منتديات قبيلة بني زيد

منتديات قبيلة بني زيد (http://www.banyzaid.com/vb/)
-   الـقـسم الـعـام (http://www.banyzaid.com/vb/f3/)
-   -   يوم كنت صغير (قصص طريفة) (2) (http://www.banyzaid.com/vb/t44462.html)

ناصح بني زيد 18-11-2007 05:09 PM

يوم كنت صغير (قصص طريفة) (2)
 
رابط القصة الأولى :
http://www.banyzaid.com/vb/t44379.html

القصة الثانية

في أحد أيام زمان ..

مسكت مع أخواني يبون يلعبون كورة في الشارع مع عيال الحارة ..

أوكلو لي مهمة تجهيز أبواب الفريقين (وهي عبارة عن حصاتين توضع باب لكل فريق)جهّزت باب الفريق الأول ..

واتجهت لتجهيز باب الفريق الثاني

كنت شايل حصاة كبيرة بيدي الاثنتين ..

شفت قدامي سيارة مقبلة ..

جاني ابليس وقال : وش رايك ترجم هالحصاة على السيارة اللي بتجي !!!!

أنا بصراحة استحسنت الفكرة واستوت في راسي ..

اقبلت السيارة ..

وسميت بالله طخخخخخخخخخخخخخ

على باب البنزين (أول نسميه بنزيم)

ثم تفاجأت أن البنزين سال على الأرض !!

والله إلى الآن ما أدري وشلون سال !!!

أنا انحشت ودخلت البيت ودخلت في أحد الغرف وصكيتها ودخلت في أحد الدواليب وصكيت الدالوب عليّّ !!!

كل هذي الإجراءات خوفا من ابوي الله يحفظه ..

وجلست أنتظر .. وتمنيت ان الأرض تبلعني .. وقلت لنفسي ياملقوووووووووووف وش خلاك ترجم الحصاة ؟؟؟

تمنيت وقتها أني أموت ولا اشوف ولا أعيش هالموقف الصعب ..

فجأة .. سمعت صوت ابوي يناديني ..

أنا بصراحة تورطت ..

وقلت ما ينقذني من الموقف إلا أني أسوي نفسي ميّت يمكن يرحمني ويخليني !!!!!

(تلعب على مين يالحبيب)

كنت أراقب دخول أبوي من فتحة الدولاب ..

دخل أبوي الغرفة .. وهو يناديني ..

فتح ابوي الدالوب ..

أنا بدوري بدأت بالخطة وسويت نفسي ميّت !!!!!

جا أبوي وشقلني (يعني حملني على كتوفه) وكنت مستمر في التمثيل .. ولا قلت ولا كلمة .. ومطيح يديني يعني إني ميت ..

أبوي عارف استهبالاتي وثقالة دمي ..

وقال لي : خل هبالك ينفعك إذا وديناك للشرطة وسجنوك ..

أنا بأسلمك للرجال وهو بيوديك للشرطة ويسجنونك ويجلدونك !!!

أنا بصراحة دب في قلبي الرعب ..

قلت ياولد الدعوة جد بلا تمثيل بلا خرابيط ...

وأصرخ ذيك الصرخة (لااااااااااااااااااا) .. تكفي يابوي .. تكفى خلاااااااااااااااااااص..

وهو متجه بي للشارع وهو يردد ياويلك ويلاااااااااااه ..

طلع بي في الشارع ولقيت الرجال ينتظر .. والبنزين يصبصب ..

قال ابوي هذا الولد خذه معك للشرطة ولا عاد تجيبه لنا !!! ..

أنا تحطمْت وتحطمَت آمالي (الله أكبر يالآمال)

وقعدت أصيح بأقوى ماعندي ..

الرجال رحمني الله يرحمه..

وقال خلاص أنا بأسامحك بس لا عاد تعوّدها ..

قلت والله العظيييييييييم واقققققققققققققققسم بالله ماعااااااااااااااد أتعودددددددددددها ..

طبعا أقسّم وأحلّف وأنا أصيح

فتركني أبوي ودخلت البيت وأنا أشاهق من الصياح ..

وكان موقف حكيم من والدي حفظه الله

بعدها تأدبت صح ...

وترقبوا الحلقة الثالثة ( يوم شلت الدب الباكستاني)

وفي أمان الله

هوتميل 18-11-2007 05:21 PM

إقتباس:

قال ابوي هذا الولد خذه معك للشرطة ولا عاد تجيبه لنا !!! ..
هذي تربية شيبان اول هي الي طلعتهم رجاجيل صح

واما كتب علم النفس الي تقول ...لا تعلمه بأخطائه عشان ما يتحطم وترسخ المسألة في باله خرطي


قصص حلوه ننتظر جديدك اخي ناصح بني زيد

جمانة العالم 18-11-2007 05:29 PM

:( :( :(
ذكريات جميلة+*
ما تلعب ياناصحQA*
ننتظر الموقف الثالث الله يستر }}÷÷*
وش يصير بعد
لا يكون ( شنقلت ) بالباكستاني(,)

ناصح بني زيد 19-11-2007 12:33 AM

ابن العم / هوتميل

الشدة له أثرها الإيجابي وشي لمسناه ..

وخل عنك كلام علم الطفس ..

شكرا لمرورك أخيي

بنت العم / جمانة العالم

أشكر لك حرصك ومتابعتك وانتظري قصتي مع البزر الباكستاني :n:

منسدح باللفه 19-11-2007 03:55 AM

هههههههههههههههههههههههههههههههههههههههههههههههههه


اتحرى الحلقه الثالثه بلهفه

برق الشوق 19-11-2007 04:01 AM

يا ولد عمي

ما تلاحظ ان عندك مشكله مع الحصا ؟؟

يعني انه يسبب لك مشاكل

الله يعينك على طفولتك

@محب المرحوم@ 19-11-2007 09:32 AM

الســـــــــلام عليــــــــــكم

جا أبوي وشقلني (يعني حملني على كتوفه) وكنت مستمر في التمثيل .. ولا قلت ولا كلمة .. ومطيح يديني يعني إني ميت ..

والله ابوك حبيب الا ماتوطاء في حوض بطنك :( :(

وكان موقف حكيم من والدي حفظه الله بعدها تأدبت صح

تأدبت ومشالله القصه الثالثه جايه لا والله الي تدبت:( :(

اقول صح انك اقشر شوي وانت صغير لكن محاكيك عنده ماواقف الله لا يوريك نسج من الخيال ومن افلام الاكشن والكوميديا عدد خواني يالله من فضلك 11 ما شاء الله شكلي من كثرهم بوزعهم 4 4 2 خطه :( :(

يعطيك الف عافيه اخوي ناصح ذكرتني بيام الطفوله والحقيقه كتابه وقصص رائعه

ننتظر الجزء الثالث والله يستر لا يكون فيه حصا :( :(

تحيــــــــــاتــــــــــــي لك ...

ناصح بني زيد 19-11-2007 08:06 PM

ابن العم / منسدح باللفة (انتبه لا أحد ياطاك:n4: )

أشكرك على الضحك وشكرا لمرورك وانتظر الثالثة

ابن العم / برق الشوق ..

وافقت سبحان الله .. بس القصة الجاية ما فيها حصى فيها شي أعظم من الحصى ..

شكرا أخيي على المررور

ابن العم / محب المرحوم ..

عندنا وعندك خير .. وتكفى إن كان عندك قصص قلها خلنا نوسع صدورنا ..

ما ودي أدندر لحالي ..

لؤلؤة نجد 19-11-2007 08:28 PM

هههههههه والله أيام الطفولة حلوة بالمرة وتحليها أحيانا الشقاوة بس مو لها الدرجة فك الله راس الرجال ولا جته الحصاة ولا صب دمه وجزاه الله خير اللي سامحك
ننتظر المزيد من ابداعاتك بفارغ الصبر

ناصح بني زيد 19-11-2007 08:37 PM

بنت لعم / لؤلؤة نجد ..

ياحليلك محسنة الظن ..

فضخت راس الرجال بالحصاة اللي بيدي وصب دمه ..

وفضحت راس أخوي مرتين وصب دمه ..

هههههههههههههههه

شجرة طيبة 19-11-2007 08:42 PM

:( :(


إقتباس:

واما كتب علم النفس الي تقول ...لا تعلمه بأخطائه عشان ما يتحطم وترسخ المسألة في باله خرطي
:(

ناصح بني زيد 19-11-2007 08:47 PM

بنت العم / شجرة طيبة ..

هو صادز

Nes*Nes 20-11-2007 12:25 AM

ما يستنتج من القصة الاولى والثانيه

ان البطل يعشق شي اسمه حصا ...(,) (,)

وش قصتك مع الحصا ؟؟؟؟؟


اما وانت مسوي نفسك ميت احس انك مطلع لسانك مثل الخروف المذبوح(,)

ناصح بني زيد 20-11-2007 12:53 AM

بنت العم / نس نس ..

تعرفين بزارين أول يرقد ومعه حصاة :،÷

أشكر لك مرورك بنت عمي

سندس 20-11-2007 12:58 AM

بارك الله فيك على ها المواقف الحلوة ..


جميع الأوقات بتوقيت السعودية. الساعة الآن » [ 06:24 AM ] .

Powered by vBulletin Version 3.6.4
Copyright ©2000 - 2020, Jelsoft Enterprises Ltd.
حقوق كل مايعرض في هذا المنتدى محفوظة لمنتدى بني زيد


SEO by vBSEO 3.1.0 ©2007, Crawlability, Inc.