مرثية ( سليمان بن مشاري بن علي الناصري التميمي ) في ابنه عبدالرحمن a

آخر المشاركات المطروحة في منتديات قبيلة بني زيد

  أدخل في 12 مشروع من مشاريع السقيا بأسهل وأسرع طريقة (صورة) ( آخر مشاركة : ساكتون    |    أسهل طريقة لكي لاتفوتك صدقة عشر ذي الحجة خير أيام الدنيا (صورة) ( آخر مشاركة : ساكتون    |    أوقف برادة عنك أو عن والديك أو عن متوفى أنقطع عمله لتكون له صدقة جارية لاتنقطع (صورة) ( آخر مشاركة : ساكتون    |    وقف رسمي بمكة المكرمة داخل حدود الحرم حيث الحسنة بمائة ألف حسنة (صور ( آخر مشاركة : ساكتون    |    أرخص كفالة حجاج في السعودية لعام 1440هـ (صورة) ( آخر مشاركة : ساكتون    |    لمن يشتكي من ازعاج من رسائل المسابقات ( 7000 ) ( آخر مشاركة : خالدالراجحي    |    موبايلي ايقاف مبيعات باقة الانترنت اللامحدود ( آخر مشاركة : خالدالراجحي    |    ماهي الأسباب المؤديه لبعض الأعضاء ترك منتدياتهم ؟!!! ( آخر مشاركة : ربيع الحق    |    أضِـف بصّـمَـتُـك اليَـوّمِـيّـة ( آخر مشاركة : سعود الصبي    |    كل عام وانتم بخير ( آخر مشاركة : خالدالراجحي    |   


العودة   منتديات قبيلة بني زيد > القسم الادبي > تراثيات وشعبيات وقصائد منقوله
التّسجيل   جعل جميع المنتديات مقروءة

مرثية ( سليمان بن مشاري بن علي الناصري التميمي ) في ابنه عبدالرحمن

المشاركة في الموضوع
 
خيارات الموضوع طريقة العرض
  #1  
قديم 25-03-2006, 02:13 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 
مرثية ( سليمان بن مشاري بن علي الناصري التميمي ) في ابنه عبدالرحمن

 

سافر (عبد الرحمن بن سليمان بن علي) مع الكتبية إلى بلاد اليمن وعبد الرحمن هذا هو ولد الشاعر الكبير (سليمان بن مشاري بن علي) وقد وافته المنيه في صبيا فجاء كتاب لأحمد بن فوزان من أهالي روضة سدير وبداخل الكتاب كتاب خاص للشاعر سليمان بن علي فيه نبأ وفاة ابنه عبد الرحمن فتأثر كثيراً وآلمه الخبر فحزن لذلك واشتد حزنه على ابنه فرثاه بمراثي كثيرة أهمها وأطولها واشدها معاناة وتأثراً هذه المرثية :

الله من علم دهاني =مناب بخير من جاني
أول علم طرق سمعي =في خط أحمد الفوزاني
يذكر خط داخل خطه =جا من بكر بن سحماني
غدا القلب مصاب عقبه=يا ليته خط ما جاني
ما تجراً يخبرني به =إلا بكر بن سحماني
يقول ان ابنك توفى =واصبر والله المستعاني
وصبر نفسك واترك ذكره=واعص نفسك والشيطاني
ولو هو حي وجال فيها=قلت وقلنا الجالي فاني
وخبر موته ما سارت به =خرابيط أبو سعيفاني
وقريته والى ويش أقرا=الدواهي والاحزاني
مع اني من شوفه ميس=كني في لجة قطراني
ما سويت ياكتابه=خير في أبوه سليماني
محال اني مذكر يومه=بيوم معلوم إلا أبكاني
ما عاتب الله نبيه=يعقوب بطول الأحزاني
على ولده يوم افقده=بنى بيت للأحزاني
الا أخبر عنه انه كاظم =واثنى عليه القراني
عسى ديرةٍ توفى =فيها ابني عبد الرحماني
عساها إلا موضع قبره =يرقص فيها ألفي شيطاني
عساها إلا موضع قبره=خبت يفوع إبدخاني
الا ولدي غابت شمسه =تحت رمسه في جيزاني
أتلا مرسول كزه لي =مكتوب آخر شعباني
إلى كتب الخط إبيده=أوفا زمان ما جاني
اشهرين ما يا صلني=حيث مشيه هوى داني
علم بالخير يتاخر =وعلم الشر أسرع ما جاني
خبرة موته جا في الموتر =قل صبح في اليوم الثاني
وش فرق المكتوب الأول =من فرق المكتوب الثاني
انا أبجلس وأتمني =لو ما تفيد التماني
ان الله يسيّر قبره =ما تهدم له بنيا
مع اني من شوفه ميس =من قبل اتعاد الابداني
انا في القطب الشمالي =وهو في القطب اليماني
أشوف اني عقب موته=من طمان في طماني
واسرع ما ندله عن ذكره =مع امدلهة الرعياني
ياهل صبيا ومن في صبيا=من غريب ومن سكاني
عسى اللي ما جزع إلموته=من نزال ومن ضعاني
أو يوم انه سمع بموته=ما جا يمي وعزاني
وانا عرفه ويعرفني=لكن ما عنده في شاني
تحل بساحاته دهيا=بمصيبة حبيب داني
ويبي يا خذنا اللي خذه =حتى ولو طال الزماني
هذا باب كل يدخل =معه من انس ومن جاني
هذا باب كل يدخل =معه من غير استئذاني
هذا بابٍ ما اختص أحد=به دون فلانٍ وافلاني
كل يعرف انه واضح=وهو الطريق السلطاني
هذا الموت اللي تواست=فيه السادة والسيداني
هذا الموت اللي تواست=فيه العانه والأعياني
هذا الموت اللي ذلت له =ها الخليقه بالاذعاني
هذا الموت اللي ما عنده =لا في العالي ولا الداني
هذا الموت اللي ما ياخذ =فيمن ياخذ زود أثماني
هذا الموت اللي ما تاقف =دونه حجاب السلطاني
هذا الموت اللي ما لوفتّه=وخليته خلفي لاقاني
هذا الموت اللي ما يرحم=طفل ولاشيخ فاني
هذا الموت اللي ما خلا=راعي الخن وراعي الخاني
هذا الموت اللي موكل=يفني العالم الانساني
ومن في برها او بحرها=من وحوش ومن حيتاني
ومن به روح فهو رايح=الفوقاني والتحتاني
وقول الله أصدق من قولى=كل من عليها فاني
إلا من يشاء وكل يأتي=يوم القيامه فرداني
وصبر جميل عسى الله =يجبرني في أكبر عيلاني
والله لولا سوره عم=مع تبارك والرحماني
وسوره طـه والم نشرح=لك صدرك والفرقاني
وكلام الله كله شافي=وان تدبرته كفاني
لا ندب في أعلا طويله=بصوت يسمعه الأذهاني
وارفع صوتي وابري جاشي=في ظني محد خطاني
وانادي ثم انادي=وانا في أرفع مكاني
يا قبر يا للي في صبيا=سر باذن الله البلداني
بلدان في نجد مريفه=أمان ودين ورجعاني
في ظل الامام العادل =حامي حوزة الإيماني
وخل صبيا وأهل صبيا=ومن في صبيا " للشيطاني
لكن ما ودى بك تحشر=مع عباد الأوثاني
وهذى هي عقيدة قلبي=واستعيذ من الشيطاني
اكتبها لي في الصحيفه=يا وكيل بالاحساني
سلامي يا قبر ضمه=وأهني له بالتهاني
يا من تهناً بقدومه =هناك الله بالإيماني
روحه راحت في علم الله =وجسمه كلته الديداني
والرابح من قبله الله =ولو هو في أقصى مكاني
ألا يا الدنيا الدنيه=طبعك تفريق الخلاني
ما راح أحد منها راضي =أو قاضي ما له غرضاني
والله لا حبك قلبي =ولا حبك حتى لساني
ولا رضي عنك الأول =حتى يرضى عنك الثاني
يا ما أزعجتي من عاقل =وودعتي شمله شتاني
والله لو ما حل بجسمي=وتحملته بالإركاني
حل طويق . وحل مجزل=وحل بحزوى وحل ذهلاني
فلا فيهن من تطيقه=وكيف اطيقه وانا انساني
دعيتي تاكف مدامعها=عليه وكني رمداني
وكنيت العبرة في صدري=مخافة شمت العدواني
وأخفي ما بي عن أقرابي=وعن أصحابي والجيراني
يا ليت الموت اللي مره =قبل يمره بداني
خلاه وبداني قبله =ولا بداه وخلاني
سلامي يا من تولع=بالأسفار ويومه داني
كنه يطلب له زعيمه =مطالعها مع سرقاني
وهي المنية داعيته =ولا له عنها تواني
سلامي يا من تغرّب=غربتينٍ في زماني
غربة رجا منها يرجى =وغربة فنى منها فاني
والتربه أسباب الغربه=ولا بد للشر أعواني
وإلا عمره ما تغرّب=ولا تعدّا ذا المكاني
وما هوب أوّل من تغرّب =غرّب وغربله الزماني
يطلب رزقٍ مقسومٍ له =ومكتوبٍ له بالضماني
هذا من الله وخذه الله =واليقين من الإيماني
وانا مجزع واتسخّط =والاخّاذ اللي عطاني
والتجزّع والتسخط=في الحديث من الشيطاني
واللي ما يرضى ويسلّم =بحكم الله ما معه ايماني
يا هل صبيا دمتم فيها=مرّواً قبره على شاني
مرّة سلامٍ ما فيها =قولة يا سيدي يا فلاني
وهي المرّه المشروعه=لازودّ ولا نقصاني
ويلزمكم تبليغه عنيّ =سلامٍ في كل اواني
واذكروه بما ذكرتو =به موتاكم بالاحساني
سلامي سلام مودع=متى بلقاه ويلقاني
هيهات وهات اللي عنده =وين مهنا من ضيداني
ما أذكر يومٍ فيه أزعلني =ولا أذكر يومٍ ما أرضاني
أو ما نادينته وهو مقفي=إلا ريّع و لباني
ولا شفته من تغرب=إلا حلم ما هجاني
ليلٍ وانا دهش الخاطر=بين النايم واليقظاني
وتحريت انه ينبيني=عن احواله ولا انباني
عسى ربي يجمعني به =في الجنه مع الولداني
وعساه مقرب فيها =مع من في روح وريحاني
وترفع له رايات البشرى =في يوم المعاد الثاني
ويافد مع الوفد الفايز=بالحسنى وفد الرحماني
ومنتهاهم باب الجنه =يحترون اذن رضواني
ليتي قريب أزوره=عيد الاضحى وارمضاني
ولو المواتر موقوفه=واركوب فيها مجاني
ليتني أقبل واقفى له =بين الاربع والثماني
وانا مهتم أزوره=كنه في فنا الحيطاني
وعنت على القلب وسارت=رجلى تبوج الخلياني
أو تمخليت وحالي رثه=يجهر شوفي من لاقاني
والى فكر قال من انتا=قلت انا فلان ابن فلان
ولو أبا جلس وانتسب له =انتهيت إلى عدناني
قال لي وين انت متودى =ما نتب مع درب صلطاني
قلت أرشدني ثم أرشدني =وش دربي ها اللي عناني

ولها بقية في الصفحة الثانية

 

الرد مع إقتباس
  #2  
قديم 25-03-2006, 02:15 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 

 

انا ولدي مات بصبيا =في الكتيبه هالزماني
وأبا روح أزوره واقف=على قبره لا تلحاني
قال انك في مهمهيه=ما غير شعاب وشعباني
وسراب يغر الظامي =ويظنه راكد غدراني
والله ما انتب على يمه=اقبل شوري لا تعصاني
بينك وبينه مسافه=قبل جيش والجمراني
وين الزملة ؟ قلت الزمله =ما شوف إلا ها الحذياني
مطية مدراك مطيه =والموتر مر وخلاني
وان أدركته قالوا سلم =جنيه بوجه الميزاني
وابشية الله لزوره =امعافى والدرب اماني
ويا بعد اللي في باطنها =عن الرؤيه بالاعياني
قل قريب وهو قاصي=وقل بعيد و هو داني
أوصاة يا هل النجايب=ارعوها سر واعلاني
إلى حليتوا في صبياء=عوجوا للقبر الفرداني
قبر قريب لي فيها=ما عاد له عنها مضعاني
ويلزمكم تبليغه عني=سلام في كل أواني
يا هل صبيا لا تنسونه =تحت جبل الصواني
رحى منونه دارت به =إلى قلايع ودراني
ساقته الأقدار ودارت=عليه المنون وباني
غريب مات بوطنكم =دينه من خير الادياني
وليتي معهم يوم اقفوا به =للقبر شيب وشباني
وليتي معهم يوم اينزل=في الملحود ابا الديداني
وليتي معهم يوم تهايل=عليه الترب البناني
وليتي معهم يوم توقف=عليه النصيبتاني
أباقف عنده وأدعو له =بالثبات من الفتاني
في الحديث أدعو لأخيكم =فانه يسأل الآني
وعنه صلى الله عليه وسلم =ورد في الحديث الثاني
انه يسمع في لحده =من فوقه وقع الحذياني
ليتي معهم وانا معهم =في قلبي … لو في مكاني
انا أبعدهم … وانا اقربهم =عنده ما احتاج البرهاني
وش تراني عقب فقده =عقب فقده وش تراني
وش تظنه واتهقا به =كن في عوني عسى تعاني
انا بلتذ ابما كول =او مشروب او مكاني
أو برقاد … أو بقعادٍ =أو بحياد من هالفاني
أو بجلوس في ناموس=مع جلوس في بستاني
إلا بأهل دين ومذهب =وأهل صدق وأهل أماني
ياهل صبيا حطو قبره =على ممر الركباني
هذا ينشد وذا يسلم =وذا يدعي بالغفراني
يأهل صبيا طاول همي =وكثر غمي من ها الشاني
يأهل صبيا متى صرتوا=تالي عمري نصب اعياني
يأهل صبيا صوبتوني =صواب على الجناني
يأهل صبيا وصفى فيكم =بالعميل وبالدياني
على مذهب ابن حنبل=وعبد الحليم الحراني
له عليكم حق واجب=ومع الواجب حق ثاني
ان انصفتوا فريتو به =وعليه من الله برهاني
وان ما انصفتوا فلا يذهب=حقه باسباب الجحداني
يطول الزمان ويقصر=ما استقامت بالسكاني
هذا قولي للي يفهم =واللي ما يفهم حيواني
غريب مات بوطنكم =ناسينه كاين من كاني
والله ما فيكم له باكي=ولا داعي بالغفراني
وتدرون اني ما خليته=لا كبر ولا حقراني
لا شك الا اللي دونه=هوله يشيب الولداني
بين فياض وبين رياض=وبين حزوم في خلياني
يا اللي عنده يوم تحشرق =نفسه بالله هو ما طراني
هو ما قال الله يا أبو لي=من يشوفه هو وأخواني
هو ما قال الله من يركب =له في موتر مجاني
يسير من أوطان اجهينه=لأوطان ابوي وجداني
ليتي عنده يوم يمم=والتفت منه السيقاني
أبلثم عينه وخشمه=وألثم اشفته تشفاني
وليتي عنده يوم ايغسّل =ويدرجونه في الاكفاني
وليتي معهم يوم ايجهز =على منجور العيداني
وليتي معهم يوم امواله=صلاة من دون اذاني
وقوف ما فيه اركوع=ولا سجود بالاذقاني
الآ دعاء يدعونه=للميت كاين من كاني
اللي ماله عنده تالف=وهو معدوم الاثاني
يقول اللي طالع عقده =يا بعد أسباب العقلاني
يأهل صبيا ثلاث لي =باسم صبيا مقروناني
صبر وصواب ومصايب=والوحده منهن طوفاني
يأهل الأجداث اللي قبله =في بطن الغبراء سكاني
هل فيكم من يسمع صوتي =إلى نابيته ناباني
ها للي جاكم سنة تسعه=وأربعين من الزماني
والف وثلاث ميه حجه =لهجرة سيد العدناني
اساليكم باللي جابه =في وطنكم ما له ثاني
وش رأيتوا من قدومه=اساليكم بالرحماني
أخبروني وش بان لكم =تراكم في دار أماني
ما رأيتو نور ساطع =أضاءت منه الأكواني
وأحمد الله كل خصاله =على ما سر وما زاني
قل عفيف وقل نظيف =وقل شريف في المكاني
ولا هلع ولا دلع=ولا هرع ولا داني
قالوا طولت مرثاته =ودونت فيها ديواني
قلت الغالب أو في ظني =ما هيب أطول من أحزاني
هذا ولدي ثومه قلبي =مات وخافي حبه باني
ولا مات وموته عندي =مات بقلايع ودراني
وأبا جزم ان قولي هذا =عند الأكثر هذياني
ولا يدخل مسامعهم =كنه معدوم المعاني
والعله تسمل صاحبها=ما يحس بها البراني
ليت إخبري يا صل فيصل =وليته ايخبر عن شاني
يرحم عود طايحة به =شمسه في أطراف العسباني
ويرحم عود مات ولده=في الكتيبه ها الزماني
منول ارجي معاشه=الي كزه لي كفاني
عضني فيه الله يعزك=من ها المضمحل الفاني
نصف من عمري عبرته=وعبرني في النصف الثاني
يابن الامام اللي كنه=معطى خاتم سليماني
ومن الغلظه على الاعداء =كنه كليم الرحماني
وكن الله معطيه الحكمه =كما عطاها لقماني
من غيره يوم الله عزه =كهف يلوذ به الجاني
من مشرقها إلى مغربها =ما له في البسيطه ثاني
ومع هذا عدل في ملكه =عدل صاحب الليواني
فضله عم العالم كله =راعي السايه والأحساني
مثل الغيث اللي تحيا به =المساكن والسكاني
وفضلك من فضايل جوده =بحر يمد الخلجاني
نزلك أشرف المنازل =وجاورت بيت الرحماني
وملكت المقام الأعظم =ركن الحجر واليماني
وطهرت البيت المطهر =عقب عباد الأوثاني
يا من بالبلاغة تقصر =دونك بلاغة سحباني
ويا من بالمكارم يقصر =عنك الطائي والنعماني
مات ولدى في خدمتكم=حتى اللي خلفه ما جاني
انا راعي القريه اللي=خذتو عليها قحطاني
أول مظهار ظهرته=لنجدِ ذاك الزماني
واسستوها واستقرت =على كرسي الأماني
وخليتوا جانبها الموحش=ترعى شاته مع سرحاني
اذكرني واذكر ما عندي=غير الهمال الهملاني
ومنزلي اكسف المنازل=جرثمة قصر خرباني
كلن يقبل وهي تدبر=ما اكسف منها في البلداني
وفيها خصلة مذمومه=مثل الرفيق المناني
إلى كلت عنده وجبه=دلى يرعاها زماني
واللي يمدحها متوهم=أخبر بالدار السكاني
وانا فيها مع ما اذكر لك=أرغب من ظبي رماني
مذكور حبك لو طنك =يا لانسان من الإيماني
يا مظنة من هقا به =ساعدني في اخر زماني
علي زمان عزر بي=وتنحل بي لين آذاني
ونفسي ضاقت منافسها=ودنيا دنت في قفاني
واغريمي لا عمر جاله=امطانبني في مكاني
انا وياه اخليطيه=وأكثر أوقاته يرهاني
وهذى حالي وابديها لك=والطمخة لو هي بلساني
فلا كن ما حلق طاير=في الجو بليا جنحاني
وابا ابدى حالي لمحمد =وافي الخصايل شقراني
وابا روح له مرثاتي =في المفقود أكبر عيلاني
ارب انه يلتفت لي =إلى تبلّغ من شاني
وصلاة الله وتسليمه =على المصطفى العدناني

المصدر كتاب الشعر النبطي في وادي الفقي للأديب /أحمد بن عبدالله الدامغ وفقه الله الجزء الرابع من صفحة 90 إلى صفحة 116 مع بعض التصرف اليسير

والمعذرة إن كان في الطباعة أخطاء

غفر الله للشاعر وابنائه وجمعهم في مستقر رحمته آمين

تحياتي

 

الرد مع إقتباس
  #3  
قديم 25-03-2006, 03:15 AM
قرم بني زيد قرم بني زيد is offline
عضو نشيط جداً
 





قرم بني زيد is an unknown quantity at this point
 

 

إقتباس
غفر الله للشاعر وابنائه وجمعهم في مستقر رحمته آمين


اخي العزيز اديب شاكر لك نقل هالقصيده

 


::: التوقيع :::



 
الرد مع إقتباس
  #4  
قديم 25-03-2006, 08:02 PM
الصورة الرمزية لـ زكي بن سعد أبومعطي
زكي بن سعد أبومعطي زكي بن سعد أبومعطي is offline
فتى بني زيد
:: الإدارة ::
 






زكي بن سعد أبومعطي has a spectacular aura aboutزكي بن سعد أبومعطي has a spectacular aura about
 

 

قصيدة رائعة ومعاني قوية

بورك فيك أخي الفاضل أديب وكتب لك الأجر الجزيل

 


::: التوقيع :::

منقــطع مــؤقــــتاً عــن الدخــول للمنتـــدى


 
الرد مع إقتباس
  #5  
قديم 26-03-2006, 12:32 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 

 

إقتباس
المشاركة الأصلية بواسطة قرم بني زيد



اخي العزيز اديب شاكر لك نقل هالقصيده

اسعدني وشرفني مرورك

وشكرا لك على التعليق

ولاهنت يالقرم

شكري وتقديري

 


::: التوقيع :::

إذا شئت أن تحيا ودينك سالمٌ .... وحظُّك موفورٌ وعرضُكَ صَيِّنُ

لسانَك لا تذكر به عورة امرئ ....فعندك عورات وللناسِ ألسنُ

وعينك إن أبدت إليك معايباً .... لقوم فقل : يا عينُ للناس أعين


 
الرد مع إقتباس
  #6  
قديم 26-03-2006, 12:34 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 

 

إقتباس
المشاركة الأصلية بواسطة فتى بني زيد
قصيدة رائعة ومعاني قوية

بورك فيك أخي الفاضل أديب وكتب لك الأجر الجزيل

اسعدني وشرفني مرورك

وشكرا لك على التعليق

ولاهنت اخي الفاضل فتى بني زيد

شكري وتقديري

 


::: التوقيع :::

إذا شئت أن تحيا ودينك سالمٌ .... وحظُّك موفورٌ وعرضُكَ صَيِّنُ

لسانَك لا تذكر به عورة امرئ ....فعندك عورات وللناسِ ألسنُ

وعينك إن أبدت إليك معايباً .... لقوم فقل : يا عينُ للناس أعين


 
الرد مع إقتباس
  #7  
قديم 28-03-2006, 12:52 PM
فهد نت فهد نت is offline
محل تقدير
 





فهد نت is an unknown quantity at this point
 

 

مشكور اخي اديب على نقل هذه الرائعه
تصدق ان الشرهان محمد حافظها كلها
علمنا بها مره واخذ له حوالي ساعه وهو يلقيها ماشاء الله عليه
تحياتي اخي الغالي 000

 


::: التوقيع :::



اشكركما من كل قلبي(بنت البواريد) و(بنت حرقوص)


 
الرد مع إقتباس
  #8  
قديم 31-03-2006, 01:05 AM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 

 

حياك الله اخوي فهد نت

نعم الشرهان يوردها بعض الاحيان ويحفظها كاملة

شاكر ومقدر مرورك

 


::: التوقيع :::

إذا شئت أن تحيا ودينك سالمٌ .... وحظُّك موفورٌ وعرضُكَ صَيِّنُ

لسانَك لا تذكر به عورة امرئ ....فعندك عورات وللناسِ ألسنُ

وعينك إن أبدت إليك معايباً .... لقوم فقل : يا عينُ للناس أعين


 
الرد مع إقتباس
  #9  
قديم 25-07-2011, 11:29 PM
اديب الناصري اديب الناصري is offline
عضو نشيط
 






اديب الناصري is an unknown quantity at this point
 

 

للرفع

 


::: التوقيع :::

إذا شئت أن تحيا ودينك سالمٌ .... وحظُّك موفورٌ وعرضُكَ صَيِّنُ

لسانَك لا تذكر به عورة امرئ ....فعندك عورات وللناسِ ألسنُ

وعينك إن أبدت إليك معايباً .... لقوم فقل : يا عينُ للناس أعين


 
الرد مع إقتباس
المشاركة في الموضوع


خيارات الموضوع
طريقة العرض

قوانين المشاركة
لا بإمكانك إضافة موضوع جديد
لا بإمكانك إضافة مشاركات جديدة
لا بإمكانك إضافة مرفقات
لا بإمكانك تعديل مشاركاتك

كود [IMG] متاح
كود HTML غير متاح
Trackbacks are غير متاح
Pingbacks are غير متاح
Refbacks are غير متاح

 
جميع الأوقات بتوقيت السعودية. الساعة الآن » [ 04:22 AM ] .


Powered by vBulletin Version 3.6.4
Copyright ©2000 - 2019, Jelsoft Enterprises Ltd.
SEO by vBSEO 3.1.0 ©2007, Crawlability, Inc.
حقوق كل مايعرض في هذا المنتدى محفوظة لمنتدى بني زيد
www