين الشجره الثانيه احسن بألف مره ..واقوم واضف العزبه واروح يمها ..
هذي الشجره قبل لا اروح لها ..

لو تلاحظون ترا وراها شجره ..بس قهر مكتوب عليها للعوائل فقط..:(

رحت وفرشت فرشتي ونزلت الاغراض وركبت قهوتي ..وانا والله العظيم
ماكان في خاطري الا واحدً منكم ان ماكان كلكم ..معي ..

عاد هذي صورة القهوه وهي تطبخ ..


وهذي المعاميل ..ترى الدله توها جايه جديده ..ولا ابريق الشاهي عجزت انضفه ..ودي اكشخ قدامكم ..مير الشكوى لله ..



وهذا القدوع ..



وهذا فنجال بنن يقعد الراس فنجاله ..بس قهر كنتـ بلحالي تقول جني ..

((لاونيس ولا جليس ولا معي زولـ ,, افج له صدري وابيح له اسراري ..))
لـ سكراات ..طرى علي وانا بلحالي ..(صورة الوجه الي يبكي )






وهاذي كل السالفه ..والحتوته ..


عيالـ عمي ..

* اتمنى اني قدمت مايثريكم عن هذه الاماكن ..
* هناك اماكن اخرى غير ..الفقور هذي الموجوده في سميراء ..او كما تسمى بمنجم العيصان .. او السمراء...وهي نسبتاً الى مكانها المسمى بحيث ايضا كانت تسمى الدوادمي قديماً العويصي ..
*منها منجم الاحسن ..جنوب الدوادمي ..اماكن بالسدريه ..ام عثاكل ..شقيره ..وكلها معروفه لدي ..
*اعدكم ..ان الموضوع هذا ماراح يكون يتيم ..فأن شاء الله سوف يكون له اخوه بها مايفيدكم ان شاء الله ..
*اداة التصوير كانتـ كاميرا جوال n73.
ــــــــــــــــــــــــــــــــــــــــــــــــــ ـــــــــــــ


هينا جاء الكلام الي عليه العلم ..

اخواني لا احد ينتظر مني دعوه خاصة لزيارة الدوادمي ..بل ستكون الدعوه عامه للجميع من هذا الموضوع ..فما اكلف عليك هو بس انك بس تجي ..واترك باقي المتعه علينا ..
والله العظيم اننا بنفرح بالجميع لاصغيركم ولاكبيركم ..
فأنتم اهل لدار ..ونحن سنكون ضيوفكم ..وابرك الساعات ..

واتمنى ان تكون في هذه الاجازه الصيفية زياره منكم ليس للمنطقه فحسب ..بل لابناء عمومتاً لكم بشوق للقياكم ..

..
اخيراً :اعذروني على رداءة الصور ..وماجاء من قصور بالموضوع ..ولاتنسوني من دعاكم ..لي ولكم بعد ..

سبحانك اللهم وبحمدكـ ..اشهد الا اله الانت ..استغفرك واتوب اليك ..

لاهنت على الطرح المنتاز ولاكن في صوره كررتها 15مره وكل مره تعليق غير

ولا كن باذن الله ان اروح لها واشوف وش السالفه بكبرها

أهلين سكرات ,, بصراحة موضوع شيق و جميل ,, وهـذى المواضيع الى تفتح النفس ,,

ننتظر جديدكم ,,

بسم الله الرحمن الرحيم

بصراحه ماشاء الله كأني معك وأتابع الحدث في لحظته أسلوبك بسيط وحلوفي وصف الرحله بدون تكلف الله يعطيك العافيه بالفعل والله العظيم انها منطقه جديده في معلوماتي لاعدمناك يالذيب.
سكرات علم غانم وأنت راعيه ولاهيب غريبه على اللي مثلك وشرواك هاب ريحه وأبد نتشرف بشوفة اللي مثلك وشرواك لاهنت بن عمي

ماقصرت موضوع شيق ومتعووب عليه

فيه مثل عند اهل المنطقة اللي فيها الفقور منول يقولون :اذا جاك الخير ازبن الفقر:)

يعني اذا جاك المطر وانت تمشي حول الفقر جمعه فقور ازبنه على شان ما تتبلل

طبعا مثل قديم ويمكن اندثر مثل اندثار الفقور سمعته مع الشيبان

تحياتي

موضوع رائع سكرات

جهد وتعب واخراج رائع

معلومات لإول مره تمر علي

بارك الله فيك والله يعطيك الف عافيه ياغالي

تحيتي

موضوع رائع سكرات
والله يعطيك العافيه

وانشالله نروح وياك للموقع بس نشوف الامير دهران

سكرات

الف الف شكر على الموضوع الحلو

والتقرير الرائع

تقبل تحياااااااااااااااتي

صور روعة

الله يعطيك العافية

ابن العم سكرااات.... عز الله انك كفّيت ووفّيت، تقرير في منتهى الجمال.
أتمنى من المشرف تثبيت الموضوع لأهميته وليطلع عليه اكبر عدد من منسوبي وزائري المنتدى ليتعرفوا على ما تحويه منازل بني زيد من آثار هامة وجميلة توضح أهمية منطقة عالية نجد التاريخية.
شكر الله لك.

الله يعطيك العافية يا حلو

موضوع متميز وكعادتك

بس تسنك رايحن لحالك >>> وراك ما زهمت علي

يعطيك العافية أخي سكرااات على هذا التقرير
وهو تقرير رائع ومتميز
ورحلة ممتعة صحبناك فيها بسبب أسلوبك الرائع والبسيط
واستفدنا كثيراً من المعلومات الواردة فيه والصور الأكثر من رائعة

وهذا يدعونا إلى مطالبتك بالمزيد من هذه التقارير

وبارك الله فيك