هذي القصيده قديمه لها أكثر من 20 سنة لسعود بن عبدالله بن محمد المسعود عندما مات أحد صقوره الغالي على قلبه :
( سعود بن عبدالله بن محمد المسعود )
الطير مات وجا عزا الطير باللوم
***************** ناسٍ تلوم وزادت الطين بله
يالايمي منتب على اللوم ملزوم
***************** خل المولع ينعي الطير خله
لاصار حبك لاشقر الريش معدوم
*************** ياشين لومٍ مايجي في محله
لاصرت ماتفرق عن النادر البوم
************** وشلون اباخذ هرجةٍ منك بالله
جثيت عنده تايه الفكر مصدوم
**************** مابين كيف وليش والا لعله
ساعة وانا منداش لاقعد ولاقوم
****************** الا التفاتة واحدٍ فيه خله
لين انتبهت وشفت ماصار محتوم
****************** وهليت دمعٍ مابعد هل لله
الا لموت اعزاز واقراب وقروم
*********** ولوجه من نركع ونسجد رضاله
شلته لخدٍ قفر واخترت مزموم
***************** وحطيته بقبرٍ على مستقله
ونعيت طيرٍ عالمٍ دون تعلوم
************ نعي الخليل اللي فقد زول خله
ولولاي اداري ملتي قلت مرحوم
************** وفتحت بابي للعزا حشمةٍ له
ولانيب والله من هل الصنف مليوم
**************** وخلافهم مالي بفلة سجله
خويي اللي منكبه دايم الدوم
************ في منكبي حزة طوال الاظله
مكفيه قفرٍ حروة الربد مقدوم
************* ومكفيني اللي بالتدرج امقله
طلاع ساطي لابرق الريش صاروم
************ يشفي غليلي يوم يشفي لغله
لاشفت اثرها بين وديان وحزوم
************** لو اقضب المسباق بالحيل تله
واليا اعزمت حول بها الحلق ملزوم
**************** مثل المظلي لانحدر بالمظله
الطير عندي وافي القدر محشوم
*********** ازعلك وازعل من بصفك رضاله
والصيد ولعة عز ماهوب مذموم
********** قبلي وطوه اللي على الضد عله
مايقدره راع السفاهات والنوم
*************** الليل سهر ويرقد الصبح كله
يقدر عليه امن الرياجيل شغموم
******************** قوي عزم وكل دربٍ يدله
يا طى البعيد ودايسٍ ديرة القوم
***************** قلبه جري ولا دخل فيه ذله
يسري بليلٍ خرمسٍ مابه نجوم
********* ويمسي على اللي يقصده مايزله
وبعض العرب لو جنب القار منجوم
************ يمسي ويصبح يبترم في محله
متى نشوف اسهيل والوسم بقدوم
**************** والقنص يبدا للمشافيق حله
عقب الحمى يصدر بالاخبار مرسوم
********************** اعدله باليوم قبل الاهله
يازين هاك اليوم يالربع من يوم
***************** كم الكبود اللي تحرى مغله
والصيد جاله بالخلى ذكر ورسوم
**************** والخرب جوله بالمدارج يجله
شلنا لقفرٍ باول الوسم ماسوم
******************* ووسميةٍ مع كل ثالث تعله
ماوصلها غير اشقرٍ يدرج الحوم
************** وربدٍ ليا ادلا فوقهن كابرن له
يدله بها من شال في صدره اهموم
**************** وينسى غثا الايام دقه وجله
بالليل شبة نار وضحوك وعلوم
************ ودله تصب وفي نحا النار دله
واليا انثنا ليلٍ من الصبح مهزوم
*************** اللي يماري سير طيره يحله
ذي ولعتي مارضا بها الحد والسوم
*************** وباب النقايد يمها اليوم طله
كلٍ على ليلاه والقسم مقسوم
*********** والرابح اللي مالحق الناس زله
21-08-2015, 01:31 PM
الطير مات وجا عزا الطير باللوم ( سعود بن عبدالله المسعود )
النمط الخطي
