بعض قصائد الشاعر عبدالرحمن بن محمد البواردي

AlBawardi · #1 22-08-2005, 07:28 PM

الشاعر : عبدالرحمن بن محمد البواردي،

كان من أبرز شعراء نجد ،وهذه مقتطفات من بعض قصائدة :

قصيدة العرضة:
ياهل الديرة اللي طال مبناها ... مابـلادٍ حـمـــاها طول حاميها
المبـاني تهاوى كـل مــن جـاها ... مايفك المباني كــود اهـاليها
ديرةٍ لي بلاها اليوم برداها ... كيف تبرا البلاد وعيبها فيها
كان مـاتفـزع اليسرى ليمناها ... قل ترى ما وطا هاذيك واطيها
راعي البوق بالنيات يـلقاها ... من حفر حفرة لازم يقع فيـها

ــــــــــــــــــــــــــــــــــــــــــــــــــ ــــــــــــــــــــ

حمـام ياللـي بـا لبساتيـن ... يلعب طرب والهم ما جاه
هو معجبك طلع الرمامين ... أو معجـبـك عــلال حـنـاه
أو معجبك حضر مقيميـن ... هـل القصـور اللـي طال مبنـاه
أو معجـبـه بــدو مقـفـيـن ... يـرعـون بــراق نـثـر مــاه
ذبحتنـي يـا بــو عكاكـيـن ... يـــا خـالــط ورده بـحـنــاه
ذبحتني واهلـي مقيميـن ... واهلك ضعنهم ما لحقنـاه
عساك يالروضـة تسيليـن ... والسيل يملي لي ركايـاه
حيثك مقر دو يعـج العيـن ... محبوب انا ما شفت حلياه
يالعيـن هـودي لا تلجـيـن ... صيري صبوره يا المشقاه

ــــــــــــــــــــــــــــــــــــــــــــــــــ ــــــــــــــــــــ

مرحبا بالخضر سيد الحضر=بو جبين كما خط الهلال
يقمر البيض لا منه حضر
يوم قالوا ورا خلك خضر=يحسبون ماهو بغالي
قرة العين شوفات الخضر
لو يباهي بخده للقمر=غاب نور القمر يا هملالي
لو تبين مع القمر قمر
ياهوى الروح بيحت الصبر=يابعدحالي وغالي حلالي
انت يااللي تعاجبك خمر
ان مشى لابس الثوب الخضر=طاح ما في يدي وا عزتالي
منك يالا بس الثوب الخضر
يوم انا وانت من خامس شهر=ما جفيتك ولا بان الجفا لي
ماحصل منك يوم في العمر

ــــــــــــــــــــــــــــــــــــــــــــــــــ ــــــــــــــــــــ
دارنـا فيك ماخـنـّا ... خان بك قاطع الساقه

خــان فينا وهو منّا ... شـرّع السيف باشناقه

للحـرايب تـبـيّـنّـا ... قـاطـع الراس خـلاّقه

ــــــــــــــــــــــــــــــــــــــــــــــــــ ــــــــــــــــــــ

يالابـتي* يـاولاد زيــد ... بالبيض ويـش اعذارنا

بالصمع ورهـاف الحديد ... أمـقـدمين أخيـارنــا

لي ساقوا الجمع العنيد ... سقـنـا عليه اعمارنا
* اللابة هي القبيلة

ودمتم،

AlBawardi · #2 22-08-2005, 07:35 PM

ومن شعره

أحب الخضرمن حيث لي صاحب خضر=واباهي بزينة جملة البيض واماري

نطحني نهار العيد واحدث معي الكدر=ومن شوفته ياحمود انا ضاعت ابصاري

نطحني ضحي العيد بمشجر خضر=يتل الراديف تلة الحصن للقاري

ابولبة عفرا كما دارة القمر=الى شعشعت يسري على نورها الساري

ابو غرة توضي وطوق على النحر=وفي نظمها اللولو على دار ما دار

سقى الله محبوب سقاني من الثغر=قراطيع من ريقه ولا احد بها داري

يمشي على الاقدام من زايد الدجر=ويفرح الى دقوا هل الفن سماري

ومحمل غرامي دش في لجة البحر=يقفي ويقبل بين الامواج سماري

علامه الى من شافني مقبل نفر=الىقلت قول قال ما ابيع ياشاري

عليه المشجر زاهي كنه الزهر=ويمشي على هونه ولا هوب في كاري

الا واشقا قلبي من الولف لاذكر=عشير يروف بحالي اليوم ويداري

انا انلام لا طريت ثوبي من القهر=و يا حسرتي مشيت بين العرب عاري

انا كيف ابانسى حبتي له مع النحر=وبالليل انا واياه بوزار نيباري

قلت المواصل قال مانيب بذا البحر=تبدلت عن خبرك ولا احب ذا الطاري

انا افرح الى دشوا هل الغوص للسفر=وانا افرح الى شالوا هل الفن خماري

زيـد رومـا · #3 22-08-2005, 08:21 PM

البواردي
لاهنت
والشاعر عبدالرحمن البواردي بالفعل اجمل شعراء عصرة والينهم غزلا واكثرهم ثقافة رحمه الله تعالى
كل التحااياا لك
اخيك

sha8ran · #4 22-08-2005, 10:46 PM

السلام عليكم

حياك الله ولد عمي الغالي

عشت و عاش ذكر من جابك يا سليل العز

لي عودة للموضوع إن شاء الله

AlBawardi · #5 23-08-2005, 01:50 PM

الاخوان شقران وزيد روما شكرا على تفاعلكم

ولدكم يالخوال · #6 25-08-2005, 01:54 PM

كفوا والله والنعم بالبواريد وهم مايحتاج اشهر من نار على علم
ولاهنت على ماذكرت لنا من ابيات شعريه لفحل من فحول الشعر

sha8ran · #7 26-08-2005, 12:06 AM

السلام عليكم

أخوي البواردي ، أسمح لي بكتابة قصيدة الأمير عبدالرحمن كاملة و اللي أنت ذكرت منها بعض الأبيات:

يا لابتي يا أولاد زيد = بالبيض وش أعذارنا
ما فك من ظلم الرشيد = إلا احتمانا دارنا
بالصمع ورهاف الحديد = مقدمين خيارنا
لا ساقوا الجمع العبيد = سقنا عليه أعمارنا
بالحزم و الراي السديد = يصلى المعادي نارنا
و الرب يفعل ما يريد = علام غيب أسرارنا
و الموت برقاب العبيد = لو ما نزوره زارنا

.

شقراوية بني زيد · #8 29-08-2005, 01:04 AM

إقتباس


	ياهل الديرة اللي طال مبناها ... مابـلادٍ حـمـــاها طول حاميها المبـاني تهاوى كـل مــن جـاها ... مايفك المباني كــود اهـاليها ديرةٍ لي بلاها اليوم برداها ... كيف تبرا البلاد وعيبها فيها كان مـاتفـزع اليسرى ليمناها ... قل ترى ما وطا هاذيك واطيها راعي البوق بالنيات يـلقاها ... من حفر حفرة لازم يقع فيـها

هذه القصيده للشاعر عبدالرحمن البواردي كان اميرا لشقراء
(وهواحد اعمامي) والد الاديب والشاعر المعروف : سعد بن عبدالرحمن البواردي حالياً

وهي عباره عن عرضه نجديه قيلت من حوالي مئة عام واحيوا ذكرها في حرب الخليج وهي كالاتي:

راع الاعمال بالنيات يلقاها=من حفر حفرة لازم يقع فيها
ياهل الديره اللي طال مبناها=مابلاد حماها طول حاميها
والمباني تهاود كل من جاها=مايفك المباني كود اهاليها
ديرة داها اليوم برداها=وش يعز البلاد وعيبها فيها
وان كان ماتفزع اليسرى ليمناها=فاعرف ان ماوطا ذيك واطيها

اخوي البواردي سلمت يمناك على نقل القصائد ,, وهذه القصيده قويه جداً بكلماتها
وكنت اود ان اعرضها هنا بموضوع مستقل لروعتها ولكنك سبقتني بها
ولكن لا يوجد هناك فرق بيني وبينك كلنا واحد ...

لك مني كل الاحترام ....

krar · #9 29-08-2005, 01:57 AM

إقتباس

المشاركة الأصلية بواسطة AlBawardi


	الشاعر : عبدالرحمن بن محمد البواردي، كان من أبرز شعراء نجد ،وهذه مقتطفات من بعض قصائدة : قصيدة العرضة: ياهل الديرة اللي طال مبناها ... مابـلادٍ حـمـــاها طول حاميها المبـاني تهاوى كـل مــن جـاها ... مايفك المباني كــود اهـاليها ديرةٍ لي بلاها اليوم برداها ... كيف تبرا البلاد وعيبها فيها كان مـاتفـزع اليسرى ليمناها ... قل ترى ما وطا هاذيك واطيها راعي البوق بالنيات يـلقاها ... من حفر حفرة لازم يقع فيـها

ياليت والله تزودونا بباقي القصيدة وسببها لانها قصيدة مشهورة ونحب نعرف تاريخها وسببها والبواريد في المنتدى كثير ما شاء الله ولا يقصرون

AlBawardi · #10 29-08-2005, 01:04 PM

الأخ ولدكم يالخوال:
شكرا على مشاركتك

الأخ شقران:
شكرا على أكمال القصيدة.

الاخت وبنت العم مزيونة البواريد:
الأمير عبدالرحمن هو خال لوالدي رحمهما الله. والقصيدة عندي بأكثر من صيغة فمثلا وردت المباني (تهاوي وتهادي وتهاود) كل من جاها واخترت منها ولكن أرى ما أوردتيه أكثر دقة. سأحاول الرجوع للاديب سعد البواردي في اقرب فرصة لتحري الدقة.

الأخ Krar:
سأحاول ان شاء الله. بارك الله فيك.

مشوح · #11 31-08-2005, 01:56 AM

جهد مشكور لك يالبواردي على هاذي القصايد للامير الشاعر

عبدالرحمن بن محمد بن عبدالرحمن بن عبدالعزيز البواردي رحمه الله
واتمنى انك تتحفنا بمواضيعك المميزه

هشام الزيد · #12 14-04-2007, 02:01 PM

ياسلام على القصائد الرائعه

رجال يستحقون الافراد لهم بموضوع

ابن ضويان · #13 14-04-2007, 03:45 PM

لا هنتوا يا جماعة وننتظر منكم المزيد

طارق الحصان · #14 14-04-2007, 07:50 PM

إذا قريت البيت أرجع وأقراه مره ثانيه

بصراحه أبياته قويه مره

رحمه الله وأسكنه فسيح جناته

ابن ضويان · #15 20-04-2007, 03:40 PM

شكرا يا عيال العم على هذا الجهد
لو تكرمتوا ليتكم تنقلون الموضوع إلى ديوان شعراء بني زيد

خيارات الموضوع
عرض نسخة للطّباعة ارسل هذه الصفحة لصديق
طريقة العرض
النمط الخطي التحويل إلى النمط الشجري التحويل إلى النمط المتطوّر