(يا كاتب دن الطلحية) محاورةبديعة بين الصدق والكذب للشاعرسليمان بن مشاري(راعي الداخلة a

آخر المشاركات المطروحة في منتديات قبيلة بني زيد

  أدخل في 12 مشروع من مشاريع السقيا بأسهل وأسرع طريقة (صورة) ( آخر مشاركة : ساكتون    |    أسهل طريقة لكي لاتفوتك صدقة عشر ذي الحجة خير أيام الدنيا (صورة) ( آخر مشاركة : ساكتون    |    أوقف برادة عنك أو عن والديك أو عن متوفى أنقطع عمله لتكون له صدقة جارية لاتنقطع (صورة) ( آخر مشاركة : ساكتون    |    وقف رسمي بمكة المكرمة داخل حدود الحرم حيث الحسنة بمائة ألف حسنة (صور ( آخر مشاركة : ساكتون    |    أرخص كفالة حجاج في السعودية لعام 1440هـ (صورة) ( آخر مشاركة : ساكتون    |    لمن يشتكي من ازعاج من رسائل المسابقات ( 7000 ) ( آخر مشاركة : خالدالراجحي    |    موبايلي ايقاف مبيعات باقة الانترنت اللامحدود ( آخر مشاركة : خالدالراجحي    |    ماهي الأسباب المؤديه لبعض الأعضاء ترك منتدياتهم ؟!!! ( آخر مشاركة : ربيع الحق    |    أضِـف بصّـمَـتُـك اليَـوّمِـيّـة ( آخر مشاركة : سعود الصبي    |    كل عام وانتم بخير ( آخر مشاركة : خالدالراجحي    |   


العودة   منتديات قبيلة بني زيد > القسم الادبي > تراثيات وشعبيات وقصائد منقوله
التّسجيل   جعل جميع المنتديات مقروءة

(يا كاتب دن الطلحية) محاورةبديعة بين الصدق والكذب للشاعرسليمان بن مشاري(راعي الداخلة

المشاركة في الموضوع
 
خيارات الموضوع طريقة العرض
  #1  
قديم 04-04-2006, 10:08 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 
(يا كاتب دن الطلحية) محاورةبديعة بين الصدق والكذب للشاعرسليمان بن مشاري(راعي الداخلة

 

تحاور بين الصدق والكذب
نصب الشاعر الكبير المشهور سليمان بن مشاري بن علي رحمه الله نفسه يوماً من الأيام حكما بين الصدق والكذب وجلس للقضاء بينهما وأصغى لسماع أقوال كل منهما ثم ضبط القضية وأصدر الحكم فيها يلي :

يا كاتب دن الطليحه = اكتب والزلّه مرفيّه
من الكاتب ومن المملي = لابد الهرجه مقفيّه
يقفاها قريب الغايه = اللي ما يدري بالغايه
وان أبصر أو راجع رايه = لي عليه وله عليّه
هو يسألني وانا انبيه = على شرط انه نبيه
يسمع ما قول ويعيه = موجب دعوايه دخليّه
وأبيها تظهر يتيمه = أو تثر مثل ما الغيمه
لو ما صبَّت مرازيمه = به يظهر نبت البريّه
ان حبّوها تلقّوها = ولقّو قايلها ولقّوها
هذا متى ما لقوها = ها الوقت أحلا من هديّه
وان أبغضوها ذمّوها= سبّوا قايلها وسبّوها
وقالوا لابوها من ابوها= قلنا في الماقف ملقيه
سبب نظمي ها المنظومه= سوقٍ ساقتني له قومه
مريب واسمعت اخصومه= على دعوى انكريّه
مع الصوت وصلت قرّيب= وظنّيت المخلاص قريّب
وابا أخطَى وابا عيّب= مالي قصدٍ غير هالنّيه
ولقينا الصدق وضدّه = وكل منهم معه شدّه
هذا بجهده وذا بجهدّه = وكلٍ في يديه إقديميّه
وكلٍ يثني على روحه = ويظفي ردنه على جروحه
وهذا خطر على روحه= تظهر لاجل مثنويّه
وكلٍ منهم يرفع صوته= وكنّه طالع ملك موته
أو سروقٍ ياخذ قوته= ويبي يغنم على شيّه
بغيت أخلّص دعواهم= وميّز بالخطا اياهم
ولقيته مدعوق ماهم= ما أقدر أسدّه بيديّه
ومنهم وقفت امتحير= والوقت أشوف متغيّر
وإلا مناب امتطيّر = من امورٍ سماويّه
وانظرت البحث وقالوا لا= افرق هاذولا من ذولا
قلت الدعوى فيها عولا= قصّوا دعواكم عليّه
قال الصدق انا اللي ثابت= وإذ كاري وأفعالي طابت
وانت يا اللي توّك نابت= تبى تطاول عليّـه
ما تخسا وتولي يا اللي= زوالك أسرع من ظلى
تظهر يوم وتضمحلّى= مالك عَزَى ينقل طيّه
انتَ مركوب أبو مرّه= واللي يعرفك لو مرّه
ما عاد يازن و لو ذرّه= يعرف صيته بالسجيّه
وانت اللي شرّك يزدادي= و انت اللي بالخطا بادي
وانت الملك السجّادي= وانت البادي بالخطيّه
وانت المدلى بالغرور= والحالف على الفجور
تامر من يشهد بالزور= ما عنه الانفس منهيّه
انت الاغبر وانت الأقشر= وانت اللي مخلوق أبتر
وانت اللي ذنبك ما يغفر= من ظهرت وانت أذيّه
في الحديث الكذب نفاق= والمستحلي له ملاق
و معروفٍ في الاسواق= ولا يحتاج إلماريّه
يا الكذب إخصالك مذمومه= مَزقّة فرعون إبشومه
ها اللي دارت على قومه = من دعواه الربوبيّه
مذموم حتى في السنة = ومطرودٍ عن باب الجنه
ما دام انه شنّه دنّه= ديدانه فعل الخطيّه
مار إخسأ واخسف يا الخايب= كنّك ظنيّت اني غايب
أباخذ حقي بالصايب= لو لك دليلٍ عليّه
وبعطيك الصدق الصامل= ما دام الجرح امتدامل
وإلا عامل وانا عامل= فيما تبين الماريّه
انا الصدق وحبيب الله= ممدوحٍ في كلام الله
واللي يرجي ما عند الله= يحطنيي له مطيّه
وانت الكذب ولا عنك الله= وانصارك هم عدوان الله
واللي ما يخافون الله= صرتَ الهم خدٍ ما طيّه
في ظنّك يا بيت الفار= ما يظهر للدين انصار
يبى يظهر وانت حمار=من هو يقلعك من الخيه
قال الكذب ربوعي واجد= عضّوا حبي بالنواجد
ولا تاجد ربع ماجد= رغبان ومرغوبٍ فيّه
قولك هذا كلًه بيّن= على مثلي وامتعين
لا شك انا اليوم امدّين= ما تلقى أحدٍ يقدح فيّه
لا تفخر بجدودك يا اللي= تحسب انك شبيه لي
لزوم تقفّي واتخلي= دلوك مدلاً في الركيّه
ومثلى يعرف انك خامل= فلكني معك أجامل
والا ما عندك عوامل= جميع آلاتك رديّه
وانت الصدق ويعرفونك= فلاكن ما عد يبونك
تمت دعواهم من دونك= في المنهوبة والعطيّه
ميزانك خف أو خفوبك= أهل ها الوقت ولعبوا بك
ولو انك دف دفوا بك= على العرس البطاليّه
وانا القادم وانا الماكن= وانا اللي من قبلك ساكن
تدري بافعالي ولكن= فعلك هذا جهلٍ فيّه
لو تعرفني صديتا= أو خليّت الدرب وقفيتّا
منذل وكنك ما أوحيتا= عن هيم تدهمك إرحيّه
وانا المقدى وانت المخطي= حتى لو انك ما تخطي
منتب قبيلي من مبطي= هاذي دعاوي قدميّه
لا عد تنظر عيني عينك= ثم والله لا فقع عينك
ولا تلقى من يعينك = ما احدٍ بمعينك عليّه
انا القاضي وانا الماضي= وانا كلٍ عني راضي
وانا أجادل بالمواضي= وانت تجادل بالخطيّه
عقبك ملكت المكاني= يومٍ كلٍ تلقّاني
واللي له لازم يلقاني= على الحسنى وعلى السيّه
وانت أسقط من الاسقط= والله لو ترمى ما تلقط
والطمخه راسك لو تلقط= طاب الكيف بها الكيفيّه
وانا الطايل وانتا القاصر= في اهل العصر اللي انا معاصر
مالك فيهم ولا ناصر= يبغضونك بغض الحيّه
والله لو تجلس وتعاهد= او تصبح في المسجد زاهد
انك فلا تقبل شاهد = لولك دليل عليّه
مالك معروف تعرف به= ولا جميلٍ تذكر به
إلا ان من حبّك يمكر به = كنّه جاني له جنيّه
معاد الناس بيطرونك= بعد زمان وينسونك
أعمى الله قلبك وأعيونك= لا يحرق بشتك في الطيّه
يا الصدق إقصر عن دعواك= ترى كلٍ ذب إرشاك
والعيب أدناك أدناك= غارت عليك من الخيّه
ليتك تسلم وهي تجاره= من قبل ترمى بحجاره
عقب يوم انك تسفاره = غديت أردى من الرديّه
والله ما انتب لي بملادي= ولا كفوٍ لي فتعادي
انت المنكف وانا العادي= طالع اخيامي مبنيّه
إلى عاد انك مظهود= وحالك نشت مثل العود
ولا لك أحدٍ يعود= هذا أصل المحقريه
ما دريتا ان وقتك فات= واللي يعرفك قد مات
وسمل حالك السكات= ما تدري ويش الشكيّه
إلى عاد انك مهيّت= وأسرع ما يلقونك ميّت
من عقب ما انك صيّت= ما تشعر على الحشيه
ميّزناك بها الحاجه= وعرفناك بعير حداجه
مكدودُ ومهدودُ إحجاجه= ما عد يشيل انصيفيه
وأغترينا نحسبك نبي= وتالي الدعوى صرت صلبي
يوم أقفى الوقت اللي تبي= ما أحدٍ بغاك ابشاهيه
ان أقفيتا ما دروابك = وان أقبلت ما فزّو لك
وان جلست ما جوا حولك= يكرهونك مكرهيه
رح يم الديره هاذيك = شف هو فيها من يبيك
أو يقلطك أو يدنيك= تشرب عنده لو نسيّه
قم واذلف عني وراك= ما دام ان علمي يقراك
قبل أسجك مع قفاك= ترى ما النفس إبخليّه
منتب مخلي هالزومه= وها الجلسه اوها القومه
لين تخلا مثل البومه= لا مشبوكه لا مرميّه
لا عاد تظهر في المجالس= ولا تجلس ولا تجالس
ولا تونّس ولا توانس= مطلقينك بالكليّه
خذ علمي واسبت في دارك= عسى الله يقلع ودارك
تبيّن جورك في جارك = وأبغضناك إبها الحيثيّه
واعرف قدرك عند الناس= واقطع رجاهم بالياس
ترى ما عاد إهنا ناس= ما عاد إهنا إلا فليتيه
حط البال وتلقى قولي=لو تاخذ حول مع حولي
انك فلا تلقى حولي= صديق صافـي دخليه
وأسامي ربعي معروفه= تبصرها العين المطروفه
أقوال وفعل تشوفه= زهاد ومتفتفيه
واهل الغيبه والنميمه= والخبث اللي ما له قيمه
لا حميّه ولا شيمه= وأغلب وقتك ها الجنسيه
مع ما تشوفه بالناظر= وتسمع منهم في المحاضر
من البادي ومن الحاضر= وأجزم بالاكثر دهريّه
وجيّدهم قال اللي حضره = ما بانت للصدق ثمره
الا ان الكذب اللي غمره= وصارت حجته القويّه
وتعذّر الصدق وقصّر = وخطرٍ ضلوعه تكسّر
وانا ما أمنه ينصر= يوم انه ما أدرك مبغيّه
ضعيف ما عدله ناصر= له زمان وشبره قاصر
يا اللي تلوم أقعد باصر= وحيد وحاله رديه
يوم ان كل ش وصل حده= قام الكذب وخذ القرده
وقام الضد استافى المدّه= وان قتلته ما عليّه
قلنا حنا يا اللي عنده = وش لازمنا نا نرده
اللي ما ياخذ من زنده= ما تنفع فيه الحميّه
وتعدا إلبابه واسمره= وقال العاجز ما له مره
قلنا حنا وش الثمره= ادخل بيته وانقل شيه
ما عند الصدق الا الضيعه= ما دام انه هو واربيعه
تلقاهم في كل اربيعه= كل اثنين في مزويه
وهنا من قال اسمع مني= خذ من راسي وانقل عني
ان الصدق يمكّن مني = وأتلاها عوّد عليّه
رفعته في راس الطوفه= ولا جا في البال إحسوفه
وتراني ما شفت الشوفه= لين الدعوى صارت فيه
واعترضت لمن يسبّه= وأشهد الله على حبّه
لكن هذاني في تبّه= شفت المعافه من كيه
تبعنا الصدق وتيهنا= وعوّد علينا وشارهنا
قلنا وش علمك قال انا= شفت الشوفه معاد فيه
قلنا فارق عن ديرتنا= شفها بانت مضرتنا
ما فكت منك أمارتنا= قال أمارتكم رديّه
قلنا الردي جابته أمك= لا رحم الله من يضمك
أثرك تبي من يسمك= يشري لك وزن شاهيه
لا تعرض أمارتنا= وتجي في درب ولايتنا
ترى حنّا إلى إلتفتنا= نحط ابحلقك مقطيّه
علامك ما تعطي الطاعه= وحنا جندٍ لك فزاعه
واللي يبونك قطّاعه= طلابه دم وحرميه
قام الكذب إلنا وبادرنا= وخلانا عنده في المعنى
ومن حسن خلقه داخلنا= وصرنا بها الحال اخليطيّه
والفت الكذب وحييته= من عقب يومي لاقيته
واستسمحته واستسميته= من تكون وش ها الجيّه
قال اسمي مالك به حاجه= وان بدا لك عندي حاجه
فانا في الباب أبو ساجه= طقّه بالرافق عليه
وأظهر يمك وأُقضي نوبك= واتحمّل ما ينوبك
حتى لو تصير أذنوبك= ها الوقت أكبر من طميه
وافتل حبل على السينه= اللي ديني على دينه
وأحمّل له بعارينه= وارهي عليه الخرجيّه
قلت الله يصح لسانك= صدقت عزّ الله شانك
قوى الله بالعدل أركانك= ودامت هباتك مرضيه
حكمّوني وانا عندي= علم بالمخطي والمقدي
وهنا من قام ومن صدي= كنه داري بالقضيّه
وحكمت الهم بعد خصومه= وعطيت ورقة مرسومه
وقام الصدق ومعه زومه= مهوب الراضي عليه
غضبان يحسبني حايف = ولا شاف اللي انا شايف
ما شاف ان جيشه نكايف= كم انكف له من غزيّه
وهذا أتلى ما فارقناهم= وعليه وبه خلصناهم
ثم شدوا واخلوا ما هم = وكل تعلق مع حيه
وعسى الله ينصر حاكمنا= القايم في لوازمنا
والا ما الضد براحمنا= لو يجي له مقدريّه
وصلى الله على المختار= ما عسعس الليل وسار
يسوقه بالصبح انوار= سوق المدجن الغربيه
واختمها يا اللي تقراها= بحط المبدى منتهاها
والعود بها البيت الاول = لا بد الهرجه مقفيّه

هذه القصيدة اوردها الاديب أحمد الدامغ في كتابه شعراء النبط في وادي الفقي الجزء الرابع من صفحة 34 إلى صفحة 52

اقول وهذه القصيدة المربوعة والتي هي محاورة بين الصدق لها مقدمة بديعة لم يوردها المؤلف

وبما أن قصائد الشاعر سليمان بن مشاري بن علي أخذت من أفواه الرجال فهي تختلف باختلاف الراوي لها

ولعل القصيدة أعجبتكم

أخوكم / أديب الناصري

 


::: التوقيع :::

إذا شئت أن تحيا ودينك سالمٌ .... وحظُّك موفورٌ وعرضُكَ صَيِّنُ

لسانَك لا تذكر به عورة امرئ ....فعندك عورات وللناسِ ألسنُ

وعينك إن أبدت إليك معايباً .... لقوم فقل : يا عينُ للناس أعين


 
الرد مع إقتباس
  #2  
قديم 04-04-2006, 12:22 PM
فهد نت فهد نت is offline
محل تقدير
 





فهد نت is an unknown quantity at this point
 

 

اخوي الناصري
قصائد الشاعر سليمان العلي رحمه الله جميله وطويله
تصدق عندي له قصيده تجي اكثر من خمس صفحات
انه شاعر بحق يعالج وينقد وينصح ويرثي ويتألم
لاعدمناك يالغالي 000

 


::: التوقيع :::



اشكركما من كل قلبي(بنت البواريد) و(بنت حرقوص)


 
الرد مع إقتباس
  #3  
قديم 04-04-2006, 12:50 PM
الصورة الرمزية لـ ولــ العيسى ــد
ولــ العيسى ــد ولــ العيسى ــد is offline
عضو متميز
 





ولــ العيسى ــد is an unknown quantity at this point
 

 

قصيدة في غاية الروعة ..

صح ألسانك و ألسان قايلها ..

 


::: التوقيع :::



شـkــرا ً


 
الرد مع إقتباس
  #4  
قديم 07-04-2006, 08:26 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 

 

إقتباس
المشاركة الأصلية بواسطة فهد نت
اخوي الناصري
قصائد الشاعر سليمان العلي رحمه الله جميله وطويله
تصدق عندي له قصيده تجي اكثر من خمس صفحات
انه شاعر بحق يعالج وينقد وينصح ويرثي ويتألم
لاعدمناك يالغالي 000

سلمت يمينك على التعليق والرد

نعم إن بعض الشعراء يأتي بالمطولات

ولهذا الشاعر كذلك قصيدة تتكون من 12 صفحة

أسعدني تواجدك

مع شكري وتقديري لك

 


::: التوقيع :::

إذا شئت أن تحيا ودينك سالمٌ .... وحظُّك موفورٌ وعرضُكَ صَيِّنُ

لسانَك لا تذكر به عورة امرئ ....فعندك عورات وللناسِ ألسنُ

وعينك إن أبدت إليك معايباً .... لقوم فقل : يا عينُ للناس أعين


 
الرد مع إقتباس
  #5  
قديم 07-04-2006, 08:40 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 

 

إقتباس
المشاركة الأصلية بواسطة ولــ العيسى ــد
قصيدة في غاية الروعة ..

صح ألسانك و ألسان قايلها ..

صح بدنك

ولاهنت

اسعدني تواجدك

مع شكري وتقديري لك

 


::: التوقيع :::

إذا شئت أن تحيا ودينك سالمٌ .... وحظُّك موفورٌ وعرضُكَ صَيِّنُ

لسانَك لا تذكر به عورة امرئ ....فعندك عورات وللناسِ ألسنُ

وعينك إن أبدت إليك معايباً .... لقوم فقل : يا عينُ للناس أعين


 
الرد مع إقتباس
المشاركة في الموضوع


خيارات الموضوع
طريقة العرض

قوانين المشاركة
لا بإمكانك إضافة موضوع جديد
لا بإمكانك إضافة مشاركات جديدة
لا بإمكانك إضافة مرفقات
لا بإمكانك تعديل مشاركاتك

كود [IMG] متاح
كود HTML غير متاح
Trackbacks are غير متاح
Pingbacks are غير متاح
Refbacks are غير متاح

 
جميع الأوقات بتوقيت السعودية. الساعة الآن » [ 01:37 AM ] .


Powered by vBulletin Version 3.6.4
Copyright ©2000 - 2019, Jelsoft Enterprises Ltd.
SEO by vBSEO 3.1.0 ©2007, Crawlability, Inc.
حقوق كل مايعرض في هذا المنتدى محفوظة لمنتدى بني زيد
www